មន្ត្រីអាមេរិកកាលពីថ្ងៃទី១៥ខែតុលាបានឲ្យដឹងថា កម្លាំងទាហានអាមេរិកបានសម្រេចបង្កើនការផ្តល់សព្វាវុធទៅឲ្យក្រុមបះបោរស៊ីរីដើម្បីប្រឆាំងទៅនឹងក្រុមអិស្លាមបង្កើតរដ្ឋ។ ប៉ុន្តែក្រុមអ្នកឯកទេសរបស់រុស្ស៊ីបានបញ្ចាក់ថាការផ្តល់សព្វាវុធរបស់អាមេរិកគឺដើម្បីទប់ទល់នឹងរុស្ស៊ី ព្រមទាំងរដ្ឋាភិបាលលោកអាលអាសាដទៅវិញ។
តាមមន្ត្រីមន្ទីរបញ្ចុកោណអាមេរិកបញ្ចាក់ថា អាមេរិកនឹងផ្តល់សព្វាវុធទៅឲ្យក្រុមប្រឆាំងរដ្ឋាភិបាលស៊ីរី។ មន្ត្រីអាមេរិកបានបញ្ចាក់ថា«យើងនឹងផ្តល់សព្វាវុធជាច្រើនទៅឲ្យក្រុមប្រឆាំងរដ្ឋាភិបាលស៊ីរីដើម្បីវាយប្រហារទៅលើក្រុមអិស្លាមបង្កើតរដ្ឋ»។ មន្ត្រីអាមេរិកបញ្ចាក់ទៀតថាការផ្តល់នោះសមស្របទៅនឹងអ្វីដែលពិភពលោកកំពុងតែធ្វើ ពិសេសគឺរុស្ស៊ីុជួយរដ្ឋាភិបាលស៊ីរីវាយប្រហារក្រុមISដូច្នេះអាមេរិកក៏ត្រូវជួយក្រុមប្រឆាំងវាយប្រហារក្រុម ISនោះដែរ។
កាលពីថ្ងៃទី១១ខែតុលាសម្ព័ន្ធមិត្តដែលដឹកនាំដោយអាមេរិកបានទម្លាក់គ្រាប់ជាង៥០តោនទៅឲ្យក្រុមប្រឆាំងស៊ីរីសម្រាប់វាយប្រហារទៅលើក្រុមIS។
ប៉ុន្តែសកម្មភាពរបស់អាមេរិកនាពេលនេះត្រូវបានក្រុមអ្នកប្រឆាំងអាមេរិកមន្ទិលសង្ស័យថា អាមេរិកកំពុងតែផ្តល់សព្វាវុធទៅឲ្យក្រុមអិស្លាមបង្កើតរដ្ឋដោយប្រយោល ដោយប្រើប្រាស់ក្រុមប្រឆាំងសីរីជាគោលដៅនៃការផ្តល់ជំនួយ។ ការផ្តល់សព្វាវុធខាងលើនោះប្រាកដជាធ្លាក់ចូលក្នុងដៃក្រុមអិស្លាមបង្កើតរដ្ឋជាមិនខាន ក្នុងពេលដែលក្រុមនេះកំពុងបរាជ័យជាបន្តបន្ទាប់ក្រោមការវាយប្រហារពីដែនអាកាសរបស់រុស្ស៊ីក៏ដូចជាការវាយប្រហារតាមដីគោកពីកម្លាំងទាហានរដ្ឋាភិបាលស៊ីរី។
កន្លងមក ទីក្រុងមូស្គូបានស្នើឲ្យអាមេរិកបញ្ចប់ការនិទានរឿងព្រេងពីកាំជ្រួចមីស៊ីុល របស់រុស្ស៊ីទៀតទៅ ដោយនិយាយពីមូលហេតុ ថាតើក្រុមអិស្លាមបង្កើតរដ្ឋមានរថយន្តតូយ៉ូតាជាច្រើន ប្រើប្រាស់នៅក្នុងប្រទេសស៊ីរីនោះវិញ?
