ខេត្តកណ្តាល៖ រថយន្តនីសាន់ធុនធំមួយគ្រឿង បើកបោះពួយយ៉ាងលឿន ជ្រុលទៅបុករះរថយន្ត២គ្រឿងនៅលើកំណាត់ផ្លូវជាតិលេខ៥ កាលពីវេលាម៉ោង៦ និង៣០នាទី ថ្ងៃទី២២ ខែតុលា ឆ្នាំ២០១៥ ត្រង់ចំណុចចន្លោះគីឡូម៉ែត្រលេខ២៩-៣០ ស្ថិតក្នុងភូមិឃ្លាំងស្បែក ឃុំកំពង់លួង ស្រុកពញាឮ បណ្តាលឲ្យមនុស្សប្រុស-ស្រី៧នាក់រងរបួសធ្ងន់ ស្រាល ។
រថយន្តបង្កម៉ាកនីសាន់ ចំណុះតោន៥ ពណ៌សលាយក្រហម ពាក់ស្លាកលេខតាកែវ 3A-0759 ជារថយន្តដឹកទំនិញរបស់ក្រុមហ៊ុនឡាម៉េងហួត បើកបរដោយជនមិនស្គាល់អត្តសញ្ញាណក្រោយពីកើតហេតុបានរត់គេចខ្លួនបាត់ ។ រថយន្តពីរគ្រឿងដែលត្រូវបានរថយន្តនីសាន់បើកបុកនោះទី១-ម៉ាកតូយូតាកាមរី គូថហើម ពណ៌សំបឪឡឹក ពាក់ស្លាកលេខភ្នំពេញ2C-1096 បើកបរដោយឈ្មោះ ប៉ូវ នី ភេទប្រុស អាយុ២៩ឆ្នាំ មានទីលំនៅក្នុងភូមិសាលាលេខ៥ ឃុំអូឫស្សី ស្រុកកំពង់ត្រឡាច ខេត្តកំពង់ឆ្នាំង ទី២-ម៉ាកសាំយ៉ុង ពណ៌ស ពាក់ស្លាកលេខកណ្តាល2A-6541 បើកបរឈ្មោះ ទ្រី សោភណ្ឌ័ ភេទប្រុស អាយុ៣៤ឆ្នាំ មានទីលំនៅក្នុងភូមិព្រែកក្ដាម២ ឃុំកោះចិន ស្រុកពញាឮ ។
អធិការនគរបាលស្រុកពញាឮលោកវរសេនីយ៍ទោ ដួង តេង បានឲ្យដឹងថា ករណីគ្រោះថ្នាក់ចរាចរណ៍ខាងលើនេះ បណ្តាលឲ្យមនុស្សប្រុស-ស្រី៧នាក់ជិះលើរថយន្តទួរីសម៉ាកសាំយ៉ុងពណ៌ស ពាក់ស្លាកលេខ កណ្តាល2A-6541 រងរបួសធ្ងន់ម្នាក់ស្រាល៤នាក់ ។ ជនរងគ្រោះដែលរងរបួសធ្ងន់នោះឈ្មោះ ម៉ាត់ ហ្វីណា ភេទស្រី អាយុ១៨ឆ្នាំ មានទីលំនៅក្នុងភូមិឃ្លាំងស្បែក ឃុំកំពង់លួង ។ ដោយឡែកជនរងគ្រោះដែលរងរបួសស្រាលទី១-ឈ្មោះ គង់ សាវី ភេទប្រុស អាយុ២៦ឆ្នាំ ទី២-ស៊ីថា រ៉ាវុធ ភេទប្រុស អាយុ២០ឆ្នាំ ទី៣-ឈ្មោះ ឆែម ពិចិត្រ ភេទប្រុស អាយុ២៦ឆ្នាំ ទី៤-ឈ្មោះ ឆែម រដ្ឋា ភេទប្រុស អាយុ១៧ឆ្នាំ និងទី៦-ឈ្មោះ ឱក សុខភឿន ភេទប្រុស អាយុ១៩ឆ្នាំ ។ ជនរងគ្រោះទាំង៦នាក់នេះមានទីលំនៅក្នុងភូមិសាស្ត្រស្រុកពញាឮ និងមានមុខរបរ ជាកម្មកររោងចក្រកាត់ដេរដូចគ្នា ។
លោកវរសេនីយ៍ទោ ដួង តេង បានបន្តថា នៅមុនពេលកើតហេតុសាក្សីបានឃើញរថយន្តសាំយ៉ុងបើកដើរដឹកក្រុមកម្មករតាមបណ្តោយផ្លូវជាតិលេខ៥ ក្នុងទិសដៅពីជើងទៅត្បូង រីឯរថយន្តកាមរីបើកពីក្រោយរថយន្តសាំយ៉ុងដឹកកម្មករ ។ ពេលបើកដល់ចំណុចកើតហេតុស្រាប់តែមានរថយន្តនីសាន់ ខាងលើបើកបរយ៉ាងលឿនមកពីក្រោយបុករះរថយន្តទាំងពីរគ្រឿងពេញមួយទំហឹង បណ្តាលឲ្យមានមនុស្សរងរបួស និងខូចខាតរថយន្តយ៉ាងដូច្នេះ ។
ក្រោយពីមានហេតុការណ៍កើតឡើង អ្នកបើកបររថយន្តបង្កបានរត់គេចខ្លួនបាត់ស្រមោល រីឯជនរងគ្រោះរងរបួសធ្ងន់ត្រូវបានរថយន្តសាមុយដឹក បញ្ជូនទៅសង្គ្រោះនៅមន្ទីរពេទ្យក្នុងរាជធានីភ្នំពេញ ។ ដោយឡែករថយន្តទាំង៣គ្រឿថត្រូវបានសមត្ថកិច្ចនគរបាលជំនាញចរាចរណ៍ធ្វើកំណត់ហេតុវាស់វែងដកហូតយកទៅរក្សាទុកបណ្តោះអាសន្ននៅអធិការដ្ឋាន ដើម្បីចាត់ការតាមច្បាប់ ៕
ដោយ៖ ស្អាងជ័យ
