ខ្យល់ព្យុះមានកម្លាំងខ្លាំងឈ្មោះ Koppu បានវាយប្រហារប្រទេសហ្វីលីពីនបណ្តាលឲ្យស្លាប់ម្នាក់, ៨នាក់នៅបាត់ខ្លួន និងបង្ខំឲ្យមនុស្ស២៣.០០០នាក់រត់ភៀសខ្លួនទៅរកទីសុវត្ថិភាព ។
ទីភ្នាក់ងារអាកាសធាតុជាតិហ្វីលីពីនបានប្រកាសថា ខ្យល់ព្យុះដែលមានកម្លាំងខ្លាំងឈ្មោះ Koppu បានវាយប្រហារបក់បោកទៅលើតំបន់ភាគខាងជើងហ្វីលីពីនកាលពីព្រឹកព្រលឹមថ្ងៃទី១៨ ខែតុលា ឆ្នាំ២០១៥ ធ្វើឲ្យតំបន់ឈូងសមុទ្រនោះមានខ្យល់ខ្លាំងហើយដែលក្រុមអ្នកព្យាករណ៍អាកាសធាតុអះអាងថា អូសបន្លាយពេលវេលារហូតដល់៣ថ្ងៃ ។
ភ្នាក់ងារអាកាសធាតុជាតិហ្វីលីពីនបានផ្សព្វផ្សាយថា ខ្យល់ព្យុះ Koppu បានបោកបក់នៅទីប្រជុំជន Casiguran ចម្ងាយ២១៥កីឡូម៉ែត្រ ភាគឦសានទីក្រុងម៉ានីលកាលពីវេលាម៉ោង៤ព្រឹក ថ្ងៃទី១៨ ខែតុលា ក្នុងល្បឿន២១០កីឡូម៉ែត្រក្នុងមួយម៉ោង ។
លោក Alexander Pama ប្រធានក្រុមប្រឹក្សាកាត់បន្ថយគ្រោះមហន្តរាយជាតិបានធ្វើសម្ភាសន៍ជាមួយវិទ្យុ DZBB ផ្សព្វផ្សាយថា ខ្យល់ព្យុះនេះហៀបមកដល់យើងមែនទែនហើយ យើងសង្ឃឹមថា វានឹងចាកចេញពីប្រទេសនេះបានឆាប់រហ័ស។
វិទ្យុផ្សាយសំឡេងក្នុងតំបន់បានផ្សព្វផ្សាយថា ខ្យល់ព្យុះបានបក់បោករំលឹងដើមឈើទាំងឫសអស់ជាច្រើន និងបង្កឲ្យបាក់បង្គោលភ្លើងស្ថិតនៅក្នុងខេត្ត Aurora ខេត្ត Casiguran និងខេត្តក្បែរៗនោះមានដូចជាខេត្ត Isabela ផងដែរធ្វើឲ្យតំបន់ទាំងមូលត្រូវកាត់ផ្តាច់ចរន្តអគ្គិសនី ។
លោក Alexander Pama បានបញ្ជាក់ថា ការបាក់ដី និងទឹកជំនន់ជនឡើងពីទន្លេបណ្តាលមកពីភ្លៀងធ្លាក់ខ្លាំងនោះធ្វើឲ្យកាត់ផ្តាច់ផ្លូវថ្នល់ជាច្រើនស្ថិតនៅក្នុងតំបន់ និងធ្វើឲ្យខូចខាតដល់ដីកសិកម្មតាមតំបន់ជ្រលងភ្នំផងដែរ ។ មន្ត្រីអាកាសធាតុអះអាងថា ខ្យល់ព្យុះនេះនឹងអូសបន្លាយពេលវេលាច្រើនថ្ងៃនៅលើដែនកោះ Luzon ដែលមានលំនៅឋានពលរដ្ឋរស់នៅជិត៥០លាននាក់ ។
បើទោះបីខ្យល់ព្យុះនេះមិនបានបក់បោកមកចំលើទីក្រុងម៉ានីលក៏ពិតមែន ប៉ុន្តែភ្នាក់ងារអាកាសធាតុបានព្រមានថា នៅភាគខាងត្បូងទីប្រជុំជននេះនឹងទទួលរងការវាយប្រហារពីខ្យល់ខ្លាំង លាយឡំដោយភ្លៀងធំ ។
ហ្វីលីពីនជារៀងរាល់ឆ្នាំទទួលរងគ្រោះពីខ្យល់ព្យុះប្រមាណ២០ ហើយភាគច្រើនៃខ្យល់ព្យុះនោះសុទ្ធតែមានកម្លាំងខ្លាំងអាចបណ្តាលឲ្យស្លាប់មនុស្ស ៕
ប្រែសម្រួល៖ ថាច់ យ៉ាត
