ខេត្តត្បូងឃ្មុំ ៖ កម្លាំងការិយាល័យបទល្មើសគ្រឿងញៀនកងរាជអាវុធហត្ថខេត្ត សហការជាមួយកងរាជអាវុធហត្ថស្រុកពញាក្រែក បានចុះបង្រ្កាបករណីជួញដូរដោយខុស ច្បាប់នូវសារធាតុញៀន ឃាត់ខ្លួនជនសង្ស័យម្នាក់ មានឈ្មោះ សុខ មីណា ភេទប្រុស អាយុ២៦ឆ្នាំ រស់ភូមិសេរីមង្គល ឃុំក្រែក ស្រុកពញាក្រែក ខេត្តត្បូងឃ្មុំ ។
ប្រតិបត្តិការខាងលើធ្វើឡើងកាលពីវេលាម៉ោង១២និង៥០នាទី ថ្ងៃទី២០ ខែវិច្ឆិកា ឆ្នាំ២០១៧នៅចំណុចមុខមន្ទីរពេទ្យស្រុកពញាក្រែក ស្ថិតក្នុងភូមិតាហៀវលើ ឃុំកោងកាង ស្រុកពញាក្រែក ខេត្តត្បូងឃ្មុំ ។
បន្ទាប់ពីទទួលបានចម្លើយសារភាពពីជនសង្ស័យខាងលើ និងមានការសម្របសម្រួលពីលោកព្រះរាជអាជ្ញារងខេត្ត ទើបនៅវេលាម៉ោង១៧និង៥០នាទី ថៃ្ងខែដដែល នៅចំណុចភូមិគយ ឃុំក្រែក ស្រុកពញាក្រែក កម្លាំងជំនាញបានបន្តឃាត់ខ្លួនជនសង្ស័យម្នាក់ទៀត ឈ្មោះ ហយ សម្បិត្ត ភេទប្រុស អាយុ២៦ឆ្នាំ រស់ភូមិក្រែកត្បូង ឃុំក្រែក ស្រុកពញាក្រែក ខេត្តត្បូងឃ្មុំ ។
ជាលទ្ធផល កម្លាំងចាប់យកវត្ថុតាងរួមមាន ៖ ម្សៅក្រាមពណ៌ស ចំនួន១០កញ្ចប់ ក្នុងនោះធំ០១កញ្ចប់ ថងសំរាប់ច្រកគ្រឿងញៀនមួយចំនួន ឧបករណ៍សំរាប់ជក់គ្រឿងញៀន ចិញ្ជៀនលោហធាតុពណ៌លឿងចំនួន០១វងម៉ូតូចំនួន០២គ្រឿង ទូរស័ព្ទដៃចំនួន០៣គ្រឿង។
ករណីនេះ ជនសង្ស័យ និងវត្ថុតាងកំពុងកសាងសំណុំរឿងបញ្ជូនទៅសាលាដំបូងខេត្តត្បូងឃ្មុំ ដើម្បីផ្តន្ទាទោសតាមច្បាប់ ៕វណ្ណៈ
