ខេត្តកណ្ដាល ៖ មន្ត្រីកងរាជអាវុធហត្ថក្រុងតាខ្មៅថ្លែងថា នៅរសៀលថ្ងៃសុក្រ ៥រោច ខែមិគសិរ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី៨ ខែធ្នូ ឆ្នាំ២០១៧ កម្លាំងកងរាជអាវុធហត្ថក្រុងតាខ្មៅ បង្ក្រាបទីតាំងកត់ឆ្នោតវៀតណាមមួយកន្លែង ស្ថិតនៅភូមិព្រែកសំរោង សង្កាត់តាខ្មៅ ក្រុងតាខ្មៅ ដែលមានម្ចាស់ទីតាំងឈ្មោះ អៀម វណ្ណ ភេទស្រី អាយុ៣៦ឆ្នាំ ។ ក្នុងប្រតិបត្តិការបង្ក្រាបនេះ គឺមានការឯកភាពពីលោក ហេង ផេង ព្រះរាជអាជ្ញារងនៃអយ្យការអមសាលាដំបូងខេត្តកណ្ដាល ។
វត្ថុតាងបទល្មើសមួយចំនួន ត្រូវបានសមត្ថកិច្ចរកឃើញ ដើម្បីរៀបចំកសាងសំណុំរឿងបញ្ជូនទៅអយ្យការអមសាលាដំបូងខេត្តកណ្ដាល ដើម្បីចាត់ការតាមច្បាប់ ។
មជ្ឈដ្ឋានមួយចំនួនកំពុងតែឆ្ងល់ថា ទីតាំងកត់ឆ្នោតវៀតណាមខុសច្បាប់ មានពីរទីតាំងក្បែរគ្នា នៅផ្សារកាច់ជ្រុង តែបែរជាសមត្ថកិច្ចបង្ក្រាបតែមួយទីតាំង រីឯទីតាំងមួយទៀតមិនបង្ក្រាប ?
ប្រជាពលរដ្ឋរំពឹងដោយជឿជាក់ថា សមត្ថកិច្ចនឹងអនុវត្តច្បាប់ឱ្យមានតម្លាភាព ដើម្បីលុបបំបាត់ល្បែងស៊ីសងខុសច្បាប់ ទាំងអស់ក្នុងមូលដ្ឋានក្រុងតាខ្មៅ ៕ (ដោយ:ឆ ដា)
