ខេត្ដកណ្ដាល៖ កាលពីថ្ងៃទី២៧-២៨ ខែតុលា ឆ្នាំ២០១៥ មានដង្ហែអង្គកឋិន ពីពុទ្ធបរិស័ទចំណុះជើងវត្ដចូលក្នុងវត្ដ ស្វាយជ្រំ ស្ថិតក្នុងភូមិលើ ឃុំស្វាយជ្រំ ស្រុកខ្សាច់កណ្ដាល ខេត្ដកណ្ដាល ។ អ្វី ដែលធ្វើឱ្យមានការចាប់អារម្មណ៍ពី ប្រជាពុទ្ធបរិស័ទផ្អើលពេញបណ្ដាញ សង្គមហ្វេសប៊ុកគឺអង្គកឋិនពេលដែល ដង្ហែជុំវិញព្រះវិហារមានម៉ុងសាយលោត ហែហមជាឆៃយាំនៅទីនោះដែរ ។
នៅក្នុងបណ្ដាញទំនាក់ទំនងសង្គម ហ្វេសប៊ុកមតិជាច្រើនបានរិះគន់ថា មិន គួរឱ្យមានម៉ុងសាយលោតនៅក្នុងពិធី ដង្ហែអង្គកឋិនជុំវិញព្រះវិហារនោះទេ ។ មតិភាគច្រើនបាននិយាយថា ម៉ុងសាយ គឺជានិមិត្ដសញ្ញានៃប្រពៃណីវប្បធម៌ របស់ប្រជាជនចិន ។ ដូច្នេះគេមិនគួរ យកម៉ុងសាយមកលោត ឬនាំក្បួរអង្គ កឋិនដែលហែនៅលើខឿនព្រះវិហារ នោះឡើយ ។ ផ្ទុយទៅវិញគេគួរតែយក ឆៃយាំដែលជារបស់ខ្មែរយកមកចូលរួម ដង្ហែអង្គកឋិនទាននោះវិញ ។
នៅក្នុងបណ្ដាញទំនាក់ទំនងសង្គម មួយបានសរសេរថា តាមការតាមដាន របស់អាត្មាឃើញថាប្រជាជនខ្មែរចាប់ អារម្មណ៍យ៉ាងខ្លាំងចំពោះបុណ្យមួយនេះ តែពេលនេះបានឃើញហើយពិតជា សោកស្ដាយចំពោះការហែប្រទក្សិណ៣ ជុំព្រះវិហារមិនឃើញប្រពៃណីវប្បធម៌ ខ្មែរទេ បែរជាយកក្រុមម៉៉ុងសាយចិនមក ហែទៅវិញ ។ ចុះវប្បធម៌ខ្មែរអត់មាន មែនហើយយកវប្បធម៌ខ្មែរទៅដាក់ ក្រោយអ៊ីងចឹងសមទេ? ព្រះករុណាគ្រប់ ព្រះអង្គ ព្រះគ្រូចៅអធិការតាមវត្ដនីមួយៗ គួរតែយកចិត្ដទុកដាក់ចំពោះរឿងនេះផង កុំចង់បានតែបច្ច័យពេក ត្រូវនាំគ្នាជួយ ថែរក្សាប្រពៃណី វប្បធម៌ខ្មែរទៅក្នុងនាម យើងទាំងអស់គ្នាជាកូនខ្មែរ ហើយវត្ដនេះ ជាវត្ដមន្ដ្រីសង្ឃ មានតួនាទីសុទ្ធតែរាជា គណៈថ្នាក់ត្រីទៀត មិនធម្មតាទេ ។ យើង ទទួលបានទាំងតួនាទី ហើយត្រូវជួយថែ រក្សាតម្លៃអ្នកបួស និងវប្បធម៌ខ្មែរផង។
ម្ចាស់គណនីហ្វេសប៊ុកដែលជា សាមណនិស្សិតផ្នែកសង្គមវិទ្យាមួយអង្គ នៃពុទ្ធិកសាកលវិទ្យាល័យព្រះសីហនុរាជ បានរិះគន់ចំពោះអ្វីដែលបានកើតឡើង នៅក្នុងអង្គកឋិនខាងលើនេះ ។ ព្រះអង្គ បានបន្ដថា នេះជាការរិះគន់ដើម្បីកែ លម្អឱ្យបានល្អ មិនមែនជាការបន្ដុះ បង្អាប់នោះឡើយ ។
