ភ្នំពេញ ៖ បុរសម្នាក់ទំនងជាស្រវឹងស្រា បានបើករថយន្តស៊េរីទំនើបយ៉ាងលឿនដូចហោះ ហើយជ្រុលទៅបុកម៉ូតូមួយគ្រឿងដែលជិះដោយបុរសម្នាក់ ហើយផ្លោងទៅបុកជញ្ជាំងថ្ម រួមទាំងប៉ះរថយន្តលុចសុីសមួយគ្រឿងទៀត បណ្ដាលឲ្យរងការខូចខាតយ៉ាងដំណំ ហើយបង្កអោយបុរសម្នាក់ដែលជាម្ចាស់ម៉ូតូ បានស្លាប់បាត់បង់ជីវិតពេលបញ្ចូនទៅដល់មន្ទីពេទ្យ។

ហេតុការណ៍គ្រោះថ្នាក់ចរាចរណ៍ដ៏គួរឲ្យរន្ធត់ខាងលើនេះ បានកើតឡើងនៅវេលាម៉ោង១០និង២០នាទីយប់ ថ្ងៃទី៣១ ខែតុលា ឆ្នាំ២០១៧ នៅចំណុចមុខក្រុមហ៊ុន ស្រាបៀរ អង្គរ តាមបណ្ដោយផ្លូវសហព័ន្ធរុស្សុី ស្ថិតក្នុងសង្កាត់កាកាប ខណ្ឌពោធិ៍សែនជ័យ រាជធានីភ្នំពេញ ។

យោងតាមប្រភពព័ត៌មានពីប្រជាពលរដ្ឋដែលឃើញហេតុការណ៍ខាងលើ បានប្រាប់ឲ្យដឹងថា  មុនពេលកើតហេតុ បុរសរងគ្រោះជិះម៉ូតូម៉ាក វេវ ពណ៌ប្រផេះ ពាក់ស្លាកលេខភ្នំពេញ 1I -6243 បានធ្វើដំណើតាមបណ្ដោយផ្លូវសហព័ន្ធរុស្សុី ទិសដៅពីលិចទៅកើត ក្នុងល្បឿនល្មម ខណៈមកដល់ចំណុចកើតហេតុ ក៏ស្រាប់តែមានរថយន្តស៊េរីទំនើបមួយគ្រឿងម៉ាក ហុីយ៉ាន់ដាយ SONATA ពណ៌ខ្មៅ ពាក់ស្លាកលេខ A T 17 ,2-0483 ដែលបើកបរដោយបុរសម្នាក់ទំនងជាស្រវឹងស្រា បានធ្វើដំណើមកពីក្រោយម៉ូតូរងគ្រោះខាងលើ យ៉ាងលឿនដូចហោះ ហើយជ្រុលទៅបុកម៉ូតូពីក្រោយយ៉ាងពេញទំហឹង បណ្ដាលឲ្យម៉ូតូផ្លោងទៅបុកនិងរថយន្តលុចសុីស RX300 ពណ៌ទឹកប្រាក់ ពាក់ស្លាកលេខភ្នំពេញ2AQ-4521 ដែលចតនៅចញ្ចើមផ្លូវបណ្ដាលឲ្យរថយន្តដាច់ធ្លាក់កាងក្រោយ រងការខូចខាត  ចំណែករថយន្តបង្កនៅមិនទាន់អស់ល្បឿន ក៏ទៅបុកជញ្ចាំងថ្ម បណ្ដាលឲ្យធ្លុះថែមទៀត ដោយរថយន្តបង្កនិងម៉ូតូបានរងការខូចខាតយ៉ាងដំណំ រួមទាំងបង្កឲ្យបុរសម្នាក់ដែលជាម្ចាស់ម៉ូតូស្លាប់ពេលបញ្ចូនទៅដល់មន្ទីពេទ្យ បន្ទាប់ពីក្រុមគ្រូពេទ្យខិតខំជួយសង្គ្រោះដែរ។

ក្រោយពេលកើរហេតុភ្លាមៗ ម្ចាស់រថយន្តបង្ក ត្រូវបានសមត្ថកិច្ចមូលដ្ឋានចុះមកឃាត់ខ្លួននៅនិងកន្លែងកើតហេតុ ហើយយកជនបង្កទៅប៉ុស្ដិ៍នគរបាលរដ្ឋបាល កាកាប ផងដែរ។ បន្ទាប់ក្រោយមក សមត្ថកិច្ចមូលដ្ឋានបានចុះមកដល់កន្លែងកើតហេតុ ហើយធ្វើការវាស់វែង យករថយន្តបង្កនិងម៉ូតូ ទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រង់ចាំដោះស្រាយគ្នាតាមផ្លូវច្បាប់។ ចំណែកសពជនរងគ្រោះ ត្រូវបានក្រុមគ្រូពេទ្យខាងសង្គ្រោះបន្ទន់ទាក់ទៅសាច់ញាតិឲ្យមកទទួល យកទៅធ្វើបុណ្យតាមប្រពៃណី ៕សុខាសែនជ័យ