ខេត្តត្បូងឃ្មុំ៖ កម្លាំងនគរបាលស្រុកមេមត់ បានចាប់ឃាត់ខ្លួន ជនសង្ស័យប្រុស ស្រីចំនួន៣នាក់ពីបទ ជួញដូររក្សាទុក ដឹកជញ្ជូនដោយខុសច្បាប់នូវសារធាតុញៀន បន្ទាប់ពីរៀបចំអន្ទាក់តាមចាប់ខ្លួនអស់រយះពេល២ថ្ងៃ និងមានការអនុញ្ញាតពីលោកឧត្តមស្នងការ ម៉ៅ ពៅ ហើយមានការឯកភាពផ្នែកផ្លូវច្បាប់ពីតំណាងអយ្យការអមសាលាដំបូងខេត្តត្បូងឃ្មុំ លោកព្រះរាជអជ្ញារ ហៀង សុភក្ត្រ ។
លោកវរសេនីយ៍ត្រី ហុង គឹមហឿន អធិការនគរបាលស្រុកមេមត់បានឲ្យដឹងថា ដោយយោងតាមមាត្រា ៧៩ ការប្រគល់ដោយមានការឃ្លាំមើល និងការញុះញង់អោយលក់គ្រឿងញៀន នៃច្បាប់ស្តីពីការត្រួតពិនិត្យគ្រឿងញៀនឆ្នាំ២០១២ និងយោងតាមសេចក្តីសំរេចលេខ០២ ចុះថ្ងៃទី២២ ខែតុលា ឆ្នាំ២០១៥ របស់លោក ហៀង សុភក្ត្រ ព្រះរាជអាជ្ញារអមសាលាដំបូងខេត្តត្បូងឃ្មុំបានអនុញ្ញាតឲរូបលោកប្រើប្រាស់កំលាំងភ្ងាក់ងារសម្ងាត់ចំនួន២នាក់។
លោកបន្តទៀតថា បន្ទាប់មកយើងបានប្រគល់លុយទៅឲ្យភ្ងាក់ងារយើងទាំង២នាក់ចំនួន១៦ម៉ឺនរៀល ដើម្បីឲ្យទៅទិញថ្នាំញៀនពីឈ្មោះ សារឿន សុជាតិ ភេទប្រុស អាយុប្រុស អាយុ២៦ឆ្នាំ ដែលស្នាក់នៅផ្ទះចាំចំការកៅស៊ូ ត្រង់ចំណុចគីឡូចែក ស្ថិតក្នងភូមិឆ្លូង៣ ឃុំកំពាន់ ស្រុកមេមត់ ខេត្តត្បូងឃ្មុំ ដែលជាជនសង្ស័យជួញដូរគ្រឿងញៀនដ៏សកម្មនៅក្នុងមូលដ្ឋាន ។
លោកបានបញ្ជាក់ថា នៅយប់ថ្ងៃទី២២ ខែតុលា ឆ្នាំ២០១៥ វេលាម៉ោង២១និង១៥ ភ្នាក់ងារយើងក៏បានទៅទិញថ្នាំញៀនចំនួន៤កញ្ចប់តូចពីជនសង្ស័យខាងលើ យកមកប្រគល់ឲរូបលោក។ ហើយបន្ទាប់មកទៀតនៅម៉ោង៦និង៣០នាទីព្រឹកថ្ងៃទី២៣ ខែតុលា ឆ្នាំ២០១៥ លោកបានសុំយោបល់ពីលោកឧត្តមសេនីយត្រី ម៉ៅ ពៅ ស្នងការនគរបាលខេត្តត្បូងឃ្មុំ និងបានការឯកភាពផ្នែកផ្លូវច្បាប់ពីលោក ហៀង សុភក្ត្រ ព្រះរាជអាជ្ញារអមសាលាដំបូងខេត្តត្បូងឃ្មុំដើម្បីបន្តធ្វើរការឆែកឆេលំនៅដ្ឋានរបស់ឈ្មោះសារឿន សុជាតិ និងបានរកឃើញម្សៅក្រាមពណ៍សថ្លាចំនួន៧កញ្ចប់តូចនិង២កញ្ចប់ធំដែលសង្ស័យជាគ្រឿងញៀន។
លោកអធិការក៏បានបញ្ជាក់បន្ថែមថា ជាមួយនិងការរកឃើញវត្ថុតាងសង្ស័យជាថ្នាំញៀនខាងលើកំលាំងជំនាញធ្វើរការឃាត់ខ្លួនបានជនសង្ស័យចំនួន៣នាក់ ទី១ឈ្មោះ ហ៊ុន សារឿង ភេទប្រុសអាយុ៦៧ឆ្នាំ ទី២ ឈ្មោះ សារឿន សុជាតិ ភេទប្រុស អាយុ២៦ឆ្នាំ ទី៣ ឈ្មោះ យឹន ម៉ូនីកា ភេទស្រី អាយុ២៣ឆ្នាំ អ្នកទាំងអស់រស់នៅភូមិឆ្លូង៣ ឃ្មុំកំពាន់ ស្រុកមេមមត់ ខេត្តត្បូងឃ្មុំ។ ហើយក្នុងការឆែកឆេនេះសម្មត្ថកិច្ចក៏រកឃើញប្រាក់ញុះញង់ចំនួន១៦ម៉ឺនរៀលរបស់សម្មត្ថកិច្ចផងដែរ។បច្ចុប្បន្នជនសង្ស័យនិងវត្ថុតាងកំពុងត្រូវបានរៀបចំសំណុំរឿងបញ្ជូនទៅសាលាដំបូងចាត់ការតាមនិតិវិធី ៕
ដោយ៖ វណ្ណះ
