ភ្នំពេញៈ រថយន្ត៤គ្រឿងដឹកអីវ៉ាន់សំពីងសំពោងត្រូវសមត្ថកិច្ចខណ្ឌជ្រោយចង្វា ឃាត់នៅតាមផ្លូវជាតិលេខ៦ យកមករក្សាទុកនៅអធិការដ្ឋាននគរបាលខណ្ឌជ្រោយចង្វា ដើម្បីធ្វើការអប់រំឈប់ឲ្យដឹកអីវ៉ាន់សំពីងសំពោងទៀត។

អធិការនគរបាលខណ្ឌជ្រោយចង្វា​ លោក​ សៀម​ សុត្ថាវុធ​ បានប្រាប់ឲ្យដឹងថា នៅម៉ោងជិត៩យប់ ថ្ងៃពុធ ៦រោច ខែផល្គុន ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៧ ខែមីនា ឆ្នាំ២០១៨ មានរថយន្ត៤ គ្រឿង កំពុងរៀបចំលើកអីវ៉ាន់ដាក់លើរថយន្តយ៉ាងសំពីងចំពោងនៅតាមបណ្តោយផ្លូវជាតិលេខ៦ ដែលមើលទៅហាក់បីដូចជាអាណាធិបតេយ្យ និងសង្ស័យផ្ទុកលើសចំណុះ ត្រូវបានកំលាំងសមត្ថកិច្ចខណ្ឌជ្រោយចង្វាយើង ឃាត់យកមករក្សាទុក។

បច្ចុប្បន្ន រថយន្តទាំង៤គ្រឿងខាងលើនេះ សមត្ថកិច្ចបានបញ្ជូនទៅរក្សាទុកនៅអធិការដ្ឋានខណ្ឌជ្រោយចង្វា ដើម្បីធ្វើកំណត់ហេតុ និង ធ្វើកិច្ចសន្យា រួចហើយអប់រំឈប់ឲ្យដឹកអីវ៉ាន់សំពីងសំពោងទៀត៕ជ្រោយពេជ្រ