ភ្នំពេញ៖ ស្ត្រីម្នាក់បានរងរបួសយ៉ាងដំណំក្រោយពីជនសង្ស័យបានធ្វើសកម្មភាពឆក់យកកាបូបបានសម្រេចបណ្តាលអោយដួលរួចជនសង្ស័យបានជិះគិចខ្លួនបបាត់។
ហេតុការណ៍នេះបានកើតឡើងកាលពីម៉ោង១០និង៣០នាទីព្រឹកថ្ងៃទី០៧ វិច្ឆិការ ឆ្នាំ២០១៧នៅលើកំណាត់ផ្លូវសម្តេចជាស៊ីម ភូមិច្រេស សង្កាត់គោកឃ្លាង ខណ្ឌសែនសុខរហូតដល់ម៉ោង១៦និង៣០នាទីល្ងាចថ្ងៃដដែលទើបមកប៉ុស្តិ៍ដើម្បីដាក់ពាក្យបណ្តឹង។
ស្ត្រីរងគ្រោះឈ្មោះ ប៉ែន ស្រីធំ អាយុ៣៦ឆ្នាំមុខរបរអនុប្រធានភូមិគង្គាផុសនិងស្នាក់នៅផ្ទះលេខ១៨៤ផ្លូវលំភូមិគង្គាផុស សង្កាត់ទួលសង្កែខណ្ឌឫស្សីកែវ។
តាមសំដីស្ត្រីខាងលើបានប្រាប់សមត្ថកិច្ចថាមុនកើតហេតុគាត់បានជិះម៉ូតូមួយគ្រឿងម៉ាកស្កូបពីពណ៌ក្រហមលាយសចេញពីផ្ទះដោយដឹកស្ត្រីម្នាក់ទៀតឈ្មោះ ស្រ៊ុន ស៊ីថា អាយុ៤២ឆ្នាំ
គោលបំណងទៅយកប្លង់ដីនៅសង្កាត់សំរោងក្រោមខណ្ឌពោធិ៍សែនជ័យ ខណះជិះមកដល់ចំណុចខាងលើស្រាប់តែមានជនសង្ស័យម្នាក់ជិះមូតូមួយគ្រឿងមិនចាំម៉ាកមិនចាំស្លាកលេខជិះមកពីក្រោយហើយធ្វើសកម្មភាពឆក់យកកាបូបស្ពាយដែលគាត់បានដាក់ពាក់ជាប់ក្បាលម៉ូតូបានសម្រេចធ្វើអោយគាត់ដួលម៉ូតូរងរបួសរលាត់ដៃរលាត់ជើងហើយជនសង្ស័យបានជិះគេចខ្លួនដោយសុវត្ថភាព។ក្រោយហេតុការណ៍កើតឡើងគាត់មិនបានមកដាក់ពាក្យបណ្តឹងទេដោយមានការភិតភ័យនៅឡើយលុះដល់ល្ងាចថ្ងៃដដែលទើបមកប៉ុស្តិ៍នគរបាលរដ្ឋបាលគោកឃ្លាងដើម្បីដាក់ពាក្យបណ្តឹង។
ស្ត្រីរងគ្រោះបានប្រាប់សមត្ថកិច្ចថានៅក្នុងកាបូបដែលចោរឆក់យកទៅនោះមាន ទូរស័ព្ទដៃចំនួន២គ្រឿង ខ្សែដៃមាសទម្ងន់៥ជី
១ខ្សែ ខ្សែដៃស្លាកទីនទម្ងន់៥ជី១ខ្សែ អត្តសញ្ញាណប័ណ្ណសញ្ញាតិខ្មែរមួយសន្លឹក និងឯកសារមួយចំនួនទៀត៕ ដោយ៖ តុង សីហា