លោកស្រី Zakharova បញ្ជាក់ថា « ប្រភពដែលមិនបញ្ចេញឈ្មោះវិភាគតែកាំជ្រួចមីស៊ីុលរុស្សីុធ្លាក់ ម្តេចមិនលើកឡើងថាហេតុអ្វីបានជាក្រុមអិស្លាមបង្កើតរដ្ឋមាន រថយន្តម៉ាកតូយ៉ូតាជាច្រើនប្រើប្រាស់។ ដូច្នេះសូមកុំចេះតែនិយាយកាំជ្រួចមីស៊ីុលរុស្ស៊ី គួរតែនិយាយអំពីរថយន្តដែលក្រុមអិស្លាមប្រើប្រាស់វិញ»។
លោកស្រីបន្តទៀតថា រថយន្តតូយ៉ូតាត្រូវបានអាមេរិក និងអង់គ្លេសបញ្ជូនទៅកាន់ស៊ីរីនាពេលកន្លងមក ពេលនេះក្រុមអិស្លាមបង្កើតរដ្ឋកំពុងប្រើប្រាស់។
កន្លងមក ប្រព័ន្ធផ្សព្វផ្សាយស៊ីរីបានបញ្ជាក់ថា ក្រុមអិស្លាមបង្កើតរដ្ឋទទួលបានផលិតផលមួយចំនួនធំពីក្រុមហ៊ុនតូ យ៉ូតា ។ តាមក្រុមហ៊ុនតូយ៉ូតារបស់ជប៉ុនបានបញ្ជាក់ថា ក្រុមហ៊ុននេះមិនដែលបានលក់រថយន្តរបស់ខ្លួនសម្រាប់បម្រើក្នុង វិស័យយោធា ឬសកម្មភាពវាយប្រហារភេរវកម្មនោះឡើយ។
នៅពេលនេះដែរ ក្រុមប្រឆាំងភេរវកម្មមកពីក្រសួងហិរញ្ញវត្ថុអាមេរិក ក៏បានបើកការស្រាវជ្រាវពីបញ្ហាខាងលើថា តើក្រុមអិស្លាមបង្កើតរដ្ឋមានរថយន្តប្រភេទនេះមកពីណា? ភាគីណាមួយជាអ្នកផ្តល់ឲ្យ។
កងកម្លាំងទាហានរដ្ឋាភិបាលស៊ីរីបានបើកការវាយប្រហារផ្ទាល់ដីកាលពីវេលាព្រឹក ចូលទៅកាន់ទីតាំងប្រជុំជនរបស់ក្រុមឧទ្ទាម ស្ថិតនៅទីជនបទខេត្តហាម៉ា(Hama) ដោយមានការជួយជ្រោមជ្រែងពីដែនអាកាសកងទ័ពប្រទេសរុស្ស៊ី ។
ការវាយប្រហារដើម្បីដណ្តើមគ្រប់គ្រងទីតាំងខាងលើនេះធ្វើឡើងជាលើកដំបូងរបស់កងទ័ពកម្លាំងទាហានផ្ទាល់ដី ប្រទេសស៊ីរី ក្រោមការជួយគាំពារពីដែនអាកាសដោយកងកម្លាំងទាហានប្រទេសរុស្ស៊ី ។ កងកម្លាំងយោធាស៊ីរីបានសម្តែងការសង្ឃឹមទុកថា ដោយមានជំនួយពីលើដែនអាកាសពីកងកម្លាំងទាហានរុស្ស៊ី ពួកខ្លួនអាចនឹងរំដោះបានដែនពីតំបន់ ហាមា និងនៅភាគកណ្តាលខេត្ត Homs ពីកណ្តាប់ដៃក្រុមឧទ្ទាមជាក់ជាពុំខាន ។ ប្រតិបត្តិការសឹកសង្គ្រាមនេះផងដែរត្រូវគេរំពឹងថា កងកម្លាំងស៊ីរីនឹងរំដោះបានទឹកដីភាគច្រើនមកវិញ ពិសេសនៅតាមទីជនបទខេត្ត ហាមា ភាគពាយព្យតំបន់ Idlib ដែលកំពុងស្ថិតក្រោមការគ្រប់គ្រងយ៉ាងតឹងរ៉ឹងពីក្រុម Jaish al-Fateh នោះ ។
