ភ្នំពេញ៖ តារាសម្តែងប្រមាណជាង២០នាក់បាន ហ្វឹកហាត់ក្បាច់គុនបុរាណខ្មែរមួយចំនួន ប្រយោជន៍ត្រៀមខ្លួនក្នុងការថតខ្សែភាពយន្តខ្នាតធំរបស់ផលិតកម្ម ចក្រវាឡពេជ្រភាពយន្ត គឺរឿង “វិស្សមកាលមរណៈ”។ ខ្សែភាពយន្តដែលមានឈុតឆាកវាយតប់ច្រើននេះនឹងមានការចូលរួមសម្តែងពីតារាប្រុស ស្រីល្បីឈ្មោះជាច្រើន ហើយចាប់ផ្តើមការផលិតនៅចុងខែវិច្ឆិកា ឆ្នាំ២០១៥ ។
តារាសម្តែងប្រុស ស្រីល្បីឈ្មោះដែលចូលរួមហ្វឹកហាត់ជាមួយគ្រូបង្វឹកក្បាច់គុនបុរាណខ្មែរគឺមាន កញ្ញា នីមុនីនាថ អ្នកនាង ឆៃលី ដាឡែន លោក ថៃប៊ុននាង លោក អេឡិច និងតារាសម្តែងជាច្រើនរូបទៀត ។
អ្នកស្រីថុង ស៊ីវទៀង អគ្គនាយិការផលិតកម្ម ចក្រវាឡពេជ្រភាពយន្តបានបញ្ជាក់ថា ក្រោយវិលមកថតខ្សែភាពយន្តជាថ្មីនេះគឺជាលើកទីមួយដែលផលិតកម្មអ្នកស្រីដាក់គម្រោងមួយធំជាមួយនឹងការផលិតខ្សែភាពយន្តដុំខ្នាតធំ ដែលទាំងការចំណាយលើសម្ភារៈបច្ចេកទេសទំនើបជាងមុន ពិសេសគឺមានការចូលរួមសម្តែងពីតារាប្រុស ស្រីល្បីឈ្មោះជាច្រើន។ អ្នកស្រីបញ្ជាក់ថា ដើម្បីធ្វើឲ្យខ្សែភាពយន្តនេះកាន់តែទទួលបានការចាប់អារម្មណ៍អ្នកស្រីបានជួលគ្រូបង្វឹកជំនាញផ្នែកក្បាច់គុនបុរាណខ្មែរមកបង្ហាត់បង្រៀនក្បាច់មូលដ្ឋានមួយចំនួនដល់សិល្បករ។ អ្នកស្រីថា ការហ្វឹកហាត់ទាំងនេះនឹងជួយឲ្យសិល្បករទាំងអស់អាចសម្តែង ពិសេសលេងបានល្អក្នុងឈុតឆាកវាយតប់ដែលការហ្វឹកហាត់នេះមានរយៈពេលជាងមួយខែមុនពេលចេញថតជាផ្លូវការនៅពេលដ៏ខ្លីខាងមុខនេះ ។
តារាសម្តែង ឆៃ លីដាឡែន ដែលកំពុងតែហ្វឹកហាត់ជាមួយនឹងគ្រូបង្វឹកបានឆ្លៀតពេលបញ្ជាក់ថា នេះជាលើកទីមួយដែលនាងបានហ្វឹកហាត់មូលដ្ឋាមួយចំនួននៃក្បាច់គុនបុរាណខ្មែរ។ នាងថា ពិតជាមានការលំបាកខ្លះសម្រាប់ការហ្វឹងហាត់ ប៉ុន្តែ វាបានធ្វើឲ្យនាងដឹងច្រើនអំពីក្បាច់គុន ការលើកជើងទាត់ ធាក់ ការវាយ ហើយក៏មានវិធីសាស្ត្រក្នុងការគេចឬផ្តួលខ្លួនជាដើម។ នាងថាក្បាច់មូលដ្ឋានទាំងនេះនឹងអាចធ្វើឲ្យការសម្តែងរបស់នាងនិងសិល្បករដទៃកាន់តែប្រសើរជាងមុន។
តារាសម្តែងប្រុស ថៃ ប៊ុននាង បញ្ជាក់ថា ជាច្រើនសប្តាហ៍មកហើយដែលលោកនិងសិល្បករជាច្រើនបានចូលរួមហ្វឹកហាត់ជាមួយគ្រូបង្វឹកដែលក្នុងមួយសប្តាហ៍សិល្បករត្រូវធ្វើការហ្វឹកហាត់ចំនួន២ថ្ងៃ ប៉ុន្តែក្រៅពីថ្ងៃហ្វឹកហាត់ជាមួយគ្រូជំនាញសិល្បករកអាចហ្វឹកហាត់ដោយខ្លួនឯងចៀសវាងការភ្លេច ឬការឈឺសាច់ដុំប្រសិនបើខកខានយូរថ្ងៃនោះ។
លោកបញ្ជាក់ថា ក្បាច់វាយតប់ប្លែកក្នុងខ្សែភាពយន្តរឿង “វិស្សមកាលមរណៈ”នេះនឹងកានតែធ្វើឲ្យទស្សនិកជនចាប់អារម្មណ៍ហើយលោករំពឹងថា សិល្បករនឹងធ្វើបានល្អនៅពេលដែលពួកគាត់សម្តែង និងមិនមានកំហុសឆ្គង ។
លោក តាន់ ច័ន្ទកក្កដា គ្រូបង្វឹកមកពីសហព័ន្ធយុទ្ធក្រមក្បាច់គុនបុរាណខ្មែរមហានគរ បានបញ្ជាក់ថាមានក្បាច់ចំហរ និងក្បាច់មូលដ្ឋានមួយចំនួនត្រូវបានបង្រៀនទៅដល់សិល្បករ ហើយក្បាច់ភាគច្រើនគឺសម្រាប់ការសម្តែង ធ្វើយ៉ាងណាកុំឲ្យមានរបួសនៅពេលសម្តែង។ លោកបញ្ជាក់ថា វាគឺជារឿងល្អដែលសិល្បករគួរតែចេះពីក្បាច់គុណបុរាណខ្មែរព្រោះមិនមែនដើម្បីតែការថតសម្តែងទេ ប៉ុន្តែដើម្បីសុខភាព ភាពរហ័សរហួន និងជាមូលដ្ឋានសម្រាប់ពួកគាត់អំពីការលោតហក់ ការផ្តួលខ្លួនជាដើម។
លោកបញ្ជាក់ថា ទោះបីជាការហ្វឹកហាត់បានបញ្ចប់ក្តី លោកនៅតែបន្តតាមដាននៅពេលថតផ្ទាលផងដែរជៀសវាងកំហុសឆ្គងណាមួយ៕
ដោយ៖ វឌ្ឍនា
