ភ្នំពេញ៖ គ្រោះថ្នាក់ចរាចរណ៍ដ៏រន្ធត់បង្កឡើងដោយសារតែរថយន្តហ៊ីណូ អ្នកបើកបរស្រវឹងបើកក្នុងល្បឿនលឿនជ្រុលទៅបុកនឹងឃឿនពុះចែកទ្រូងផ្លូវ ហោះទៅបុកម៉ូតូហុងដាសេ១២៥មួយគ្រឿងទៀត បណ្តាលឲ្យបុរស២នាក់ស្លាប់ (ម្ចាក់ដាច់ខ្លួនជា២)យ៉ាងអាណោចអាធ័ម ហើយរថយន្តបង្កនៅមិនទាន់អស់ល្បឿនបន្តទៅបុករបងថ្មរបស់ផែស្ងួតសូងួនបណ្តាលឲ្យធ្លាយទៅម្ខាង ។
ហេតុការណ៍នេះ បានកើតឡើងកាលពីវេលាម៉ោង៨និង៤០នាទីយប់ ថ្ងៃទី២១ ខែតុលា ឆ្នាំ២០១៥ នៅចំណុចមុខក្រុមហ៊ុនផែស្ងួតសូងួន តាមបណ្តោយផ្លូវវេងស្រេង ភូមិចោមចៅ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
ជនរងគ្រោះដែលស្លាប់ឈ្មោះ យ៉ាន់ សុភក្តិ ភេទប្រុស អាយុ៣៣ឆ្នាំ មានស្រុកកំណើតនៅភូមិក្តាមហា ឃុំឈួកខ្សាច់ ស្រុកបារាយណ៍ ខេត្តកំពង់ធំ ។ ចំណែកម្នាក់ទៀត នៅមិនស្គាល់ឈ្មោះនៅឡើយទេ ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុ គេបានឃើញបុរស២នាក់ជិះម៉ូតូហុងដា សេ១២៥ សេរី ឆ្នាំ២០១០ ពណ៌ខ្មៅ ធ្វើដំណើរតាមបណ្តោយផ្លូវវេងស្រេង ក្នុងទិសដៅពីកើតទៅលិច ខណៈមកដល់ចំណុចកើតហេតុ ស្រាប់តែមានរថយន្តហ៊ីណូ ពណ៌សលាយខៀវ ពាក់ស្លាកលេខ ភ្នំពេញ 3A-2287 បើកបរដោយបុរសម្នាក់ស្រវឹងស្រាជោកជាំ ធ្វើដំណើរបញ្ច្រាស់ទិសគ្នាជាមួយម៉ូតូក្នុងល្បឿនលឿនបានជ្រុលបុកឃឿនផ្លូវពេញទំហឹង ហោះទៅបុកម៉ូតូអូសបណ្តាលឲ្យអ្នកជិះម៉ូតូស្លាប់ភ្លាមៗទាំង២នាក់ (ម្នាក់ដាច់ខ្លួនចេញជា២) ហើយរថយន្តបង្កនៅមិនទាន់អស់ល្បឿន ក៏បន្តទៅបុក នឹងរបងរបស់ក្រុមហ៊ុនផែស្ងួតសូងួនធ្លាយទៅម្ខាងទៀត ទើបទៅមុខលែងរួច រីឯម៉ូតូរងការខូចខាតទាំងស្រុងតែម្តង ។
សាក្សីដដែលបានបន្តថា បន្ទាប់ពីបង្កគ្រោះថ្នាក់រួច តៃកុងរថយន្តបង្កបានបើកទ្វារចុះពីលើរថយន្តហើយរត់គេចខ្លួនបាត់ស្រមោល ដោយបន្សល់ទុករថយន្តនៅកន្លែងកើតហេតុ ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ចំណុចកើតហេតុ និងសហកាជាមួយជុំនាញវាស់វែងយកទៅរក្សាទុកនៅការិយល័យចរាចរណ៍ជើងគោករាជធានីភ្នំពេញដើម្បីរង់ចាំម្ចាស់រថយន្តបង្កចូលខ្លួនមកដោះស្រាយតាមនិតិវិធីច្បាប់ ។
ចំណែកសពនៅមិនទាន់រកសាច់ញាតិឃើញនៅឡើយទេ ទើបសមត្ថកិច្ចយកទៅតម្កល់ទុកនៅវត្តទឹកថ្លា ដើម្បីរង់ចាំក្រុមគ្រួសារមកទទួល ៕
ដោយ៖ សុខា សែនជ័យ
