ភ្នំពេញ៖ យុវជនម្នាក់ជាជាងជួសជុលរថយន្តជិះម៉ូតូមិនប្រយ័ត្នបានបុករថយន្ត ហាយឡែនឌ័រកំពុងបត់ក្រោយ បង្កឲ្យមានការភ្ញាក់ផ្អើលដល់អ្នកធ្វើដំណើរតាមផ្លូវទាំងព្រឹក ។

ហេតុការណ៍ភ្ញាក់ផ្អើលនេះកើតឡើងនៅវេលាម៉ោង០៩និង០៥នាទីព្រឹកថ្ងៃទី១៥ ខែតុលា ឆ្នាំ២០១៥  នៅចំណុចខាងលិចស្តុបផ្លូវ២៦១កែងផ្លូវ១៨២ សង្កាត់ទឹកល្អក់២ ខណ្ឌទួលគោក ។

ប្រភពព័ត៌មានពីអ្នកធ្វើដំណើរដែលបានឃើញហេតុការណ៍បានប្រាប់ឲ្យថា ករណីគ្រោះថ្នាក់ចរាចរណ៍រវាងម៉ូតូគុបជ្រុងពណ៌ខៀវស្លាកលេខភ្នំពេញ1K-6089ដែលបានបុករថយន្តHighLander ពណ៌ស្ករ ពាក់ស្លាកលេខភ្នំពេញ2AB-0896 ឲ្យរងការខូចខាតផ្នែកថ្ពាល់ខាងឆ្វេងនៃរថយន្តមិនបណ្តាលអោយមានគ្រោះថ្នាក់ដល់មនុស្សឡើយ ។

អ្នកធ្វើដំណើររូបនោះបានបន្ថែមថាមុនដំបូងគេឃើញរថយន្តបើកបរពីកើតទៅលិចតាមបណ្តោយផ្លូវ១៨២មកដល់ចំណុចកើតហេតុរថយន្តខាងលើក៏វ៉ៃភ្លើងសីុញ៉ូមានបំណងបត់ត្រលប់ក្រោយ ដោយរថយន្តទើបតែបត់បានពាក់កណ្តាលនៃផ្លូវស្រាប់តែមានយុវជនម្នាក់ជិះម៉ូតូក្នុងទិសដៅស្របគ្នាចាប់ហ្វ្រាំមិនទាន់ក៏បានបុករថយន្តចំថ្ពាល់ឆ្វេងខាងមុខរងការខូចខាតតែម្តង ។

ក្រោយកើតហេតុនរគបាលប៉ុស្ត៏ទឹកល្អក់២ បានចុះមកអន្តាគមន៍ធ្វើការសម្របសម្រួលផងដែរ តែដោយភាគីម៉ូតូមិនចង់មានការវែងឆ្ងាយហើយខ្លួនជាជាងជួសជុលរថយន្តស្រាប់ ក៏បានសុខចិត្តយករថយន្តដែររងការខូតខាតទៅជួសដើម្បីបញ្ចប់រឿង ៕

ដោយ៖ ស ដារ៉ា