ប៉ោយប៉ែត៖ សមត្ថកិច្ចប៉ូលិសប្រឆាំងបទល្មើសគ្រឿងញៀន ឃាត់ខ្លួនជាបន្តបន្ទាប់ ជនសង្ស័យ២នាក់ ជួញដូរ និងប្រើប្រាស់គ្រឿងញៀនខុសច្បាប់កាលល្ងាចថ្ងៃទី២៨ ខែតុលា ឆ្នាំ២០១៥ ក្នុងផ្ទះសំណាក់យីហោ ច័ន្ទ ឆារ៉ា ក្នុងភូមិក្បាលស្ពានសង្កាត់ក្រុងប៉ោយប៉ែត ខេត្តបន្ទាយមានជ័យ ។
លោកនាយការិយាល័យប្រឆាំងបទល្មើសគ្រឿងញៀន នៃស្នងការនគរបាលខេត្តបន្ទាយមានជ័យ ធិន ស៊ិនដេត បានឲ្យដឹងថា ជាការអនុវត្តន៍តាមគោលនយោបាយភូមិ-ឃុំមានសុវត្ថិភាព ក៏ដូចជាបទបញ្ជា របស់លោក អាត់ ខែម ស្នងការនគរបាលខេត្ត កម្លាំងជំនាញសហការជាមួយកម្លាំងនគរបាលក្រុងបានធ្វើការស្រាវជ្រាវរហូតឈានដល់ការឃាត់ខ្លួនជនសង្ស័យម្នាក់ជាអ្នកជួញដូរគ្រឿងញៀនខុសច្បាប់ឈ្មោះ ឃុន វណ្ណា ហៅ ខ្វាន់ ភេទប្រុស អាយុ១៦ឆ្នាំ នៅតាមផ្លូវសាធារណៈក្នុងក្រុងប៉ោយប៉ែត និងបន្តឃាត់ខ្លួនបក្ខពួកម្នាក់ទៀតឈ្មោះ គឿន វណ្ណា ភេទប្រុស អាយុ១៧ឆ្នាំ នៅផ្ទះសំណាក់ ច័ន្ទ ឆារ៉ា ក្នុងក្រុងប៉ោយប៉ែតដូចគ្នា។
ក្នុងការបង្ក្រាបនេះសមត្ថកិច្ចដកហូតបានវត្ថុតាងរួមមាន ថ្នាំញៀនប្រភេទមេតំហ្វេតាមីនទឹកកកចំនួន៥កូនថង់តូច ស្មើនឹង១.៦ក្រាម ទូរស័ព្ទដៃ០២គ្រឿង រួមនឹងសម្ភារៈប្រើប្រាស់ថ្នាំងញៀនមួយចំនួនទៀត ។
ក្រោយឃាត់ខ្លួនជនសង្ស័យទាំង២នាក់ ត្រូវបានកម្លាំងជំនាញសាកសួរពួកគេបានឆ្លើយសារភាពថាគេនឹងបានប្រព្រឹត្តដួចសមត្ថកិច្ចចោទសួរមែនក្រោយពីកសាងសំណុំរឿងជនសង្ស័យ នឹងបញ្ជូនខ្លួនទៅកាន់តុលាការ ដើម្បីចាត់ការតាមនីតិវិធីច្បាប់ ៕
ដោយ៖ វណ្ណា
