ខេត្តកំពង់ចាម ៖ បុរសមិនស្គាល់អត្តសញ្ញាណពីរនាក់បានរងគ្រោះថ្នាក់ចរាចរណ៍ ស្លាប់ ម្នាក់និងម្នាក់រងរបួសធ្ងន់ ខណៈពួកគេធ្វើដំណើរដោយម៉ូតូមួយគ្រឿងទាំងកណ្តាលអធ្រាត្រជិះបុកខឿនចិញ្ចើមថ្នល់ នៅចំណុចផ្លូវបំបែកច្រកចូលភូមិ ក្នុងភូមិរការលើ សង្កាត់សំបួរមាស ក្រុងកំពង់ចាម ។
នគរបាលជំនាញផ្នែកចរាចរក្រុងកំពង់ចាមបានឲ្យដឹងថា ជនរងគ្រោះជិះម៉ូតូម៉ាកវីហ្សិន ពណ៌ខ្មៅ គ្មានស្លាកលេខ ។ អ្នកទាំងពីរនាក់ មានម្នាក់បានស្លាប់នៅនឹងកន្លែង និងម្នាក់ ទៀតរងរបួសធ្ងន់ ហើយក៏ត្រូវបានបញ្ជូនទៅសង្រ្គោះនៅមន្ទីពេទ្យ ។ ចំណែកសពយក ទៅរក្សានៅសាលនៃមន្ទីរពេទ្យខេត្តកំពង់ចាម ។
សមត្ថកិច្ចក៏ប្រកាសស្វែងរកសាច់ញាតិឲ្យមកទទួលយកសពទៅធ្វើបុណ្យ និងអ្នករបួសកំពុងសម្រាកនៅមន្ទីរពេទ្យខេត្ត ។ រហូតមកដល់ម៉ោង១០និង២០នាទីនាទីព្រឹកថ្ងៃទី២១ ខែវិច្ឆិកា ឆ្នាំ២០១៧នេះ នៅមិនទាន់មានក្រុមគ្រួសារមកទទួលនៅឡើយទេ ។
សមត្ថកិច្ចបានស្នើសុំដល់ប្រព័ន្ធផ្សព្វផ្សាយ មេត្តាជួយផ្សាយជាដំណឹងដើម្បីស្វែងរកក្រុមគ្រួសារ និង អាណាព្យាបាល ៕ វណ្ណៈ
