ការចចារ មានតម្លៃជាង១ពាន់លានដុលលារ បានជួយដល់ ព្រះរាជ្យបុត្រ សាឌីអារ៉ាប៊ី Miteb Bin Abdullah រួចផុតពីទោសពុករលួយ។
សារព័ត៌មានរ៉យទ័របានបានដកស្រង់សម្តីមន្ត្រីសាឌីអារ៉ាប៊ីបានបញ្ជាក់នៅថ្ងៃទី២៩ខែវិច្ឆិកាថា ៖ អតីតរដ្ឋមន្ត្រីកម្លាំងការពារជាតិ រាជ្យបុត្រ Miteb Bin Abdullah ត្រូវបានដោះលែងឲ្យមានសេរីភាពកាលពីថ្ងៃទី២៨ខែវិច្ឆិកា ក្រោយពេលចចារនឹងបង់ប្រាក់ជាង ១ពាន់លានដុល្លារ ដើម្បីបញ្ចប់រឿងក្តីពុករលួយរបស់លោក។
ជាបុត្រារបស់អតីតព្រះមហាក្សត្រAbdullah ត្រូវបានចាប់ខ្លួនកាលពីថ្ងៃទី៤ខែវិច្ឆិកា នៅក្នុងសកម្មភាព កម្ចាត់ពុករលួយរបស់រាជ្យទាយាទ Mohammed Bin Salman ។ នៅក្នុងយុទ្ធនាការនោះបានចាប់ខ្លួន រាជ្យបុត្រព្រះអង្គម្ចាស់រហូតដល់១១អង្គ និងរដ្ឋមន្ត្រី៤រូប រួមទាំង អតីត មន្ត្រីរាប់សិបនាក់ទៀត។ សកម្មភាពខាងលើត្រូវបានគេវាយតម្លៃថាជាសកម្មភាពក្នុងការពង្រឹងអំណាចរបស់រាជ្យទាយាន មុនពេលឡើងស្នងរាជសម្បត្តិដឹកនាំសាឌីអារ៉ាប៊ី។
ដើម្បីទទួលបានការដោះលែងឲ្យមានសេរីភាព រាជ្យបុត្រ Miteb បានចំណាយប្រាក់ មួយចំនួនធំរហូតដល់ជាង១ពាន់លានដុល្លារ តាមកិច្ចព្រមព្រៀងដែលបានរៀបចំ។
សមាជិករាជ្យវង្ស និងសាច់ញ្ញាត្តិ របស់ Miteb បានផ្សព្វផ្សាយនៅលើបណ្តាញសង្គម ដោយបង្ហាញឲ្យឃើញថា រាជ្យបុត្របានវិលត្រឡប់មកផ្ទះវិញនៅទីក្រុង Riyadh ប៉ុន្តែមិនបាន បញ្ជាក់ថា៖ ត្រូវដោះលែងរបៀបណានោះឡើយ។
ក្រៅពីនេះនៅមានរាជ្យបុត្រ៤អង្គទៀតក៏ត្រូវបានដោះលែងនៅក្នុងយុទ្ធនាការបោសម្អាតអំពើពុករលួយកាលពីថ្ងៃទី៤ខែវិច្ឆិកា ក្រោយមានកិច្ចព្រមព្រៀង។ មន្ត្រីអារ៉ាប៊ីសាអូឌិតមិនបាន បញ្ជាក់ឈ្មោះ អ្នកដែលបានដោះលែងនោះឡើយ៕
ដោយ៖ មែវ សាធី
