ប្រទេសបារាំង៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងគណៈប្រ តិភូជាន់ខ្ពស់រាជរដ្ឋាភិបាលកម្ពុជា បានធ្វើដំណើរតាមយន្តហោះរបស់ក្រុមហ៊ុនអាកាសចរណ៍សឹង្ហបុរី ជើងហោះហើរលេខ SQ 336 អញ្ជើញទៅដល់ចំណតអាកាសយានដ្ឋានអន្តរជាតិសាលឌឺហ្គោល ទីក្រុងប៉ារីសសាធារណរដ្ឋបារាំង ប្រកបដោយសុវត្តិភាព ។
កាលពីវេលាម៉ោង៦និង៥០នាទីព្រឹកថ្ងៃទី២៥ ខែតុលា ឆ្នាំ២០១៥ ម៉ោងនៅទីក្រុងប៉ារីសប្រទេសបារាំង ត្រូវនឹងម៉ោង១១ និង៥០នាទីម៉ោងនៅប្រទេសកម្ពុជា ដើម្បីអញ្ជើញបំពេញទស្សនកិច្ច៣ថ្ងៃនៅសាធារណរដ្ឋបារាំង។
វត្តមាននៃការអញ្ជើញដល់របស់សម្តេចតេជោនាយករដ្ឋមន្ត្រី និងគណៈប្រតិភូជាន់ខ្ពស់រាជរដ្ឋាភិបាលកម្ពុជា ត្រូវបានការធ្វើគារវកិច្ចស្វាគមន៍យ៉ាងកក់ក្តៅ និងស្និតស្នាលរ៉ាក់ទាក់ពីសំណាក់ ឯកឧត្តម Jean Claude POIMBOEUF ឯកអគ្គរដ្ឋទូតវិសាមញ និងពេញសមត្ថភាពនៃសាធារណរដ្ឋបារាំង ប្រចាំព្រះរាជាណាចក្រកម្ពុជា ឯកឧត្តម នុត ណារ៉ាង ឯកអគ្គរាជទូតវិសាមញ និងពេញសមត្ថភាព នៃព្រះរាជាណាចក្រកម្ពុជា ប្រចាំសាធារណរដ្ឋបារាំង និងលោកជំទាវ លោក Jerome Cauchard អនុប្រធានពិធីការ នៃក្រសួងការបរទេសបារាំង ព្រមទាំងវត្តមានឯកឧត្តម លោកជំទាវ អស់លោក លោកស្រី ជាឥស្សរជនការទូតនៃប្រទេសទាំងពីរកម្ពុជា បារាំងជាច្រើនរូប។
តាមកម្មវិធីដែលបានគ្រោងទុក សម្តេចតេជោនាយករដ្ឋមន្ត្រី និងជួបពិភាក្សាទ្វេភាគី ជាមួយនិងឯកឧត្តម ហ្វ្រង់ស័រ ហូឡង់ ប្រធានាធិបតីនៃសាធារណរដ្ឋបារាំងនៅវេលាថ្ងៃត្រង់ ថ្ងៃទី២៦តុលា រួមទាំងការអញ្ជើញចូលរួមធ្វើជាសាក្សី នៃ ពិធីចុះហត្ថលេខាលើឯកសារចំនួន៦ ដែលធ្វើឡើងនៅក្រសួងការបរទេសក្នុងថ្ងៃដដែលនោះដែរ។ ដោយ ឡែកនៅម៉ោង១៦រសៀលថ្ងៃទី២៥តុលានេះ សម្តេចតេជោនាយករដ្ឋមន្ត្រីនិងជួបសំណេះសំណាលជាមួយ និងបងប្អូនប្រជាពលរដ្ឋខ្មែរ រួមទាំងនិស្សិតដែលកំពុងសិក្សានៅសាធារណរដ្ឋបារាំងចំនួន ៧៧៥នាក់។
ចំពោះព័ត៌មានពិស្តារស្តីពីសកម្មភាព សម្តេចតេជោនាយករដ្ឋមន្ត្រី និងគណៈប្រតិភូជាន់ខ្ពស់រាជរដ្ឋាភិបាល កម្ពុជា អញ្ជើញទស្សនកិច្ចនៅសាធារណរដ្ឋបារាំង អ្នកយកព័ត៌មានពិសេសរបស់អគ្គនាយកដ្ឋានទូរទស្សន៍ កម្ពុជា នឹងធ្វើសេចក្តីរាយការណ៍ជូនទស្សនាជាបន្តបន្ទាប់ទៅទៀត ៕