ឆ្លើយតបទៅនឹងការរិះគន់ខាងលើនេះ ព្រះតេជព្រះគុណ លន់ សាគុណ ព្រះជន្ម ៤២ព្រះវស្សា ចៅអធិការវត្ដស្វាយជ្រំ បានមានថេរដីកាប្រាប់ភ្នាក់ងារកាសែត នគរវត្ដឱ្យដឹងថា អង្គកឋិននេះបានចាប់ ផ្ដើមដោយចំណុះជើងវត្ដកាលពីថ្ងៃទី ២៧-២៨ ខែតុលាកន្លងទៅនេះ ។ ព្រះ អង្គបានទទួលស្គាល់មានក្រុមម៉ុងសាយ របស់ក្រុមយុវជនក្នុងឃុំស្វាយជ្រំចូល រួមកំដកម្មវិធីបុណ្យនោះមែន ប៉ុន្ដែថា វាជាទម្លាប់របស់ក្រុមយុវជនទាំងនោះ ក៏ដូចជាសហគមន៍ទាំងមូល ។ នៅក្នុង ពេលដែលហែអង្គកឋិនជុំវិញព្រះវិហារ ក៏មានក្រុមឆៃយាំ២វង់ ចូលរួមដង្ហែ ផងដែរ ។
ព្រះគ្រូចៅអធិការបានមានថេរដីកា ថា គេទើបតែចាប់អារម្មណ៍ ប៉ុន្ដែវាបាន ចូលរួមជាយូរណាស់មកហើយគឺក្រុម យុវជននៅឃុំស្វាយជ្រំដែលគេមានម៉ុង សាយ ហើយតែងតែលោតលេងនៅក្នុង ពិធីបុណ្យផ្សេងៗដូចជា ចេញព្រះវស្សា ជាដើម ។
ចំពោះការលើកឡើងថា ក្រុមម៉ុង សាយបាននាំមុខក្បួនឆៃយាំ និងអង្គកឋិន នោះ ព្រះគ្រូចៅអធិការបានមានថេរដីកា ថា ធម្មតាវាចេះលោតវិលចុះវិលឡើង ដូច្នេះពេលខ្លះម៉ុងសាយបែរជានាំមុខក្បួន ទៅវិញ ។ ព្រះគ្រូចៅអធិការបានសង្កត់ ធ្ងន់ថា “ប៉ុន្ដែក្នុងកម្មវិធីនេះមានឆៃយាំ ២វង់ចូលរួមដែរ” ។
យ៉ាងណាក៏ដោយព្រះអង្គទទួលស្គាល់ ថា បើនិយាយពីប្រពៃណីទំនៀមទម្លាប់ វាពិតជាមិនត្រឹមត្រូវទេ ប៉ុន្ដែសហគមន៍ នេះត្រូវមានការចូលរួមពីក្រុមយុវជន នៅក្នុងមូលដ្ឋាន ។ ចំពោះប្រពៃណីទំនៀម ទម្លាប់វាខុសមែន ប៉ុន្ដែជាទម្លាប់នៅក្នុង សហគមន៍តែងតែមានការចូលរួមដើម្បី បានសប្បាយរីករាយទាំងអស់គ្នា ។
បើទោះជាយ៉ាងណាក៏ដោយការរិះគន់ នៅតែមាន ព្រោះតែទិដ្ឋភាពដែលបាន ឃើញ និងចែករំលែកបន្ដគ្នានៅក្នុង បណ្ដាញទំនាក់ទំនងសង្គមបានទម្លាក់ កំហុសទៅលើចៅអធិការវត្ដស្វាយជ្រំថា បណ្ដែតបណ្ដោយបុណ្យបែបសាសនា មួយនេះត្រូវបានជាន់ឈ្លី ដោយវប្បធម៌ និងប្រពៃណីរបស់ចិន ។ ប៉ុន្ដែសម្រាប់ ចៅអធិការវត្ដស្វាយជ្រំយល់ថា វាជា ការចូលរួមរបស់ក្រុមយុវជនដើម្បីការ សប្បាយនៅក្នុងសហគមន៍ ។ យ៉ាងណា ក៏ដោយព្រះអង្គយល់ថា វាពិតជាខុស ចំពោះប្រពៃណីទំនៀមទម្លាប់ ៕
ដោយ៖ ស្អាងជ័យ
