ខេត្តពោធិ៍សាត់ ៖ បុរសម្នាក់គេឃើញដេកដួលសន្លប់ស្ដូកស្ដឹងក្នុងថ្លុកឈាមក្រហមច្រាល់នៅកណ្ដាលផ្លូវ ដែលនេះជាករណីគ្រោះថ្នាក់ចរាចរណ៍ជិះម៉ូតូបុកគោយន្តកន្រ្តៃដឹកឈើពីក្រោយ នៅលើកំណាត់ផ្លូវជាតិលេខ៥។

ហេតុការណ៍ខាងលើនេះបានកើតឡើងកាលពីវេលាម៉ោង៧ និង២៥នាទីយប់ ថ្ងៃទី០១ ខែតុលា ឆ្នាំ២០១៧ នៅលើកំណាត់ផ្លូវជាតិលេខ៥ ត្រង់ចន្លោះបង្គោលគីឡូម៉ែត្រលេខ១៦០.១៦១ ស្ថិតក្នុងភូមិវាលវង់ ឃុំស្នាអន្សា ស្រុកក្រគរ ខេត្តពោធិ៍សាត់។

ប្រភពព័ត៌មានពីផ្នែកសណ្ដាប់ធ្នាប់នៃអធិការដ្ឋាននគរបាលស្រុកក្រគរបានឲ្យដឹងថា ជនរងរបួសហូរឈាមជោកផ្លួវក្នុងហេតុការណ៍គ្រោះថ្នាក់ចរាចរណ៍នេះឈ្មោះ សំ សុខប៊ុណ្ណា ភេទប្រុស អាយុ ៣៥ឆ្នាំ ជនជាតិខ្មែរ មានទីលំភូមិផ្សារ ឃុំអន្លង់ត្នោត ស្រុកក្រគរ ខេត្តពោធិ៍សាត់។

ប្រភពព័ត៌មានខាងលើបន្តថា មុនកើតហេតុគេឃើញរងរបួសធ្វើដំដោយម៉ូតូ ១គ្រឿងម៉ាក ហុងដាឌ្រីម សេ១២៥ សេរីឆ្នាំ២០១៤ ពណ៌ខ្មៅ ពាក់ស្លាកលេខ ពោធិសាត់ 1F 1221 តែគេមិនបានបញ្ជាក់ធ្វើចរាចរណ៍ក្នុងទិសដៅពីណាទៅណានោះទេ លុុះមកដល់ចំណុចកើតហេតុបានជ្រុលបុកគោយន្តកន្រ្តៃពីក្រោយពេញទំហឹង ខណៈគោយន្តកន្រ្តៃនោះដឹងឈើពេញកំពុងធ្វើដំណើរស្របទិសគ្នា បណ្ដាលឲ្យភាគ្គីម៉ូតូដួលសន្លប់ស្ដូកស្ដឹងហូរឈាមជោគលើផ្លូវតែម្ដង។

ប្រភពព័ត៌មានដដែលខាងលើបន្តទៀតថា ភ្លាមៗនោះជនរងរបួសត្រូវបានគេជួយដឹកយកទៅសង្រ្គោះ នៅមន្ទីរពេទ្យបង្អែកខេត្តពោធិ៍សាត់ ចំណែកភាគ្គីគោយន្យកន្រ្តៃដឹកឈើដាក់មេប្រូចបាត់ស្រម៉ោលនគរបាលកំពុងរវល់តាម ដោយឡែក៖ វត្ថុតាងគោយន្តកន្ត្រៃដឹកឈើ និងម៉ូតូម៉ាក ហុងដាឌ្រីម រក្សាទុកនៅប៉ុស្តិ៍នគរបាលរដ្ឋបាលស្នាអន្សា រងចាំធ្វើការដោះស្រាយគ្នាតាមផ្លូវច្បាប់៕ បឹុម ពិន