ខេត្តកំពង់ស្ពឺ៖ យ៉ាងហោចណាស់មនុស្សម្នាក់បានស្លាប់ភ្លាមៗនៅកន្លែងកើតហេតុ និងច្រើននាក់ទៀតរងរបួសធ្ងន់ ស្រាលត្រូវបានបញ្ជូនទៅសង្គ្រោះនៅមន្ទីរពេទ្យ បន្ទាប់ពីជួបគ្រោះថ្នាក់ចរាចរណ៍រថយន្តកុងតឺន័របុករថយន្តទួរីសដឹកកម្មករកាត់ដេរ ។
ហេតុការណ៍នេះបានកើតឡើងកាលពីវេលាម៉ោង៦និង៥៩នាទីព្រឹក ថ្ងៃទី២០ ខែតុលា ឆ្នាំ២០១៥ ស្ថិតក្នុងភូមិសំណង់ សង្កាត់រកាធំ ក្រុងច្បារមន ខេត្តកំពង់ស្ពឹ ។
សេចក្តីរាយការណ៍បានបញ្ចាក់ថា រថយន្តបង្កម៉ាកហ៊ីយ៉ាន់ដា ពាក់ស្លាកលេខ ព្រះសីហនុ 3A-1703 អ្នកបើកបរមិនស្គាល់អត្តសញ្ញាណ ក្រោយកើតហេតុបានគេចខ្លួនបាត់ ។ ចំណែកភាគីម្ខាងទៀត រថយន្តម៉ាកទួរីស ពណ៌ប្រផេះ ពាក់ស្លាកលេខ ភ្នំពេញ 2G-6140 ជារថយន្តដឹកកម្មកររោងចក្រកាត់ដេរ អ្នកបើកបរមិនទាន់ស្គាល់អត្តសញ្ញាណនៅឡើយ ។
ប្រភពសាក្សីនៅកន្លែងកើតហេតុបានឲ្យដឹងថា មុនពេលកើតហេតុ រថយន្តកុងតឺន័រ បើកបរក្នុងទិសដៅពីកើតទៅលិច លុះមកដល់ចំណុចកើតហេតុ បានរេចង្កូតទៅបុករថយន្តទួរីសដែលធ្វើដំណើរបញ្ច្រាស់ទិសគ្នា បណ្តាលឲ្យមានមនុស្សម្នាក់ស្លាប់នៅនឹងកន្លែង ហើយច្រើននាក់ទៀតរងរបួសធ្ងន់ ស្រាល ។ ក្រោយកើតហេតុសមត្ថកិច្ចបានចុះទៅអន្តរាគមន៍បញ្ជូនជនរងគ្រោះទៅកាន់មន្ទីរពេទ្យដើម្បីសង្គ្រោះ ចំណែកសពដែលស្លាប់ក្នុងឧប្បត្តិហេតុនេះ សមត្ថកិច្ចបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ។
សពមានត្រូវបានស្គាល់ឈ្មោះ សៀត សំបូរ ភេទស្រី អាយុ៣០ឆ្នាំ មានទីលំនៅភូមិត្រពាំងត្រង់ ឃុំស្គុះ ស្រុកសំរោងទង ខេត្តកំពង់ស្ពឺ ។
ប្រភពពីសមត្ថកិច្ចបានឲ្យដឹងថា ក្រុមកម្មករដែលរងគ្រោះក្នុងឧប្បត្តិហេតុនេះ បម្រើការងារនៅរោងចក្រស្បែកជើង ចេណឺរេហ្សិន ថ្នល់ទទឹង និងមានទីលំនៅឃុំស្គុះ ស្រុកសំរោងទងទាំងអស់គ្នា ។
ប្រភពបន្តថា ក្រោយបញ្ជូនជនរងគ្រោះទៅកាន់មន្ទីរពេទ្យដើម្បីសង្គ្រោះហើយ សមត្ថកិច្ចបានវាស់វែងនៅកន្លែងកើតហេតុ និងធ្វើកំណត់ហេតុយកវត្ថុតាងទាំងពីរទៅរក្សាទុកនៅការិយាល័យនគរបាលចរាចរណ៍ខេត្ត ដើម្បីរង់ចាំស្រាវជ្រាវរកម្ចាស់(ថៅកែ)រថយន្តបង្កឲ្យមកដោះស្រាយជូនជនរងគ្រោះតាមផ្លូវច្បាប់ ។
បើតាមសមត្ថកិច្ចបានបញ្ជាក់ថា ជនរងគ្រោះបានស្លាប់បន្តបន្ទាប់មកទៀតរហូតដល់៣នាក់ ៕
ដោយ៖ សេនាស័ក្តិ
