ខេត្តរតនគិរី ៖ ដូចជាហួសហេតុពេកហើយ អស់លោកសមត្ថកិច្ច បើមានចេតនាទុច្ចរិត ដោយអំពើឃុបឃិតគ្នា ផ្តើមឲ្យមានបទល្មើសឈើឆ្លងដែនទៅវៀតណាម ក្នុងដែនសមត្ថកិច្ចគ្រប់គ្រងរបស់ខ្លួនដូចហែរកឋិនអីចឹង ជាកំហុសធ្ងន់ធ្ងរណាស់ ខណៈឡានដឹកឈើមិនអាចធ្វើការប្រដូច ឬប្រៀបធៀបនឹងឡានក្បួនអ្នកធំទៅហើយ និងចំហរអីយ៉ាងនេះលោកអើយ ។
ប្រជាពលរដ្ឋបានលើកឡើងថា ៖ ពួកគាត់បានឃើញនឹងភ្នែក ជាក់ស្តែងៗ មិនបំផ្លើស និងមិនបំភ្លៃទេ ពិសេសកុំខឹងអីបងៗមានភារកិច្ចបង្ក្រាបតាមច្រក តែមិនបង្ក្រាប…? ហើយ កុំទើសចិត្តអី បានស៊ីបានចុកចឹងប្រឹងទៅ ដើម្បីទប់សេដ្ឋកិច្ចគ្រួសារ ស្រីញី និងការបែង ចែងផលប្រយោជន៍បានមកពីបទល្មើសនេះ ។ ប៉ុន្តែកំភ្លេចការទទួលខុសត្រូវតាមផ្លូវច្បាប់ នៃភារកិច្ច តួនាទី របស់ខ្លួន ថ្ងៃក្រោយមិនរំពឹងថា លុយបានមកពីបទល្មើសឈើនេះ អាច ក្លាយពូនជាកូន ជាចៅ រីកលុយបន្ថែមនោះទេ ។ ពេលខ្លះអាចរីកដុះដាលនូវអំពើល្មើស និងទទួលខុសត្រូវចំពោះបទល្មើសនេះនៅពេលណាមួយថ្នាក់លើ ឬអ្នកទទួលប្រភព សេដ្ឋកិច្ចពីអ្នកយករួចខ្លួន រួចទម្លាក់កំហុសនេះឲ្យអស់លោកជាសមត្ថកិច្ចទទួលខុសត្រូវ?
ថ្មីៗនេះសកម្មភាពដឹកជញ្ជូនឈើចេញទៅវៀតណាម ឆ្លងកាត់ច្រករបៀងខ្លាធំ ទាំងយប់ទាំងថ្ងៃ ដោយគេប្រើប្រាស់រថយន្តកែច្នៃជាច្រើន បើកឆ្លងកាត់ដែនដីភូមិបក់ធំ ឃុំញ៉ាង ស្រុកអូរយ៉ាដាវ ខេត្តរតនគិរី គគ្រឹកគគ្រេងណាស់ កាត់ភូមិអ្នកស្រុក កាត់មុខស្នាក់ការ បើកបារ៉ាសឲ្យឆ្លង មើលទៅហាក់ដូចជាប្រទេសអត់ច្បាប់។
ម្យ៉ាងទៀតសមត្ថកិច្ចភាគីវៀតណាម ពួកគេមិនត្រឹមតែបានទទួលផលប្រយោជន៍ពីសេដ្ឋកិច្ចឈើចេញពីទឹកដីខ្មែរយើងប៉ុណ្ណោះទេ ពួកគេទទួលបានចំណូលពន្ធនាំចូល ក៏ដូចជាបានឈើប្រណីតប្រើប្រាស់យ៉ាងគគ្រឹកគគ្រេង ។ ក្នុងនោះបន្ទាប់ពីការកាប់បំផ្លាញព្រៃឈើក្នុងទឹកដីខ្មែរ ដឹកជញ្ជូនទៅវៀតណាមដូចហែកឋិននេះ យើងក៏ត្រូវគិតថា ការខាតបង់ខាងយើង ទី-ព្រៃឈើ ដែលជាសម្បត្តិធនធានធម្មជាតិ ត្រូវបានបាត់បង់រលាយហិនហោច ។ ទី២-សត្វព្រៃដ៏សម្បូរបែបរបស់ខ្មែរ ខ្វះទីជម្រក ត្រូវរត់ចាកចេញពីទឹកដីខ្មែរ ទៅជ្រកសម្ងំសុខក្នុងព្រៃទឹកដីវៀតណាម ដែលប្រទេសគេមានចរិកអភិរក្សធនធានធម្មជាតិ និងសត្វ ព្រៃ ។ ទី៣-គេយកឈើ ពីស្រុកយើងសោះ ធ្វើឲ្យរដ្ឋរបស់គេចំណេញពន្ធនាំចូល ។ចំណុច ទាំងអស់នេះ តើនរណាទទួលខុសត្រូវ បើអាជ្ញាធរខេត្តរតនគិរី សមត្ថកិច្ច អាជ្ញាធរពាក់ព័ន្ធ ពិសេសមេច្រករបៀងខ្លាធំ បានអនុញ្ញាតឲ្យឈ្មួញដឹកជញ្ជូនឈើប្រណីតទាំងឡានៗកែច្នៃ បន្តកន្ទុយគ្នាឆ្លងទៅវៀតណាមទាំងយប់ទាំងថ្ងៃ មើលទៅគួរឲ្យស្អប់ខ្ពើមបំផុតចំពោះសមត្ថ កិច្ចមានចរិករបៀប កន្ទេលធំ បន្លំដេក គ្មានទំនួលខុសត្រូវតាមតួនាទី ភារកិច្ច នេះជាដើម ….។
ប្រការនេះហើយទើបប្រជាពលរដ្ឋនៅឃុំញ៉ាង ស្រុកអូរយ៉ាដាវ អំពាវនាវឲ្យលោក ឆេង គឹមស៊ុន ប្រតិភូរាជរដ្ឋាភិបាល ទទួលបន្ទុករដ្ឋបាលព្រៃឈើ ចាត់វិធានការទប់ស្កាត់បទ ល្មើសដឹកជញ្ជូនឈើទៅលក់នៅវៀតណាមតាមច្រករបៀងប៉ុស្ដិ៍ខ្លាធំជាបន្ទាន់ផង ព្រោះ សកម្មភាពនោះបាននាំឲ្យកើតមានបទល្មើសកាប់ឈើក្នុងស្រុកអូរយ៉ាដាវ ។
ចំណែកជនជាតិដើមភាគតិចចារ៉ាយ ដែលរស់នៅក្បែរប៉ុស្តិ៍ច្រករបៀងខ្លាធំបានឲ្យដឹងថា មន្ត្រីជំនាញនិងសមត្ថកិច្ចពាក់ព័ន្ធដូចជាមន្ត្រីរដ្ឋបាលព្រៃឈើ នគរបាលប្រឆាំងបទល្មើស សេដ្ឋកិច្ច មិនចាត់វិធានការបង្ក្រាបសកម្មភាព ដឹកជញ្ជូនឈើខុសច្បាប់យ៉ាងពេញបន្ទុក នោះទេ ។ សូម្បីតែលោក កែប កត់ នាយខណ្ឌរដ្ឋបាលព្រៃឈើខេត្តរតនគិរី ក៏មិនធ្វើដឹង ធ្វើឮរឿង អំពីសកម្មភាពដឹកជញ្ជូនឈើទៅលក់នៅវៀតណាម ។
ប្រជាពលរដ្ឋកំពុងងឿងឆ្ងល់ រហូតដាក់ការសង្ស័យថា មូលហេតុមិនបង្ក្រាបអាចមាន៤ចំណុច ទី១-មកពីមិនដឹងទើបមិនបង្ក្រាប ទី២-មកពីម្ចាស់ឈើមានខ្សែធំ ទើបមិន ហ៊ានប៉ះ ទី៣-មកពីម្ចាស់ឈើ បង់លុយប្រចាំខែរួចហើយ ទើបធ្វើមិនដឹង មិនបង្ក្រាប ទី៤-អាចមានចេតនាអនុវត្តផ្ទុយពីច្បាប់ ហែកផលប្រយោជន៍គ្នា ៕ ជាយក្រុង
