ភ្នំពេញ៖ ព្រឹកថ្ងៃទី០១ ខែវិច្ឆិកា ឆ្នាំ២០១៥ លោក នុត ពុធដារ៉ា អភិបាល នៃគណៈអភិបាលខណ្ឌដង្កោ បានចូលរួមជាអធិបតីក្នុងពិធីបើកបវេសនកាលឆ្នាំសិក្សាថ្មី ២០១៥-២០១៦ នៅវិទ្យាល័យសម្តេច ហ៊ុន សែន ព្រែកកំពឹស ស្ថិតក្នុងសង្កាត់ព្រែកកំពឹស ខណ្ឌដង្កោ ដោយមានការចូលរួមពីការិយាល័យអប់រំ តំណាង ស.ស.យ.ក រាជធានីភ្នំពេញ ចៅសង្កាត់ លោកគ្រូអ្នកគ្រូ អាណាព្យាបាល និងសិស្សានុសិស្សទាំងអស់ផងដែរ។
លោកអភិបាលខណ្ឌ បានធ្វើការអាននូវសារលិខិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសបើកបវេសនកាលឆ្នាំសិក្សាថ្មី ២០១៥-២០១៦ និងបានធ្វើការផ្តាំផ្ញើរនូវការយកចិត្តទុកដាក់របស់រាជរដ្ឋាភិបាលចំពោះវិស័យសិក្សាអប់រំនៅកម្ពុជាយើង ឲ្យកាន់តែល្អប្រសើរ និងមានគុណភាពពីមួយឆ្នាំ ទៅមួយឆ្នាំ ។
លោកអភិបាល ក៏បានណែនាំដល់ប្អូនៗ សិស្សានុសិស្សទាំងអស់ត្រូវខិតខំប្រឹងប្រែងរៀនសូត្រ យកចិត្តទុកដាក់ស្តាប់គ្រូ ជៀសឲ្យឆ្ងាយពីគ្រឿងញៀន និងអំពើអបាយមុខនានា ជាទំពាំងស្នងឫស្សី ទៅថ្ងៃអនាគត ដើម្បីកសាងខ្លួនជាធនធានមនុស្សដ៏សំខាន់ក្នុងការអភិវឌ្ឍប្រទេសជាតិ ឲ្យមានភាពរីកចម្រើន។
ក្នុងឱកាសនោះ លោក នុត ពុធដារ៉ា បានឧបត្ថម្ភដល់វិទ្យាល័យព្រែកកំពឹស ថវិកា ៥០ម៉ឺនរៀល និងបានធ្វើពិធីប្រគល់នូវប័ណ្ណសរសើរ និងរង្វាន់ ជូនដល់សិស្សពូកែ លោកគ្រូអ្នកគ្រូ ដែលមានស្នាដៃល្អក្នុងការបង្រៀន, ចែកជូនកង់ ដល់សិស្សក្រីក្រ ព្រមទាំងបាល់ចំនួន ១០គ្រាប់ ដែលជាការឧបត្ថម្ភពី ស.ស.យ.ក រាជធានីភ្នំពេញដល់វិទ្យាល័យផងដែរ ៕
ដោយ៖ ភារ៉ា ដង្កោ
