មន្ត្រីបានប្រកាសកាលពីថ្ងៃទី១៦ ខែតុលា ឆ្នាំ២០១៥ថា នៅសប្តាហ៍ខាងក្រោយនេះ រដ្ឋមន្ត្រីក្រសួងការពារជាតិជប៉ុន និងកូរ៉េខាងត្បូងនឹងជួបពិភាក្សាគ្នានៅទីក្រុងសេអ៊ូល ។ នេះជាសញ្ញាមួយបង្ហាញឲ្យឃើញថា ប្រទេសដែលជាសម្ពន្ធមិត្តអាមេរិកទាំងពីរនេះកំពុងតែខិតខំដោះស្រាយបញ្ហា និងបង្កើនកិច្ចសហប្រតិបត្តិការល្អប្រសើរឡើងវិញ ។
ក្រសួងការពារជាតិកូរ៉េខាងត្បូងបានប្រកាសថា នៅថ្ងៃអង្គារ សប្តាហ៍ខាងមុខនេះ ស្ថិតនៅទីក្រុងសេអ៊ូល រដ្ឋមន្ត្រីក្រសួងការពារជាតិកូរ៉េខាងត្បូង លោក Han Min-koo និងសមភាគីជប៉ុន លោកឧត្តមសេនីយ៍ Nakatani នឹងជួបពិភាក្សាជាត្រីភាគីជាមួយប្រទេសចិន ។
មន្ត្រីជាន់ខ្ពស់កូរ៉េខាងត្បូង និងជប៉ុនធ្លាប់បានជួបគ្នាលើកដំបូងមកហើយកាលពីខែឧសភា ឆ្នាំ២០១៥ នៅក្នុងប្រទេសសិង្ហបុរី ដែលជាជំនួបមិនធ្លាប់មានរវាងក្រសួងការពារជាតិជប៉ុន កូរ៉េខាងត្បូង ក្នុងរយៈពេល៤ឆ្នាំនោះ ។ ទំនាក់ទំនងប្រទេសទាំងពីរមានការប្រេះស្រាំអូសបន្លាយពេលតាំងពីសម័យសង្គ្រាម ដែលជប៉ុនចូលធ្វើអាណានិគមន៍នៅឧបទ្វីបកូរ៉េក្នុងឆ្នាំ១៩១០ដល់ឆ្នាំ១៩៤៥ ។ កងទ័ពជប៉ុនបានបង្ខំឲ្យស្ត្រីកូរ៉េខាងត្បូងធ្វើជាស្រីពេស្យាបម្រើតណ្ហាដល់កងទ័ពជប៉ុននោះ ។
ក្រោយឡើងកាន់តំណែងប្រធានាធិបតីកូរ៉េខាងត្បូង ខែកុម្ភៈ ឆ្នាំ២០១៣មក លោកស្រី Park Geun-Hye បានច្រានចោលការជួបពិភាក្សាជាមួយនាយករដ្ឋមន្ត្រីជប៉ុន លោក ស៊ីនហ្សូ អាបេ ដោយសំអាងថា ទីក្រុងតូក្យូនៅមិនទាន់ខុសត្រូវ ឲ្យបានសមរម្យចំពោះកំហុសរបស់ខ្លួនដែលបានធ្វើចំពោះពលរដ្ឋកូរ៉េខាងត្បូងកាលពីអំឡុងសម័យសង្គ្រាម ។
ប៉ុន្តែទោះបីយ៉ាងណា ភាគីទាំងពីរមិនបានបែកខ្ញែកគ្នានោះទេ ដោយអាស្រ័យថា អាមេរិកដែលជាសម្ពន្ធមិត្តនោះបានជំរុញឲ្យជប៉ុន កូរ៉េខាងត្បូងស្រុះស្រួលគ្នាដើម្បីរួមគ្នាប្រឆាំងឥទ្ធិពលចិន ។
ការប្រកាសជាចំហរស្តីអំពីមន្ត្រីក្រសួងការពារជាតិប្រទេសទាំងពីរជួបពិភាក្សាគ្នាជាផ្លូវការនាពេលនេះ កើតឡើងក្រោយពីមន្ត្រីប្រទេសទាំងពីរបានជួបគ្នាក្រៅផ្លូវការរួចមកហើយដើម្បីបញ្ចៀសការខឹងសម្បារពីសាធារណជន ។ កិច្ចសហប្រតិបត្តិការដោយកងកម្លាំងយោធាប្រទេសទាំងពីរ ក៏មិនបានធ្លាក់ដល់កម្រិតមួយព្រួយបារម្ភនោះដែរ បើទោះជាទំនាក់ទំនងប្រទេសទាំងពីរ មានពេលខ្លះស្ថិតក្នុងកាលៈទេសៈផុយស្រួយក៏ដោយ ។
ក្រសួងការពារជាតិកូរ៉េខាងត្បូងបានបញ្ជាក់ថា ការជួបពិភាក្សានៅពេលនេះរវាងលោក Han និងលោក Nakatani នោះនឹងផ្តោតសំខាន់ទៅលើការគំរាមកំហែងពីអាវុធនុយក្លេអ៊ែររបស់កូរ៉េខាងជើង ។ ជាមួយគ្នានេះដែរ លោក Nakatani នឹងធ្វើបទសង្ខេបឲ្យសមភាគីកូរ៉េខាងត្បូងបានដឹងអំពីការដែលរដ្ឋាភិបាលជប៉ុនបានកែប្រែច្បាប់ស្តីអំពីសង្គ្រាម ។ ការកែប្រែច្បាប់នេះមានន័យថា ជប៉ុនអាចបញ្ជូនកងទ័ពឲ្យទៅជួយប្រទេសជិតខាង និងសម្ពន្ធមិត្ត ប្រសិនបើទទួលរងការវាយប្រហារពីសំណាក់សត្រូវនោះ ។
លោកស្រីផាក យុងហេ ប្រធានាធិបតីកូរ៉េខាងត្បូងដែលបច្ចុប្បន្នកំពុងធ្វើទស្សនកិច្ចនៅទីក្រុងវ៉ាស៊ីនតោនបានថ្លែងថា លោកស្រីចង់ឲ្យមានកិច្ចពិភាក្សា ដែលលោកស្រីធ្លាប់បានគេចវេះមិនចង់ជួបពិភាក្សាជាយូរមកនោះជាមួយនាយករដ្ឋមន្ត្រីជប៉ុន លោកស៊ីនហ្សូ អាបេ ។ ការចរចាគ្នាអាចធ្វើឡើងនៅទីក្រុងសេអ៊ូលក្នុងពីរបីសប្តាហ៍ខាងមុខនេះ ជាកិច្ចពិភាក្សាត្រីភាគីរវាងលោកស្រីផាក យុងហេ, លោកហ្ស៊ីនហ្សូ អាបេ និងនាយករដ្ឋមន្ត្រីចិន លោក លី ឃើជាំង ។ កិច្ចប្រជុំត្រីភាគីនេះបានធ្វើឡើងកាលពីឆ្នាំ២០០៨ រហូតដល់ឆ្នាំ២០១២ បានផ្អាកទៅវិញដោយសារតែទំនាក់ទំនងរវាងកូរ៉េខាងត្បូង នឹងជប៉ុនមានការរកាំរកូស ៕
ប្រែសម្រួល៖ ថាច់ យ៉ាត
