ខេត្តកណ្តាល៖ បុរសម្នាក់បើកបោះពួយយ៉ាងលឿនជ្រុលចង្កូតចូលទៅបុករថយន្តធុនធំបើកច្រាស់ទិសគ្នាពេញមួយទំហឹង បណ្តាលឲ្យរងរបួសយ៉ាងធ្ងន់ធ្ងរស្លាប់ភ្លាមៗមួយរំពេចនៅកន្លែងកើតហេតុធ្វើឲ្យអ្នកឃើញហេតុការណ៍រន្ធត់ចិត្តគ្រប់ៗគ្នា ។ ដោយឡែកអ្នកបើកបររថយន្តបានគេចខ្លួនបាត់ស្រមោល បន្ទាប់ពីឃើញមានមនុស្សស្លាប់ ។
ករណីគ្រោះថ្នាក់ចរាចរណ៍ដ៏រន្ធត់ខាងលើនេះបានកើតឡើងកាលពីវេលាម៉ោង១៨ និង៣០នាទី ថ្ងៃទី២៣ ខែតុលា ឆ្នាំ២០១៥ លើកំណាត់ផ្លូវជាតិលេខ៤ ត្រង់ចំណុចចន្លោះគីឡូម៉ែត្រលេខ២៥-២៦ ស្ថិតក្នុងភូមិស្រះសង្គម ឃុំពើក ស្រុកអង្គស្នួល ខេត្តកណ្តាល ។
ជនរងគ្រោះស្លាប់បាត់បង់ជីវិតនោះមានឈ្មោះ ប៉ាក ហ៊ីម ភេទប្រុស អាយុ២៥ឆ្នាំ មុខរបរជាំកម្មកររោងចក្រ បច្ចុប្បន្នស្នាក់នៅក្នុងភូមិត្រយ៉ឹង ឃុំពើក ស្រុកអង្គស្នួល បើកបរម៉ូតូម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខភ្នំពេញ1CD-7627 ។ ចំណែកឯរថយន្តម៉ាកហ៊ីយ៉ាន់ដាយ ពណ៌ លឿង ពាក់ស្លាកលេខភ្នំពេញ3C-0066 ជាប្រភេទរថយន្តសណ្តោយរ៉ឺម៉ក បើកបរដោយជនមិនស្គាល់អត្តសញ្ញា ក្រោយពីកើតហេតុបានរត់គេចខ្លួនបាត់ស្រមោល ។
សាក្សីបានប្រាប់សមត្ថកិច្ចនគរបាលចរាចរណ៍ស្រុកអង្គស្នួលថា នៅមុនពេលកើតហេតុគេបានឃើញបុរសរងគ្រោះបើកម៉ូតូបោះពួយយ៉ាងលឿន តាមបណ្តោយផ្លូវជាតិលេខ៤ ក្នុងទិសដៅពីលិចទៅកើត ដោយមិនមានពាក់មួកការពារសុវត្ថិភាពនិងបំពាក់កញ្ចក់មើលក្រោយនោះទេ ។ ពេលបើកដល់ចំណុចកើតហេតុពុំដឹងជាមានឧបសគ្គអ្វីនៅខាងមុខនោះទេ ទើបធ្វើឲ្យជនរងគ្រោះកាច់ចង្កូតម៉ូតូមកឆ្វេងដៃឆ្លងផុតគំនូសពុះចែកទ្រូងផ្លូវជ្រុលទៅបុករថយន្តសណ្តោងរ៉ឺម៉កដែលបើកបរច្រាស់ទិសគ្នាពេញមួយទំហឹងលាន់ឮដូចរន្ទះ បណ្តាលឲ្យជនរងគ្រោះបែកក្បាល និងបាក់.ក ស្លាប់ភ្លាមៗនៅកន្លែងកើតហេតុតែម្តង ។
ក្រោយពីមានហេតុការណ៍កើតឡើងគេសង្កេតឃើញវត្តមាន នគរបាលជំនាញចរាចរណ៍ស្រុកអង្គស្នួលចុះទៅសម្រួលចរាចរណ៍បញ្ជៀសការកកស្ទះ និងធ្វើកំណត់ហេតុដកហូតមធ្យោបាយពាក់ព័ន្ធទាំង២គ្រឿងទៅរក្សាទុកនៅអធិការដ្ឋាននគរបាលស្រុក ដើម្បីចាត់ការតាមច្បាប់ ។ ចំណែកឯសាកសពជនរងគ្រោះត្រូវបានសមត្ថកិច្ចនគរបាលទំនាក់ទំនងប្រគល់ទៅឲ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕
ដោយ៖ ស្អាងជ័យ
