ខេត្តតាកែវ ៖ យុវជន២នាក់ បានរងរបួសធ្ងន់និងស្រាល បន្ទាប់ពីបានបើករ៉ឺម៉កម៉ូតូ ទៅបុកនិងរថយន្ត ពេញទំហឹង។ហេតុការណ៍នេះបានកើតឡើងកាលពីវេលាម៉ោង១៧:១៥នាទី ថ្ងៃទី២៨ខែតុលា ឆ្នាំ២០១៧ ស្ថិតនៅភូមិកំពង់ជ្រៃ ឃុំស្មោង ស្រុកទ្រាំង ខេត្តតាកែវ។
បើតាមសមត្ថកិច្ចបានឲ្យដឹងថាជនរងគ្រោះទាំង២នាក់.ទី១.ឈ្មោះសឹម និច ភេទប្រុស អាយុ២៣ឆ្នាំ រស់នៅភូមិឃុំកើតហេតុខាងលើ (អ្នកបើករ៉ឺម៉ក)រងរបួសស្រាល ទី២.ឈ្មោះរ៉ាន់ ភេទប្រុស នាក់រួមដំណើ រស់នៅភូមិឃុំជាមួយគ្នារងរបួសធ្ងន់ ចំណែកអ្នកបើកបររថយន្តមានឈ្មោះថេវ រ៉ា ភេទប្រុស អាយុ៤០ឆ្នាំ រស់នៅភូមរមេញខាងត្បូង ឃុំរមេញ ស្រុកកោះអណ្តែត ខេត្តតាកែវ។
ប្រភពព័ត៌មាននៅកន្លែងកើតហេតុបានប្រាប់ឲ្យដឹងថា នៅមុនពេលកើតហេតុគេបានឃើញយុវជន២នាក់ បានបើករ៉ឺម៉កម៉ូតូមកពីទិសខាងកើតទៅលិច ក្នុងល្បឿនលឿនមធ្យម ចំណែកឯរថយន្តCamryបាឡែន ពណ៍ទឹកប្រាក់ ពាក់ស្លាខលេខ.ភ្នំពេញ.2AC.5264 បានបោះពួយមកពីលិចទៅកើត ស្រាប់តែមកដល់កន្លែងមិនដឹងជាយ៉ាងមិច ស្រាប់តែរ៉ឺម៉កម៉ូតូបានរេចង្កូតទៅឆ្វេង បុកជាមួយរថយន្ត ចំពីចំហៀងខាងឆ្វេងរងការខូចខាតយ៉ាងដំណំ ចំណែកឯម៉ូតូរ៉ឺម៉កខ្ទេចគ្មានសល់។
ក្រោយពេលកើតហេតុជនរងគ្រោះទាំង២នាក់ត្រូវបានក្រុមគ្រួសារដឹកទៅកាន់មន្ទីរពេទ្យ ចំណែករថយន្តហើយនិងរ៉ឺម៉កម៉ូតូ ត្រូវបានយកទៅផ្ទះរៀងៗខ្លួន ដោយមិនមាននាក់ណាសងនាក់ណាទេ(គឺស្មើគ្នា) ៕ ភ្នំដា
