ភ្នំពេញ៖ បុរស៤នាក់ស្រវឹងស្រាបើករថយន្តដេញបុកដែលអ្នកយកព័ត៌មាននិងដកកាំភ្លើង២ដើមភ្ជង់គម្រាមបាញ់សម្លាប់ខណៈដែលអ្នកយកព័ត៍មានទៅថតរូបភាពផឹកស៊ីស្រវឹងហើយវាយតប់គ្នាបែកក្បាល ។
ហេតុការណ៍នេះបានកើតឡើងកាលពីវេលាម៉ោង១១និង៣០នាទីយប់ថ្ងៃទី២២ ខែតុលា មុខផ្ទះសំណាក់ គីម ចោមចៅស្ថិតក្នុងបុរីប៊ុនហួរ តាមផ្លូវបេតុង ភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ ។
តាមសាក្សីនៅកន្លែងកើតហេតុបានអោយដឹងថា មុនពេលកើតហេតុអ្នកយកព័ត៌មានរបស់ទូរទស្សន៍ MSJ ម្នាក់បានជិះម៉ូតូម៉ាក PCX ពណ៌ស មកដល់ចំណុចមុខផ្ទះសំណាក់ គីម ចោមចៅ ហើយបានប្រទះឃើញមនុស្ស២នាក់ព្រួតវាយបុរសជាមេការផ្ទះសំណាក់គីម ចោមចៅ បែកក្បាលហូរឈាមស្រោចពេញខ្លួន ឃើញបែបនេះគេក៏បានឈប់ម៉ូតូចុះជួយឃាត់កុំឲ្យវាយគ្នា ពេលនោះជនបង្ក២នាក់នោះក៏ចេញទៅបាត់នៅសល់តែមេការផ្ទះសំណាក់ដែលរងរបួសឈរនៅក្បែរតុផឹកស៊ីនៅមុខផ្ទះសំណាក់នោះ បែរជាចោទអ្នកយកព័ត៌មានទូរទស្សន៍ MSJ ថាជាបក្ខពួករបស់ជនបង្ក ទៅវិញទោះបីជាអ្នកយកព័ត៌មានប្រាប់ថាគេជាអ្នកយកព័ត៌មានក៏ដោយ ។ បន្ទាប់មកមេការផ្ទះសំណាក់បានដកយកកូនសោម៉ូតូនិងអូសយកម៉ូតូរបស់អ្នកយកព័ត៌មានទូរទស្សន៍ MSJ ទៅទុកក្នុងផ្ទះសំណាក់ខាងលើ ។
ភ្លាមៗនោះអ្នកយកព័ត៌មានក៏បានរាយការណ៍ទៅប្រាប់សមត្ថកិច្ចថា មានករណីវាយតប់គ្នាហើយយកម៉ូតូរបស់គាត់ទៅទុក។ ដោយឡែកអ្នកយកព័ត៌មានទូរទស្សន៍ហង្សមាសពេលឮប្រកាសគេតាមវិទ្យុទាក់ទងបែបនេះក៏បានជិះម៉ូតូហុងដាឌ្រីម ពណ៌ខ្មៅ មួយគ្រឿងទៅយកព័ត៌មាន និងថតរូបភាពក៏ត្រូវមេការផ្ទះសំណាក់ដែលរងរបួសនោះជេរប្រមាថមើលងាយ ហើយគម្រាមថា បើហ៊ានថតយកទៅផ្សាយ ស្អែកនេះដឹងគ្នាហើយ ។ ស្របពេលនោះអ្នកយកព័ត៌មានទាំង២នាក់ឮថា មានរថយន្តធ្លាក់ចូលប្រឡាយទឹកស្អុយនៅមុខស្នាក់ការនគរបាលប៉ុស្តិ៍ចោមចៅ ក៏នាំគ្នាទៅយកព័ត៌មាននេះរហូតចប់សព្វគ្រប់ទើបពួកគេត្រឡបមកវិញសួរព័ត៍មានបន្ថែម តែជនរងគ្រោះបានទៅមន្ទីរពេទ្យបាត់ទៅហើយ ។
ពេលនោះអ្នកយកព័ត៌មានបានសាកសួរព័ត៌មានពីបុគ្គលិកនៅមុខផ្ទះសំណាក់ តែបុគ្គលិកនោះមិនទាន់ទាំងនិយាយផងស្រាប់តែមានរថយន្តម៉ាកវីហ្គោ ពណ៌ស្ករ ពាក់ស្លាកលេខ ភ្នំពេញ 2Q-7183 ជិះគ្នា៤នាក់ មកដល់ឃើញអ្នកយកព័ត៌មានកំពុងតែសួរនាំបុគ្គលិកផ្ទះសំណាក់ក៏បានចាប់អូសបុគ្គលិកនោះចូលទៅក្នុងផ្ទះសំណាក់។ ចំណែកអ្នកយកព័ត៌មានថតរូបភាពផ្ទះសំណាក់និងតុផឹកស៊ីនៅក្បែរនោះ ក៏ត្រូវបុរសទាំង៤នាក់សួរថា ឯងជាអ្នកយកព័ត៌មានខាងណា ពេលនោះអ្នកយកព័ត៌មានក៏នាំគ្នាបម្រុងជិះម៉ូតូចេញ ស្រាប់តែបុរសម្នាក់រត់ដេញតាមចាប់អ្នកយកព័ត៌មានទូរទស្សន៍ហង្សមាសបានហើយក្របួចកអាវអូសជិត១០ម៉ែត្រឡើងជាំក្រហមយកទៅថតរូបទុក ។ ចំណែកអ្នកជិះក្នុងរថយន្ត៣នាក់ទៀតបានបើករថយន្តដេញបុកអ្នកបុគ្គលិកទូរទស្សន៍MSJបើកម៉ូតូអ្នករត់នោះជិតដល់ហើយបានឈប់រថយន្តនាំគ្នាចុះដកកាំភ្លើងខ្លី២ដើមអាម៉េគម្រាមបាញ់សម្លាប់អ្នកយកព័ត៌មានទាំង២នាក់បានដកហូតយកវិទ្យុទាក់ទងរបស់អ្នកសារព័ត៌មានដែលសៀតនៅចង្កេះយកទៅទុកបានបន្តិចទើបប្រគល់ឲ្យវិញហើយឡើងរថយន្តបើកចេញទៅបាត់អស់ ។
ក្រោយពេលកើតហេតុអ្នកយកព័ត៌មានរងគ្រោះទាំង២នាក់បានទៅដាក់ពាក្យបណ្តឹងពីបទ ភ្ជង់គម្រាមអ្នកសារព័ត៌មាន នៅប៉ុស្តិ៍នគរបាលចោមចៅឲ្យជួយស្រាវជ្រាវករណីខាងលើនេះឡើងវិញដើម្បីតាមចាប់ជនល្មើសយកមកចាត់ការតាមច្បាប់ ៕
...
ដោយ៖ សុខា សែនជ័យ
