ខេត្តពោធិ៍សាត់ ៖ កម្លាំងមូលដ្ឋានកងរាជអាវុធហត្ថស្រុកភ្នំក្រវាញ សហការជាមួយកម្លាំងកងរាជអាវុធហត្ថលើផ្ទៃប្រទេស ចុះបង្រ្កាបបទល្មើសព្រៃឈើ និងការដឹកជញ្ជូនផលអនុផលព្រៃឈើ ។ លទ្ធផលឃាត់ចាប់បានរថយន្តដឹកជញ្ជូនឈើ ១គ្រឿង រួមទាំងអ្នកបើកបរ ប្រគល់ឲ្យមន្រ្តីជំនាញរដ្ឋបាលព្រៃឈើចាត់ការបន្តតាម នីតីវិធី ។
ប្រតិបត្តិការខាងលើធ្វើឡើងកាលពីវេលាម៉ោង៨ និង៤០នាទីព្រឹក ថ្ងៃទី០៨ ខែវិច្ឆិកា ឆ្នាំ២០១៧ នៅលើកំណាត់ផ្លូវជាតិលេខ៥៥ ត្រង់ចំណុចវាលនិន្រ្ទា ស្ថិតក្នុងភូមិព្រែក១ ឃុំសំរោង ស្រុកភ្នំក្រវាញ ខេត្តពោធិ៍សាត់។
ប្រភពព័ត៌មានពីកងកម្លាំងកងរាជអាវុធហត្ថដែលបានចុះក្នុងកិច្ចប្រតិបត្តិការងារនេះផ្ទាល់បានឲ្យដឹងថា ជាលទ្ធផលកម្លាំងបានធ្វើការឃាត់ចាប់បានរថយន្តដឹកឈើពេញចំនួន ១គ្រឿងម៉ាក កាមរី គូថហើម ចង្កូតឆ្វេង សេរីឆ្នាំ១៩៩៣ ពណ៏ស្លែ ពាក់ស្លាកលេខ បាត់ដំបង 2A 0716 រួមអ្នកបើកបរម្នាក់ឈ្មោះ ឈុន ចំរើន(ហៅម៉ៅ) ភេទប្រុស អាយុ ៥៣ឆ្នាំ ជនជាតិខ្មែរ បច្ចុប្បន្ន រស់នៅភូមិកណ្ដាល ឃុំអន្លង់រាប ស្រុកវាលវែង ខេត្តពោធិ៍សាត់។
ប្រភពព័ត៌មានខាងលើបន្តទៀតថា រថយន្តដឹកជញ្ជូនផលអនុផលព្រៃឈើជាឈើប្រភេទប្រណិង(ធ្នង់)មានចំនួន ៣៦ដុំ មានទម្ងន់ចំនួន ៧៤៥គីឡូក្រាម ស្មើរនឹងចំនួន ០,៦៧៧ម៉្រែត្រត្រីគុណ ហើយការបង្រ្កាបបទល្មើសព្រៃឈើ និងការដឹកជញ្ជូនផលអនុផលព្រៃឈើបានជាលទ្ធផលនេះដែរ ក៍មានការអន្តរាគមន៍ពីលោក អភិបាលខេត្តពោធិ៍សាត់ផងដែរ ដោយសុំឲ្យសម្របសម្រួលយកតែវត្ថុតាងទៅបានហើយ ចំពោតះមធ្យោបាយដឹកជញ្ជូន(រថយន្ត)ប្រគល់ឲ្យម្ចាស់គាត់វិញទៅ ដោយគ្រាន់តែធ្វើការអប់រំឬធ្វើកិច្ចសន្យាលាយលាក់ជាអក្សទៅបានហើយ បញ្ហានេះក៍បានឆ្លងមត្តិយោបល់ដល់ថ្នាក់លើ ទើបបានប្រគល់វត្ថុតាងទាំង(រថយន្តទាំងឈើ រួមអ្នកបើកបរ)ឲ្យទៅមន្រ្តីជំនាញរដ្ឋបាលព្រៃឈើ នៃផ្នែករដ្ឋបាលរដ្ឋបាលព្រៃឈើក្រវាញបន្តនីតិវិធី។
បញ្ញាខាងលើនេះដែរ៖ លោក ហង្ស វណ្ណថន នាយរង និងជានាយផ្នែករដ្ឋបាលព្រៃឈើស្ដីទី នៃផ្នែករដ្ឋបាលព្រៃឈើក្រវាញ បានឲ្យអ្នកសារព័ត៌មានដឹងតាមទូរស័ព្ទនាព្រឹក ថ្ងៃទី០៩ ខែវិច្ឆិកា ឆ្នាំ២០១៧នេះថា ចំពោះវត្ថុតាងឈើប្រភេទប្រណិត(ធ្នង់)បានដាក់ចូលឃ្លាំងរក្សាទុករួចរាល់ហើយ ចំណែកមធ្យោបាយដឹកជញ្ជូន(រថយន្ត)មិនទាន់ប្រគល់ឲ្យម្ចាស់គាត់នៅឡើយនោះទេ រងចាំលិខិតស្នាម និងឯកសាផ្សេងៗពាក់ព័ន្ធរថយន្ត ម្យ៉ាងវិញមួយទៀតនោះពុំទាន់ឃើញមានការចាត់ពីថ្នាក់ដឹកនាំរបស់លោកនៅឡើយនោះដែរ ៕ បឹុម ពិន
