ខេត្តកំពង់ចាម ៖ ក្មេងប្រុសម្នាក់ត្រូវរថយន្តបុកបណ្តាលឲ្យរងរបួសធ្ងន់ ខណៈជិះកង់ចេញ ពីផ្ទះមកដល់ចំណុចផ្លូវបំបែកមុខកាហ្វេហូម ស្ថិតក្នុងភូមិទី៧ សង្កាត់កំពង់ចាម ក្រុងកំពង់ចាម ។ ហេតុការណ៍នេះកើតឡើងកាលពីវេលាម៉ោង១០ព្រឹក ថ្ងៃសៅរ៍ ៥រោច ខែ បុស្ស ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី៦ ខែមករា ឆ្នាំ ២០១៨ ។
នគរបាលចរាចរណ៍បានឲ្យដឹងថា រថយន្តបង្កហេតុម៉ាកហាយឡែនឌ័រ ពណ៌ទឹកមាស ស្លាកលេខភព.2J.7636 អ្នកបើកបរមិនត្រូវបានស្គាល់ឈ្មោះ ព្រោះក្រោយហេតុបានរត់ គេចខ្លួនបាត់ ។ ចំណែកក្មេងប្រុសរងគ្រោះឈ្មោះ ឡុង ដាលីនភូមិរិន អាយុ១៣ឆ្នាំ រស់នៅភូមិទី៧ សង្កាត់កំពង់ចាម ក្រុងកំពង់ចាម ខេត្តកំពង់ចាម ធ្វើដំណើរដោយកង់ ក្នុងទិសដៅពីត្បូងទៅជើង ។ សមត្ថកិច្ចបន្តថា ករណីគ្រោះថ្នាក់ចរាចរណ៍ខាងលើកើតត្រង់ចំណុចផ្លូវបំបែកបានបណ្តាលឲ្យក្មេងប្រុសជិះកង់រងរបួសធ្ងន់ ។
ក្រោយពេលកើតហេតុអ្នកបើកបររថយន្តបានគេចខ្លួនបាត់ ដោយផ្នែកជំនាញបានយក កង់និងរថយន្តមករក្សាទុកនៅអធិការដ្ឋាននគរបាលក្រុងកំពង់ចាម និងបន្តស្រាវជ្រាវរក អត្តសញ្ញាណអ្នកបើកបររថយន្ត ។
ប្រភពព័ត៌មានពីសាច់ញាតិក្រុមគ្រួសារក្មេងប្រុសរងគ្រោះដែលអង្គភាពនគរដ្រេហ្គនទទួលបានឲ្យដឹងថា អាការរបួសរបស់ក្មេងប្រុសរងគ្រោះមានស្ថានភាពធ្ងន់ធ្ងរក៏បានបញ្ជូនទៅ សង្គ្រោះនៅមន្ទីរពេទ្យរាជធានីភ្នំពេញ រហូតអាកាសរបួសនៅមិនបានធូរស្រាល ក៏បាន បញ្ជូនបន្តទៅសង្គ្រោះនៅមន្ទីរពេទ្យវៀតណាម តែភ័ព្វសំណាងអាក្រក់បានដាច់ខ្យល់ស្លាប់នៅពាក់កណ្តាលផ្លូវ ។
សាក្សីនៅកន្លែងកើតហេតុ និងសមត្ថកិច្ចនគរបាលចរាចរបានឲ្យដឹងថា អ្នកបើករថយន្តបង្កហេតុត្រូវគេស្គាល់ថាជា មន្រ្តីសមត្ថកិច្ចក្រុងមួយរូប ហើយក៏កំពុងរត់ការបិទសំណុំរឿងនេះផងដែរ ៕ វណ្ណៈ
