ខេត្តក្រចេះ ៖ ព្រះសង្ឃ៨៥អង្គ ដែលគង់នៅវត្តសសរ១០០ ស្ថិតនៅភូមិសំបូរ ឃុំសំបូរ ស្រុកសំបូរ ខេត្តក្រចេះ បានពុលចង្ហាន់ពេលព្រឹក (អាហារត្រីខ) នៅព្រឹកថ្ងៃទី១៥ ខែវិច្ឆិកា ឆ្នាំ២០១៧ ហើយត្រូវបានអាជ្ញាធរមូលដ្ឋាន និងប្រជាពលរដ្ឋដឹកទៅកាន់មន្ទីរពេទ្យជាបន្តបន្ទាប់។
អធិការរងនគរបាលស្រុកសំបូរ លោក នួន សារិន បានឲ្យដឹងថា ហេតុការណ៍នេះ បានកើតឡើង នៅពេលព្រះសង្ឃឆាន់អាហាពេលព្រឹក ហើយមានព្រះសង្ឃចំនួន៨៥អង្គ មានអាការៈ វិលមុខ ឈឺព្រះកេស ធីងធោង ក្អួតចង្អោរ។ ក្រោយកើតហេតុនេះភ្លាម ព្រះសង្ឃរងគ្រោះ ត្រូវបានអាជ្ញាធរដែនដី និងប្រជាពលរដ្ឋក្នុងភូមិដឹកយកទៅសម្រាកព្យាបាលនៅមណ្ឌលសុខភាព ស្រុកសំបូរ ហើយព្រះសង្ឃដែលមានអាការៈធ្ងន់ធ្ងរ មានចំនួន៣៥អង្គ ក្រៅពីនេះស្រាលទេ ។
ទាក់ទិននឹងការពុលអាហារនេះ បុរសជាចុងភៅប្រចាំ វត្តសសរ១០០ បានប្រាប់សមត្ថកិច្ចថា ពួកគេបានទិញត្រីគល់ព្រិច ត្រីលលកស និងត្រីសំបកស្រឡៅនៅផ្សារសំបូរ យកទៅខធ្វើជាចង្ហាន់សម្រាប់ប្រគេនព្រះសង្ឃឆាន់ពេលព្រឹក ។ លុះពេលព្រះសង្ឃឆាន់រួច ស្រាប់តែមានអាការៈវិលមុខ ឈឺព្រះកេស ធីងធោង ក្អួតចង្អោរ ទើបសង្ស័យថា ពុលត្រីទាំងនោះតែម្តង ។
យ៉ាងណាក្រុមគ្រូពេទ្យ កំពុងដុតដៃដុតជើងព្យាបាលប្រគនដល់ព្រះសង្ឃទាំងនោះឲ្យបានធូរស្រាលច្រើនហើយ ខណៈមន្រ្តីជំនាញកំពុងធ្វើការស្រាវជ្រាវយកអាហារទាំងនោះ យកទៅពិសោធន៍រកជាតិពុលចេញពីអាហារទាំងនោះ ៕
