ខេត្ដកណ្ដាល ៖ ការបើកបរមិនប្រកាន់ស្តាំ បានបង្កជាគ្រោះ ថ្នាក់ចរាចរណ៍ រវាងរថយន្ត និងម៉ូតូបណ្តាលឱ្យរបួសធ្ងន់ម្នាក់ លើផ្លូវជាតិ២ ភូមិព្រែកឫស្សី សង្កាត់ព្រែកឫស្សី ក្រុងតាខ្មៅ ខេត្តកណ្តាល កាលពីវេលាម៉ោង២ថ្ងៃទី១១ ខែធ្នូ ឆ្នាំ២០១៧។
ក្នុងហេតុការណ៍គ្រោះថ្នាក់ចរាចរណ៍ខាងលើនេះ បានបង្ក ឱ្យអ្នកបើកម៉ូតូឈ្មោះ សៀន ដារ័ត្ន ភេទប្រុស អាយុ២២ឆ្នាំមានទីលំនៅភូមិព្រែកឫស្សី សង្កាត់ព្រែកឫស្សី ក្រុងតាខ្មៅ ខេត្តកណ្តាល រងបួសធ្ងន់បាក់ជើង។
ប្រភពព័ត៌មានបានឱ្យដឹងថា ម៉ូតូម៉ាក Scoopy ពណ៌ខ្មៅ ពាក់ស្លាកលេខ ភ្នំពេញ1AN-4333។ ចំណែករថយន្តម៉ាក
TAGOMA ពណ៌ខ្មៅ ពាក់ស្លាកលេខ ភ្នំពេញ2AA-8644
ប្រភពព័ត៌មានបន្តឱ្យដឹងថា រថយន្តនិងម៉ូតូបើកក្នុងគោលដៅ ផ្លូវខាងលើ ដោយម៉ូតូបើកមិនប្រុងប្រយ័ត្ន ថែមទាំងមិនប្រកាន់ស្តាំទៀត ធ្វើដំណើរក្នុងទិសដៅពីជើងទៅត្បូង រីឯរថយន្តបើកក្នុងទិសដៅពីត្បូងទៅជើង បានបុកគ្នាយ៉ាងពេញទំហឹងបណ្តាលឱ្យអ្នកបើកម៉ូតូរបួសបាក់ជើង។
ក្រោយកើតហេតុនេះភ្លាម កម្លាំងនគរបាលនៃអធិការដ្ឋានក្រុងតាខ្មៅបានដឹកយកទៅព្យាបាលរបួសនៅមន្ទីរពេទ្យជ័យជំនះ។ ករណីនេះសមត្ថកិច្ចជំនាញបានអះអាងថា មូលហេតុគឺមកពីអ្នកបើកម៉ូតូមិនប្រកាន់ស្តាំ ទើបបង្កឱ្យមានគ្រោះ ថ្នាក់ចរាចរណ៍យ៉ាងដូច្នេះ ។
បច្ចុប្បន្នមធ្យោបាយធ្វើដំណើរទាំងពីរគ្រឿង ត្រូវបានយកមករក្សាទុកនៅអធិការដ្ឋាននគរបាលក្រុងតាខ្មៅ ដើម្បីដោះស្រាយ តាមច្បាប់ ៕ ស្អាងជ័យ
