ខេត្តរតនគិរី ៖រថយន្តយីឌុបមួយគ្រឿងដឹកដំឡូងមីបង្កប់ឈើឡាំងបួនជ្រុងជាច្រើនកំណាត់ត្រូវបានកំលាំងកងរាជអាវុធហត្ថផ្ទៃប្រទេសសហការណ៍ ជាមួយកំលាំងផ្នែករដ្ឋបាលព្រៃឈើលំផាត់ធ្វើការបង្ក្រាបនិងរឹបអូសបាន ខណះកំពុងលើករៀបដាក់ឡាននាវេលាម៉ោង៤រសៀលថ្ងៃ សុក្រ ១០កើត ខែ មាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី ២៦ ខែ មករា ឆ្នាំ ២០១៨ស្ថិតក្នុងភូមិ១សង្កាត់កាចាញ ក្រុងបានលុងរួចបញ្ជូនទរក្សារទុកនៅបរិវេណខណ្ឌរដ្ឋបាលព្រៃឈើខេត្តបណ្តោះអាសន្នសិន។

តាមប្រភពបានបង្ហើបថា៖ រថយន្តយីឌុបមួយនេះតែងតែលួចដឹកឈើបង្កប់ដំឡូងមីជាញឹកញាប់លោតឆ័ត្រដឹកចេញពីក្រុងបានលុងខេត្តរតនគិរីឆ្ពោះទៅប្រទេសវៀតណាមតាមច្រកទ្វារនៃខេត្តក្រចេះនិងខេត្តត្បូងឃ្មុំ។

រថយន្តយីឌុបដឹកឈើបង្កប់ដំឡូងមីនោះមានពាក់ស្លាលេខកំពង់ចាម ៣A-៣១៤១ក្បាលពណ៌សលាយក្រហមទ្រុងខៀវដែលកំពុងធ្វើសកម្មភាពលើកឈើរៀបបង្កប់ដំឡូងមីក្នុងចំការនៅភូមិ១ហៅ ភូមិតាសុយ ខណះនោះអ្នកបើកបរនិងកម្មករជាច្រើនអ្នកបានរត់គេចខ្លួនបាត់អស់ភ្លាមៗពេលសមត្ថកិច្ចទៅដល់។ ដោយឡែកអត្តសញ្ញាណម្ចាស់ឈើនិងម្ចាស់រថយន្តមិនទាន់បានស្គាល់នៅឡើយ។

ទូរលេខពិតប្រាកដឈើនៅលើរថយន្តនោះសមត្ថកិច្ចជំនាញមិនទាន់បានធ្វើការរើវាស់វែងនៅឡើយរក្សារទុករងចាំធ្វើការស្រាវជ្រាវរកម្ចាស់ឱ្យចូលខ្លួនដោះស្រាយបន្តតាមច្បាប់ព្រៃឈើ៕

ដោយសហការី