ភ្នំពេញ៖ នៅថ្ងៃពុធ ១៤កើត ខែផល្គុន ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២៨ ខែកុម្ភៈ ឆ្នាំ២០១៨ លោក សុខ ពេញវុធ អភិបាលនៃគណៈអភិបាលខណ្ឌដូនពេញ បានអញ្ជើញចូលរួមក្នុងពិធីអបអរសាទរទិវាជាតិទីក្រុងស្អាត លើកទី៦ ក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅសណ្ឋាគាររ៉េស៊ីដង់សុខាភ្នំពេញ ដែលក្នុងនោះ ខណ្ឌដូនពេញ ត្រូវបានប្រកាសទទួលជ័យលាភី ការប្រឡងប្រណាំងទីក្រុងស្អាត “ផ្ការំដួល៣ទង” ជាលើកទី២ ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដី នៃព្រះរាជាណាចក្រកម្ពុជា ។
ការទទួលបានជ័យលាភី “ផ្ការំដួល៣ទង” ដ៏ត្រចះត្រចង់នាថ្ងៃនេះ គឺជាការខិតខំប្រឹងប្រែងរួមគ្នាទាំងកម្លាំងកាយ កម្លាំងចិត្ត ប្រាជ្ញា ស្មារតី ពីសំណាក់ លោក លោកស្រីគណៈអភិបាលខណ្ឌដូនពេញ លោក អធិការនគរបាលខណ្ឌ លោក មេបញ្ជាការកងរាជអាវុធហត្ថខណ្ឌ លោក លោកស្រីចៅសង្កាត់ទាំង១១ លោក លោកស្រីប្រធានទីរួមផ្សារទាំង៣ និងមន្ត្រីរាជការគ្រប់លំដាប់ថ្នាក់ទាំងអស់ រួមទាំងបងប្អូនបុគ្គលិកក្រុមហ៊ុនស៊ីនទ្រីផងដែរ ជាពិសេស ដោយមានការចូលរួមយ៉ាងសកម្មរបស់បងប្អូនប្រជាពលរដ្ឋទាំងអស់ ក្នុងការសហការ ចូលរួមថែរក្សាសន្តិសុខ សុវត្ថិភាព សណ្តាប់ធ្នាប់ របៀបរៀបរយសាធារណៈ និងអនាម័យទីក្រុងរបស់យើងទាំងអស់គ្នា ដោយការយល់ដឹង ៕ស តារា