ខេត្តបន្ទាយមានជ័យ៖ អ្នកជិះម៉ូតូ២នាក់ត្រូវរថយន្តដឹកអន្ទង់បុកស្លាប់ ក្រោយពីបញ្ចូនទៅដល់មន្ទីរពេទ្យ ខណៈជនរងគ្រោះជិះម៉ូតូឌុបគ្នានៅលើកំណាត់ផ្លូវជាតិលេខ៥ ។
កាលពីវេលាម៉ោង៨យប់ ថ្ងៃទី១៩ ខែតុលា ឆ្នាំ២០១៥ នៅចំណុចភូមិសាលាដែង ឃុំប្ញស្សីក្រោក ស្រុកមង្គលបុរី ខេត្តបន្ទាយមានជ័យ ។ ក្រោយពីកើតហេតុនោះភ្លាមកម្លាំងនគរបាលចរារចរណ៍ស្រុកមង្គលបុរីបានចុះទៅដល់ទីកើតហេតុ ក៏ប៉ុន្តែអ្នកបើករថយន្តបង្ក បានរត់គេចខ្លួនបាត់ទៅហើយបន្ទាប់ពីបង្កហេតុរួចហើយនោះ។
ជនរងគ្រោះមានឈ្មោះ ពៅ រិទ្ធ ភេទប្រុស អាយុ១៨ឆ្នាំ រស់នៅភូមិនាង កេត ឃុំប្ញស្សីក្រោក ស្រុកមង្គលបុរី ដែលជាអ្នកបើកម៉ូតូម៉ាកហុងដាសេ១២៥ ពណ៌ខ្មៅ សេរី ឆ្នាំ២០១៤ គ្មានស្លាកលេខនិងអ្នករួមដំណើរមានឈ្មោះ រ៉ាន់ សីហា ភេទ ប្រុស អាយុ២០ឆ្នាំ រស់នៅភូមិឃុំជាមួយគ្នា។
ជុំវិញបញ្ហាគ្រោះថ្នាក់ចរាចរណ៍ខាងលើបើតាមប្រភពព័ត៌មានពី លោកវរសេនីយ៍ទោស៊ី ឌី អធិការនគរបាល ស្រុក មង្គលបុរីប្រាប់ឱ្យដឹងថា មុនពេលកើតហេតុមានរថយន្ត១គ្រឿម៉ាកកូរ៉ូឡាពណ៌ខ្មៅ ពាក់ស្លាក លេខភ្នំពេញ ២M ៣៩៤២ អ្នកបើកបរមិនស្គា់អត្តសញ្ញាណ ក្នុងរថយន្តដឹកផ្ទុកអន្ទង់ បានបើកបរយ៉ាងលឿន ក្នុងទិសដៅពីលិចទៅកើត លុះមកដល់ចំណុចកើតហេតុបានបើកប្រជែងរថយន្ត១គ្រឿងទៀត ហើយជ្រុលទៅបុកខាងស្តាំដៃជនរងគ្រោះកំពុងជិះម៉ូតូក្នុងទិសដៅច្រាសទិសគ្នា បណ្តាលឱ្យជនរងគ្រោះទាំង២នាក់ទទួលរងរបួសធ្ងន់។រីឯរថយន្តវិញបានជ្រុលទៅក្រឡាប់ចូលប្រឡាយទឹកខាងឆ្វេងដៃធ្លាយចេញសុទ្ធអន្ទង់ចូលប្រឡាយទឹកនោះ។ក្រោយពីកើតហេតុ កម្លាំងនគរបាលចរាចរស្រុកមង្គលបុរីបានចុះមកដឹកជនរងគ្រោះទាំង២នាក់ទៅដល់មន្ទីរពេទ្យ ហើយជនរងគ្រោះក៏ដាច់ស្លាប់ទាំង២នាក់តែម្តង។ សាកសពជនរងគ្រោះបន្ទាប់មកត្រូវបានសមត្ថកិច្ចទំនាក់ទំនងក្រុមគ្រួសារមកទទួលយកសពដើម្បីយកទៅចាត់ចែងធ្វើបុណ្យតាមប្រពៃណី។
បើតាមប្រភពព័ត៌មានដដែលប្រាប់ឱ្យដឹងទៀតថា គ្រោះថ្នាក់ចរាចរណ៍ខាងលើ សមត្ថកិច្ចអះអាងថាបង្កឡើងដោយរថយន្តបើកប្រជែងមិនប្រុងប្រយ័ត្ន ។ រថយន្តនិងម៉ូតូជនរងគ្រោះ ក្រោយពីសមត្ថកិច្ចវាស់វែងរួចហើយស្ទូចយកមករក្សាទុកនៅអធិការដ្ឋាននគរបាលស្រុក មង្គលបុរី ដើម្បីទុកចាត់ការតាមផ្លូវច្បាប់ ៕
ដោយ៖ សំ វិច្ឆិកា
