ខេត្តពោធិ៍សាត់៖ បុរសម្នាក់បានស្លាប់ភ្លាមៗនឹងកន្លែង និងម្លាក់ទៀតរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍ដោយរថយន្តតាកូម៉ាបុករថយន្តអ៊ីស៊ុយស៊ុយ ខណះបើកបញ្ច្រាស់ទិសគ្នា ។
ហេតុការណ៍នេះបានកើតឡើងពីវេលាម៉ោង៣និង២៩នាទីទៀបភ្លឺ ថ្ងៃទី២២ ខែតុលា ឆ្នាំ២០១៥ លើកំណាត់ផ្លូវជាតិលេខ៥ ត្រង់ចន្លោះបង្គោលគីឡូម៉ែត្រលេខ១៦៤/១៦៥ ស្ថិតក្នុងភូមិត្រាំធំ ឃុំអូរសណ្ដាន់ ស្រុកក្រគរ ខេត្តពោធិ៍សាត់ ។
លោកវេរសេនីយ៍ត្រី ឯម រុន អធិការនគរបាលស្រុកក្រគរប្រាប់ថា រថយន្តតាកូម៉ា ពណ៌ទឹកប្រាក់ ពាក់ស្លាកលេខ ភ្នុំពេញ 2v 1564 ធ្វើដំណើរក្នុងទិសដៅពីលិចទៅកើត បើកបរដោយបុរសម្នាក់មិនទាន់ស្គាល់អត្កញ្ញាណ (ស្លាប់) លុះមកដល់ចំណុចខាងលើ បានបុកជាមួយរថយន្តម៉ាកអ៊ីស៊ុយស៊ុយ ពណ៌ទឹកប្រាក់ដូចគ្នា ពាក់ស្លាកលេខ ភ្នុំពេញ 2ផ 0590 ខណៈកំពុងធ្វើដំណើរបញ្ច្រាស់ទិសគ្នា បណ្ដាលឲ្យអ្នកបើកបរឈ្មោះ រិទ្ធ រងរបួសធ្ងន់ ។
លោកអធិការបន្តទៀតថា អ្នករបួសបញ្ជូនទៅសង្គ្រោះនៅមន្ទីរពេទ្យ ចំណែកវត្ថុតាងយកទៅរក្សាទុកនៅអធិការដ្ឋានរង់ចាំដោះស្រាយតាមនិតិវិធី ៕
ដោយ៖ ប៉ឹម ពិន
