ភ្នំពេញ៖ យុវជនម្នាក់បានទទួលរងរបួសបាក់ជើងម្ខាងត្រូវបានបញ្ចួនទៅមន្ទីរពេទ្យភ្លាមៗ បន្ទាប់ពីរួបគេជិះម៉ូតូបោះពួយលឿនដូចហោះជ្រុល វាក់អើជាមួយរថយន្ត ដែលកំពុងបត់ឆ្លងផ្លូវ ហើយចាប់ហ្វ្រាំងទាំងបង្ខំ បណ្តាលឲ្យបោកម៉ូតូដួលអូសចូលក្រោមរថយន្ត ។
ហេតុការណ៍នេះកើតឡើងកាលពីវេលាម៉ោង២និង១៥នាទីរសៀល ថ្ងៃទី២៨ ខែតុលា ឆ្នាំ២០១៥ ស្ថិតនៅតាមបណ្តោយផ្លូវជាតិលេខ៣ មុខច្រកចូលបុរីប៊ុនហួរ ភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ ។
តាមប្រភពនៅកន្លែងកើតហេតុ បានឲ្យដឹងថា មុនពេលកើតហេតុ គេឃើញរថយន្ត ម៉ាកកូរ៉េ ហ៊ីយ៉ាន់ដាយឃ្លប់ ពណ៌ស ពាក់ស្លាកលេខ ភ្នំពេញ 2S-77764 បើកពីជើងទៅត្បូង លុះដល់ចំណុចខាងលើ បត់ឆ្លងផ្លូវ បំណង់ចូលក្នុងបុរីប៊ុនហួរ ស្របពេលរថយន្តកំពុងបត់ឆ្លង ស្រាប់តែ មានម៉ូតូម៉ាកស្កុបពី ពណ៌ខ្មៅ ពាក់ស្លាកលេខ ភ្នំពេញ 1BY-7117 ជិះដោយយុវជនម្នាក់ ធ្វើដំណើរក្នុងទិសដៅពីជើងទៅត្បូង ស្របទិសគ្នា ក្នុងល្បឿនលឿន បោះពួយ វ៉ាក់អើជាន់ហ្វ្រាំង បោកដួលអូសចូលទៅក្រោមរថយន្ត បណ្តាលឲ្យរងរបួសជើងស្តាំ ។
ក្រោយកើតហេតុភ្លាមៗ ជនរងគ្រោះត្រូវបានសាច់ញាតិ ដឹកតាមម៉ូតូ ទៅគ្លីនិកដោយខ្លួនឯង ចំណែកម៉ូតូនិងរថយន្ត ត្រូវបានសមត្ថកិច្ចយកទៅរក្សាទុកជាបណ្តោះអាសន្ន រងចាំភាគីសងខាង ដោះស្រាយគ្នាពេលក្រោយ ៕
ដោយ៖ សុខា សែនជ័យ
