ចាប់តាំងពីថ្ងៃតី១៩ ខែតុលា សាលារៀនជាច្រើននៅក្នុងខេត្តមួយចំនួន ក៏ដូចជានៅទីក្រុងគូឡាឡាំពួរ ប្រទេសម៉ាឡេស៊ី ត្រូវបានបិទទ្វារជាបណ្តោះអាសន្នដោយសារតែផ្សែងអ័ព្ទធូលីគ្រប់ដណ្តប់សារជាថ្មី ដោយសារតែភ្លើងឆេះព្រៃនៅឥណ្ឌូនេស៊ី ។
មកទល់ពេលនេះ មាន១៦តំបន់ដែលមានកម្រិតបរិយាកាសកខ្វក់ គិតតាមរង្វាស់(API)ជាកម្រិតប៉ះពាល់ដល់សុខភាពមនុស្ស ក្នុងនោះមានទីក្រុងគូឡាឡំពួរ និងទីក្រុង Putrajaya មានកម្រិត API រហូតដល់១១៦ និងមានគម្រោងកើនឡើងថែមទៀត ។ តួលេខ API ចាប់ពី០ដល់៥០ ជាកម្រិតល្អ ពី ៥១ដល់១០០ ជាកម្រិតមធ្យម ពី១០១ដល់២០០ អាចប៉ះពាល់ដល់សុខភាព ពី២០១ដល់៣០០ ប៉ះពាល់ដល់សុខភាពយ៉ាងខ្លាំងជាកម្រិតគ្រោះថ្នាក់បំផុត ។
កាលពីដើមខែតុលានេះ សាលារៀនជាច្រើនក្នុងប្រទេសម៉ាឡេស៊ី ក៏ត្រូវបិទទ្វាររយៈពេលពីរថ្ងៃ ដោយសារតែផលប៉ះពាល់នៃភ្លើងឆេះព្រៃក្នុងប្រទេសឥណ្ឌូនេស៊ីអូសបន្លាយរយពេលជាង១ខែកន្លងមកហើយ។ ស្ថានភាពផ្សេងអ័ពធូលីកើតឡើងជារៀងរាល់ឆ្នាំ ប៉ុន្តែឆ្នាំនេះ មានសភាពធ្ងន់ជាងមុន បណ្តាលមកពីស្ថានភាពអាកាសធាតុ El Nino ។
តាមការប្រកាសរបស់ក្រសួងធនធានធម្មជាតិ និងបរិស្ថានម៉ាឡេស៊ីបានបញ្ជាក់ថា ស្ថានភាពបរិយាកាសកខ្វក់កាន់តែអាក្រក់ទៅដោយសារតែខ្យល់ប្តូរទិសដៅបណ្តាលមកពីឥទ្ធិពលនៃខ្យល់ព្យុះ ពីរផ្សេងគ្នាគឺព្យុះ Koppu និង champi កំពុងតែវាយប្រហារនៅមហាសមុទ្រប៉ាស៊ីហ្វិក ។ ខ្យលព្យុះនោះអូសបន្លាយរហូតដល់ទៅថ្ងៃ២១ ខែតុលា ៕
ប្រែសម្រួល៖ ម៉ែវ សាធី
