ខេត្តកណ្ដាល ៖ ទំនាស់ពាក្យសម្ដីជេរប្រមាថ ផ្តើមអោយ មានកំហឹង រហូតឪពុកក្មេកបានទៅយកកាំភ្លើងអាកាស្វាយបត់មកគំរាមកូនប្រសា កាលពីថ្ងៃទី៣ ខែតុលា ឆ្នាំ២០១៧ នៅ ចំណុចអូថ្លុកសួង ស្ថិតនៅភូមិពោធិក្រោម ឃុំត្រើយស្លា ស្រុកស្អាង ខេត្តកណ្តាល ។
ជនសង្ស័យឈ្មោះ វង់ ថៃ ភេទប្រុស អាយុ៥៧ឆ្នាំ រស់នៅ ភូមិពោធិក្រោម ឃុំត្រើយស្លា ស្រុកស្អាង ខេត្តកណ្តាល មុខរបរកសិករ ។ ជនសង្ស័យត្រូវអាជ្ញាធរមានសមត្ថកិច្ចចោទប្រកាន់ពីបទកាន់កាប់និងប្រើប្រាស់អាវុធខុសច្បាប់ ។
សមត្ថកិច្ចបានឲ្យដឹងថា មុនកើតហេតុ ឈ្មោះវង់ ថៃមានទំនាស់ពាក្យសម្តីជាមួយកូនប្រសារឈ្មោះឈីវ ឈាន រហូត អត់ទ្រាំពុំបាន ក៏ទៅយកកាំភ្លើងដែលលាក់ទុកក្នុងផ្ទះរបស់ ខ្លួន ដើម្បីគំរាមកូនប្រសារ ឈ្មោះឈីវឈានកុំអោយ កុំឱ្យ ប្រមាថមើលងាយគាត់ពេក ។
សមត្ថកិច្ចបន្តថា បន្ទាប់ទទួលបានពត៌មាននេះភ្លាម កំលាំងប៉ុស្តិត្រើយស្លា បានចុះទៅដល់កន្លែងកើតហេតុធ្វើការឃាត់ខ្លួន ឈ្មោះវង់ថៃ រួមទាំងវត្ថុតាងកាំភ្លើងស្វាយបត់បញ្ជូនមកអធិការស្រុកស្អាងដើម្បីអនុវត្តនិតិវិធី ៕ ស្អាងជ័យ