យន្តហោះចម្បាំងប្រទេសរុស្ស៊ីបានចាប់ផ្តើមប្រតិបត្តិការ វាយប្រហារពីលើដែនអាកាសកាលពីថ្ងៃពុធ ប្រឆាំងទៅលើទីតាំងក្រុមប្រឆាំងដែលគ្រប់គ្រងតំបន់ភាគច្រើននៅក្នុង ប្រទេសស៊ីរីនោះ ។ នេះជាសកម្មភាពលើកដំបូងរបស់កម្លាំងទាហានរុស្ស៊ីពាក់ព័ន្ធសង្គ្រាម ប្រឆាំងក្រុមភេរវកម្មនៅក្នុងទឹកដីស៊ីរី ។
ទីភ្នាក់ងារស៊ីរី SANA បានផ្សព្វផ្សាយថា ប្រតិបតិ្តការពីលើដែនអាកាសរបស់យន្តហោះចម្បាំងប្រទេសរុស្ស៊ីនេះ កើតឡើងបន្ទាប់ពីមានការស្នើសុំពីលោកប្រធានាធិបតីស៊ីរី បាសា អាល់អាសាដ ។ ទីក្រុងមូស្គូបានប្តេជ្ញាបន្តគាំទ្រ និងផ្តល់ជំនួយដល់ស៊ីរីដើម្បីប្រយុទ្ធប្រឆាំងទៅលើក្រុមភេរវកម្មស្របទៅតាមច្បាប់អន្តរជាតិ ។
ប៉ុន្តែទោះបីយ៉ាងណាក៏ដោយ សកម្មភាពរបស់កម្លាំងយោធារុស្ស៊ីនេះបានធ្វើឲ្យអង្គការណាតូ ព្រួយបារម្ភយ៉ាងខ្លាំង និងបានស្នើឲ្យទាហានរុស្ស៊ីបញ្ឈប់ប្រតិបត្តិការតាមដែនអាកាស ប្រឆាំងទៅលើក្រុមប្រឆាំង ដោយសារថា វាបានរងគ្រោះទៅដល់ជនស្លូតង្រង់ និងរំលោភចូលដែនអាកាសប្រទេសទួរគី ។
អង្គការណាតូ កាលពីថ្ងៃទី៥ ខែតុលា ឆ្នាំ២០១៥ បានអំពាវនាវឲ្យរុស្ស៊ីបញ្ឈប់សកម្មភាពវាយប្រហារពីលើដែនអាកាសទៅលើ ក្រុមប្រឆាំង និងពលរដ្ឋស៊ីរី និងបានអះអាងថា ការហោះហើររបស់យន្តហោះចម្បាំងរុស្ស៊ីដែលរំលោភទៅលើដែនអាកាសប្រទេស ទួរគីនោះនឹងធ្វើឲ្យស្ថានការណ៍កាន់តែតានតឹងខ្លាំងឡើងថែមទៀត ។
ប្រទេសទួរគីបានព្រមានទីក្រុងមូស្គូផងដែរថា ខ្លួននឹងអស់ការអត់ធ្មត់ប្រសិនបើយន្តហោះចម្បាំង F-16 របស់កម្លាំងទាហានរុស្ស៊ីរំលោភចូលដែនអាកាសទួរគីជាថ្មីម្តងទៀត ស្ថិតនៅជាប់ព្រំដែនជាមួយស៊ីរីនោះ ។ប្រភពព័ត៌មានពីយោធាទួរគីបានអះអាងថា យន្តហោះចម្បាំងរបស់ខ្លួន២គ្រឿងទទួលរងការរំខានដោយយន្តហោះចម្បាំង ប្រភេទ MIG-29 ដែលជាយន្តហោះមិនដឹងថាមកពីខាងណានោះឡើយស្ថិតនៅតាមបន្ទាត់ព្រំដែនជាមួយស៊ីរីនោះ ។
ទួរគីជាប្រទេសដែលបញ្ជូនកម្លាំងយោធាច្រើនជាងគេលំដាប់លេខ២បន្ទាប់ពីអាមេរិកឲ្យចូលរួមក្នុងប្រតិបត្តិការរបស់អង្គការណាតូ ។ នាយករដ្ឋមន្ត្រីទួរគី លោក Ahmet Davutoglu បានថ្លែងថា «កងកម្លាំងអនុវត្តច្បាប់របស់យើងដឹងយ៉ាងច្បាស់ណាស់ នរណាដែលរំលោភចូលដែនអាកាសរបស់យើងនោះ»៕
