ភ្នំពេញ៖ ជនសង្ស័យមា្នក់បានធ្វើសកម្មភាពហែករបងលួសចូលប៉ុនប៉ងលួចទ្រព្យសម្បត្តិតែមិនបានសម្រេច២ដង ត្រូវម្ចាស់ផ្ទះភ្ញាក់ទាន់ចាប់បានប្រគល់ឲ្យសមត្ថកិច្ច ។
ហេតុការណ៍នេះបានកើតឡើងកាលពីវេលាម៉ោង១និង៣០នាទីរំលងអធ្រាត្រឈានចូលថ្ងៃទី១៥ ខែតុលា ឆ្នាំ២០១៥ នៅភូមិថ្មគោល២ សង្កាត់ចោមចៅ ខណ្ឌពោធិ៍សែនជ័យ ។
តាមប្រភពពីជនរងគ្រោះមា្ចស់ផ្ទះឈ្មោះ ធីបូនី ភេទប្រុស អាយុ៣៧ឆ្នាំមុខរបរជាងសំណង់រស់នៅកន្លែងកើតហេតុ បានឱ្យដឹងថា មុនពេលកើតហេតុគាត់និងប្រពន្ធកូនបានដេកលុងលក់ស្របពេលមេឃកំពុងធ្លាក់ភ្លៀងស្រិចៗ បន្ទាប់មកក៏ឮសម្លេងឆ្កែព្រូសមិនឈប់ដោយមានការសង្ស័យគាត់ក៏បានបើកទ្វារចេញមកមើល ឃើញជនសង្ស័យម្នាក់នោះ កំពុងតែហែករបងលួសចូល ក្នុងផ្ទះរបស់គាត់ដែលលក់ចាបហួយ ប៉ុនប៉ងលួចទ្រព្យសម្បត្តិ ពេលជនសង្ស័យឃើញគាត់បើកទ្វារចេញមកក៏រត់គេចខ្លួនបាត់ ។ ម្ចាស់ផ្ទះបានបន្តទៀតថា ភ្លាមៗនោះគាត់បានទូរស័ព្ទប្រាប់ សាច់ញាតិឲ្យជួយព័ទ្ធចាប់អត់បាន ។
លុះមួយសន្ទុះក្រោយមកស្រាប់តែជនសង្ស័យបាន មកពួនក្បែររថយន្តនៅជាប់របងលួស បានហែករបងលួសរុលចូលបានពាក់កណ្តាលខ្លួនទៀត គាត់បើកទ្វារចេញមកបានជាន់សង្កត់ជាប់ពីលើហើយស្រែកហៅអ្នកជិតខាងឲ្យជួយចាប់បានវាយមួយដៃមួយជើងទ្រោមខ្លួន ទើបទំនាក់ទៅសមត្ថកិច្ចដោយរង់ចាំសមត្ថកិច្ចយូរពេករូបគាត់ក៏បានដឹកយកទៅប្រគល់ឲ្យ នគរបាលប៉ុស្តិ៍ចោមចៅតែម្តង តែរូបគាត់មិនបានដាក់ពាក្យបណ្តឹងទេព្រោះដោយសារតែមិនបានបាត់ទ្រព្យសម្បត្តិគ្រាន់តែឲ្យសមត្ថកិច្ច ធ្វើការអប់រំហើយដោះលែងវិញ ។
សមត្ថកិច្ចបានអោយដឹងថាជនសង្ស័យមានឈ្មោះ អាមាស ភេទប្រុស អាយុ២៥ឆ្នាំ មុខរបរមិនពិតប្រាកដស្នាក់នៅផ្ទះជួលភូមិថ្មគោល១ សង្កាត់ចោមចៅ ខណ្ឌពោធិ៍សែនជ័យ ។
សមត្ថកិច្ចបានបន្តថាជនសង្ស័យដែលហែករបងចូលផ្ទះគេខាងលើ សង្ស័យជាមនុស្សបែកថ្នាំព្រោះដោយសារតែពេលសមត្ថកិច្ចសួរនាំរូបគេឆ្លើយថាគេចូលទៅផ្ទះឪពុងម្តាយគេទេ ។ ក្រោយពីធ្វើសំណុំរឿងរួចសមត្ថកិច្ចក៏ដោះលែងជនសង្ស័យទៅវិញ ។
គួរបញ្ជាក់ថានៅភូមិថ្មគោលមានករណីចោរគាសផ្ទះយកទ្រព្យសម្បត្តិបានសម្រេច២ដងមកហើយ តែសមត្ថកិច្ចមិនបង្ក្រាប់បាន និងនៅម្តុំសួនការណាឌីយាក៏កើតមានជាញាក់ញាប់ដែរ ៕
ដោយ៖ សុខាសែនជ័យ
...
