ភ្នំពេញ៖ បុរសម្នាក់មានជំងឺប្រចាំកាយបានធាក់កង់ឡើងស្ពានជ្រោយចង្វា រួចលោតចូលទៅក្នុងទន្លេ ដើម្បីសម្លាប់ខ្លួន តែមិនស្លាប់ ត្រូវបានបងប្អូនខ្មែរឥស្លាមចេញទូកជួយស្រង់ឡើងគោកវិញ ។
ហេតុការណ៍បង្កឲ្យមានការភ្ញាក់ផ្អើលឡើងកាលពីម៉ោងជិត១២ថ្ងៃត្រង់ ថ្ងៃទី២០ ខែតុលា ឆ្នាំ២០១៥ នៅចំណុចលើស្ពានជ្រោយចង្វាចាស់ ស្ថិតក្នុងក្រុម២ ភូមិដើមគរ សង្កាត់-ខណ្ឌជ្រោយចង្វា ។
បុរសដែលមកលោតទឹកសម្លាប់ខ្លួនខាងលើមានឈ្មោះគង់ ច័ន្ទសី អាយុ៣៧ឆ្នាំ មានមុខរបរជាអ្នកជួយរៀបរថយន្ត និងម៉ូតូនៅហាងគុយទាវផ្សារចាស់រស់នៅជាមួយម្ដាយ និងមានប្រពន្ធឈ្មោះ ប៉ុល ទឿ អាយុ៣៥ឆ្នាំ មានមុខរបរនៅផ្ទះ មានកូនប្រុសស្រីចំនួន២នាក់ ស្នាក់នៅខាងក្រោមស្ពានជ្រោយចង្វាភូមិដើមគ សង្កាត់-ខណ្ឌជ្រោយចង្វា ។
ស្ត្រីជាប្រពន្ធបុរសដែលលោតទឹកសម្លាប់ខ្លួនបានឲ្យដឹងថា ប្ដីរបស់គាត់កាលពីអំឡុង២ខែមុនបានស្រវឹងស្រាធ្លាក់ពីលើផ្ទះបាក់ឆ្អឹងខ្នង និងត្រូវបានចេញពីមន្ទីរពេទ្យសម្រាកព្យាបាលរយៈពេល២ខែប៉ុណ្ណោះហើយបន្តហូបស្រាជារៀងរាល់ថ្ងៃ ជាពិសេសទៅទៀតនោះប្ដីរបស់គាត់មានជំងឺសរសៃប្រសាទប្រចាំកាយថែមទៀតផង ។
ប្រពន្ធបន្តថា ប្តីរបស់កាលពីពេលកន្លងមកបានព្យាយាមសម្លាប់ខ្លួន៣ដងរួចមកហើយ តែមិនស្លាប់ នេះជាលើកទី៤ហើយតែមិនស្លាប់ដូចបំណងនោះទេ។
សមត្ថកិច្ចនគរបានប៉ុស្តិ៍បានឲ្យដឹងដែរថា ក្រោយពេលស្រង់មកដល់លើគោក បានធ្វើការណែនាំអប់រំបុរសដែលលោតទឹកសម្លាប់ខ្លួនកុំឱ្យគិតខ្លីអ៊ីចឹងទៀត រួចឱ្យប្រពន្ធកូននាំត្រឡប់ទៅផ្ទះវិញ ៕
ដោយ៖ ជ្រោយពេជ្រ
