ភ្នំពេញ៖រឿងក្តីកូនប្រុសនាយហុងដានិងសង្សារ សម្លាប់ប្រពន្ធក្រោយនាយហុងដា ពុំត្រូវបានសាលាដំបូងរាជធានីភ្នំពេញ នៅរសៀលថ្ងៃទី១៤ ខែវិច្ឆិកា នេះ កាត់ទោសទេ ដោយសារតែលោក សួស ចិន្ដា មេធាវីការពារក្ដីជនជាប់ចោទ ជាប់បំពេញបេសកកម្មតាមខេត្ត ។ តុលាការនឹងកំណត់ពេលសវនាការម្តងទៀត នៅពេលក្រោយ ។
ប្រភពព័ត៌មានបញ្ជាក់ថា កូនប្រុសនាយហុងដា ឈ្មោះ ខា សុខេន ហៅ និច អាយុ១៨ឆ្នាំ និង សង្សារឈ្មោះ សេត រស្មីកន្និកា អាយុ១៧ឆ្នាំ ត្រូវបានតុលាការចោទប្រកាន់ពីបទ ឃាតកម្ម តាមមាត្រា១៩៩នៃក្រមព្រហ្មទណ្ឌ ដែលអាចប្រឈមមុខជាប់ពន្ធនាគារពី១០ឆ្នាំទៅ១៥ឆ្នាំ ពាក់ព័ន្ធការសម្លាប់ប្រពន្ធក្រោយនាយហុងដា ។
ពួកគេទាំងពីរនាក់ ត្រូវបានកម្លាំងការិយាល័យព្រហ្មទណ្ឌកងរាជអាវុធហត្ថរាជធានីភ្នំពេញ សហការជាមួយកម្លាំងកងរាជអាវុធហត្ថខណ្ឌដង្កោ និង ខណ្ឌជ្រោយចង្វារ ឃាត់ខ្លួនកាលពីថ្ងៃទី១២ ខែឧសភា ឆ្នាំ២០១៧ ។
របាយការណ៍សមត្ថកិច្ច បង្ហាញថា ឈ្មោះ ខា សុខេនបានសារភាពថា រូបគេពិតជាបានធ្វើសកម្មភាពសម្លាប់ម្តាយចុងឈ្មោះ ស៊ឹម ចន្ធី អាយុ១៩ឆ្នាំ ពិតប្រាកដមែន គឺធ្វើសកម្មភាព តែម្នាក់ឯង កាលពីយប់ថ្ងៃទី១០ ខែឧសភា ឆ្នាំ២០១៧ នៅបន្ទប់ខុនដូ របស់ឪពុកបង្កើត គឺ នាយហុងដា ។ ក្រោយពេលសម្លាប់រួច សង្សាររបស់ខ្លួនមកពី ធ្វើការវិញទាន់ ខ្លួនក៏បានអង្វរសង្សារ កុំឱ្យឆោឡោ និងជួយយកភួយ មករុំសព អូសទៅទុក នៅបន្ទប់ទឹក ព្រមទាំង ដោះយកកងដៃ២១កង ជញ្ជៀន១វង់ ទូរស័ព្ទមួយគ្រឿង និងម៉ូតូមួយគ្រឿង ចាកចេញតែម្តង ដែលរឿងនេះបានបង្កឱ្យមានការភ្ញាក់ផ្អើល ពេញផ្ទៃប្រទេសពិសេស បណ្តាញសង្គមហ្វេសប៊ុក ។
ឈ្មោះសុខេនបានរៀបរាប់ថា រូបគេបានមករស់នៅ ខុនដូជាមួយឪពុក និងម្តាយចុង ប្រហែល៤ ទៅ៥ខែមកហើយ ព្រោះម្តាយបង្កើតឈ្មោះ រ៉េន សុធារី ហៅឃ្មឹបដែលត្រូវជាប្រពន្ធមុនរបស់នាយហុងដា មានប្តីថ្មី។ ក្នុងពេលមករស់នៅ ជាមួយឪពុក ឈ្មោះសុខេន បាននាំសង្សារឈ្មោះ នេត រស្មីកន្និកា មកនៅជាមួយ ហើយ ខ្លួនមិនសូវចូលចិត្ត ម្តាយចុងទេ ដោយសារនៅពេល ដែលឪពុកខ្លួន មិននៅផ្ទះ ម្តាយចុងតែងតែជេរ និងស្តីបន្ទោស ឱ្យខ្លួនជាញឹកញាប់ ធ្វើឱ្យខ្លួនមានគំនុំ មករហូត។
ក្រោយពេលសម្លាប់ ម្តាយចុងរួចហើយ ឈ្មោះសុខេនបានទៅសម្រាកនៅផ្ទះ ម្តាយសង្សារ ១យប់ នៅខណ្ឌឬស្សីកែវ លុះព្រឹកឡើង ទើបនាំសង្សាមកដេក ស្នាក់នៅជក់ថ្នាំញៀននៅចំណុចផ្ទះគ្មានលេខ ភូមិ១ សង្កាត់ជ្រោយចង្វា ខណ្ឌជ្រោយចង្វា រីឯគ្រឿងអលង្ការ ដែលរូបគេប្លន់បាន យកទៅបញ្ចាំបាន ៤ម៉ឺនរៀល ព្រោះអ្នកបញ្ចាំប្រាប់ថា កាឡៃ ហើយម៉ូតូបញ្ចាំបាន១០០ដុល្លារ រួចយកលុយទាំងនោះទិញថ្នាំញៀនប្រើប្រាស់ ៕
ដោយ៖ ចេស្តា
