ភ្នំពេញ៖ កីឡាករ ឡុង សុវណ្ណឌឿន សិស្សប្អូន ឡុង សុភី ត្រូវបានកីឡាករថៃ ឈ្មោះ រ៉ា រឿង សុំប្រកួតសងសឹក ខណៈ រូបគេវាយចាញ់ ឡុង សុភី នៅវគ្គផ្ដាច់ ព្រ័ត្រដណ្ដើមខ្សែក្រវាត់វគ្គ១កន្លងទៅ។ដូច្នេះ សុវណ្ណឌឿន អាចនឹងជួបគ្រោះ ធំនាល្ងាចថ្ងៃអាទិត្យទី១ ខែវិច្ឆិកា ឆ្នាំ ២០១៥នៅលើសង្វៀនប្រដាល់ទូរទស្សន៍បាយ័នស្ទឹងមានជ័យ ។
ជំនួបប្រកួតដ៏ព្រឺព្រួចរវាងឡុង សុវណ្ណ ឌឿន នឹង រ៉ា រឿង ប្រាកដជា ធ្វើឱ្យទស្សនិកជនចាប់អារម្មណ៍ខ្លាំងជាក់ជាមិនខាន ។ វត្ដមានរ៉ា រឿង លើកនេះ សំដៅទៅលើ ឡុង សុភី ប៉ុន្ដែត្រូវគណៈ កម្មការផ្គូផ្គងតម្រូវឱ្យប្រកួតជាមួយ ឡុង សុវណ្ណឌឿន ដែលជាសិស្សប្អូន ជំនួស ខណៈ ឡុង សុភី ជួបប្រកួតជា មួយកីឡាថៃឈ្មោះ ធំ តាន នៅសង្វៀន អាស៊ីអាគ្នេយ៍នាព្រឹកថ្ងៃទី១ ខែវិច្ឆិកា ឆ្នាំ២០១៥ ។
ការប្រកួតជំនួសរបស់កីឡាករ ឡុង សុភី នេះត្រូវបានអ្នកតាមដានការប្រកួត ប្រដាល់លើកឡើងថា ឡុង សុវណ្ណឌឿន ទំនងជួបគ្រោះធំមិនខានបើក្រឡេកទៅ មើលការប្រកួតរបស់កីឡាករ រ៉ា រឿង ដែលធ្លាប់មកប្រកួតនៅស្រុកខ្មែរច្រើនដងហើយនោះ គឺគេបានវាយឈ្នះអ្នក ប្រដាល់កម្ពុជាជាច្រើនរូបមានដូចជា កីឡាករ ឯម ខ្លឹមខ្មៅ ត្រូវ រ៉ា រឿង វាយ ឱ្យសន្លប់ក្នុងទឹកទី៣។ក្រោយមកគេបាន ប្រកួតជាមួយកីឡាករ កែវ រំចង់ ប៉ុន្ដែ ចាញ់កែវ រំចង់ ដោយពិន្ទហើយបន្ទាប់ ពីមក រ៉ា រឿង បានវាយឱ្យកីឡាករ ឡៅ ស៊ីណាត សន្លប់ក្នុងទឹកទី២វាយកីឡាករ វង្ស ណយ ឱ្យសន្លប់ក្នុងទឹកទី៤ និងចុង ក្រោយប្រកួតចាញ់កីឡាករ ឡុង សុភី ។
តួលេខប្រកួតរបស់កីឡាករ រ៉ា រឿង មានចំនួន៨១ដង វាយឈ្នះ៦២ដង ចាញ់ ១៧ដង ស្មើ២ដង រីឯកីឡាករ ឡុង សុវណ្ណ ឌឿន ធ្លាប់ប្រកួតបាន៦៩ដង ចាញ់៩ ដង ស្មើ៣ដង ឈ្នះ៥៧ដង ក្នុងនោះ សុវណ្ណ ឌឿន វាយឱ្យគូប្រកួតសន្លប់ចំនួន២១ដង។
ដូច្នេះរង់ចាំមើលជំនួបប្រកួតរវាង កីឡាករ ឡុង សុវណ្ណឌឿន នឹងរ៉ា រឿង នរណាជា អ្នកទទួលបានជ័យជម្នះ?
ដោយឡែកកីឡាករ ចាន់ ប៊ុនហឿន មកពីក្លិបនិរោធមានជ័យត្រូវប្រកួតជាមួយ កីឡាករ ភុំ ផាយ៉ាក់ (Phom Phayak) ក្នុងប្រភេទទម្ងន់៦០គីឡូក្រាម ៕
ដោយ៖ សារីម
