ភ្នំពេញ ៖ ទីបំផុត​ ចៅក្រមស៊ើបសួរសាលាដំបូងរាជធានីភ្នំពេញ​ លោក​ ពេជ្រ​ វិជ្ជាធរ​ នៅល្ងាចថ្ងៃទី១១​ ខែមករា​ សម្រេចបញ្ជូនប៉ូលិសស័ក្តិ៣ តែក្លែងជាស័ក្តិ​៤​ ធាក់នគរបាលចរាចរណ៍ ទៅឃុំខ្លួនក្នុងពន្ធនាគារបណ្តោះអាសន្នដើម្បីរង់ចាំការស៊ើបសួរបន្តទៀត។

លោក​ លី​ សុផាណា​ អ្នកនាំពាក្យអយ្យការអមសាលាដំបូងរាជធានីភ្នំពេញ​ ថ្លែងថា​ ក្រោយពីបានសាកសួរចម្លើយលើឈ្មោះ សៅ បញ្ញា និងពិនិត្យឯកសារសំណុំរឿងតាមនីតិវិធី តំណាងអយ្យការបានសម្រេចបើកការស៊ើបសួរដោយចោទប្រកាន់ពីបទ ហិង្សាដោយចេតនាមានស្ថានទម្ងន់ទោស និងបទប្រើប្រាស់ដោយគ្មានសិទ្ធិនូវសញ្ញាសំគាល់ដែលកំណត់ដោយអាជ្ញាធរសាធារណៈ​តាមមាត្រា ២១៨ និងមាត្រា៦១៤ នៃក្រមព្រហ្មទណ្ឌ ។

ករណីនេះ​ នាយឧត្តមសេនីយ៍ ជួន សុវណ្ណ អគ្គស្នងការរងនិងជាស្នងការនគរបាលរាជធានីភ្នំពេញ ​ធ្លាប់បានបញ្ជាក់ថា សម្រាប់មន្ត្រីនគរបាលដែលប្រើអំពើហិង្សារូបនេះ យោងតាមបទបញ្ជាដ៏ម៉ឺងម៉ាត់របស់ អគ្គស្នងការនគរបាលជាតិ នាយឧត្តមសេនីយ៍សន្ដិបណ្ឌិត នេត សាវឿន គឺដាច់ខាតចាត់ វិធានការណ៍តាមផ្លូវច្បាប់ គ្មានការលើកលែងនោះឡើយ។

នាយឧត្តមសេនីយ៍បានបន្ថែមថា​ បន្ទាប់ពីវីដេអូនៃការប្រើអំពើហិង្សាទៅលើមន្ត្រីចរាចរណ៍ជាប់កិច្ចសន្យារួចមក លោកបានបញ្ជាឱ្យសមត្ថកិច្ចជំនាញ ស្រាវជ្រាវហើយ ឈានទៅដល់ការឃាត់ខ្លួន មន្ត្រីនគរបាលរូបនេះ ឈ្មោះ សៅ បញ្ញា អាយុ៣៣ឆ្នាំ ដែលបម្រើការងារនៅការិយាល័យរដ្ឋបាលសរុប នៃនាយកដ្ឋានប្រឆាំបទល្មើសបច្ចេកវិទ្យា របស់អគ្គស្នងការដ្ឋាននគរបាលជាតិ។

ករណីប្រើអំពើហិង្សានេះ បានកើតឡើង នៅស្ដុបត្រឡោកបែក ដោយនគរបាលរូបនេះ បានបើករថយន្ដម៉ាក Ford ពាក់ផ្លាកលេខភ្នំពេញ ​2AC-9099 ។  ប៉ុន្ដែដោយខុសច្បាប់ចរាចរណ៍ ក៏ត្រូវបានក្រុមមន្ត្រីជាប់កិច្ចសន្យានោះឃាត់​​ដើម្បីសួរនាំ។ ពេលបម្រុងឃាត់សួរនាំនោះ​ ជនបង្កមិនព្រមឈប់រថយន្តនោះឡើយ លុះមួយថ្ងៃក្រោយ មក បើកមកម្តងទៀតស្រាប់តែចុះមករករឿងជនរងគ្រោះ រហូតប្រើហិង្សាតែម្តង។ ពេលចុះពីរថយន្ដ ជនបង្កបានទាញកអាវអូស ថែមទាំងធាក់ចំដើមទ្រូងមួយជើង ផ្ងាទៅក្រោយបើទោះបីជនរងគ្រោះ បានលត់ជង្គង់ និងលើកដៃគោរពក្នុងន័យបង្ហាញថា សុំទោសក៏ដោយនោះ។

មន្ត្រីរីជាប់កិច្ចសន្យា ដែលរងការធាក់មួយជើងចំកណ្ដាលដើមទ្រូងនោះ ឈ្មោះ អឿន ចំណាន៕ ចេស្តា