ភ្នំពេញ ៖ ផ្ទះម៉ាស្សាមួយកន្លែង ដែលសមត្ថកិច្ចសន្និដ្ឋានថា មានលួចលាក់បង្កប់អំពើជួញដូរផ្លូវភេទត្រូវបានកម្លាំងនគរបាលនាយកដ្ឋានប្រឆាំងការជួញដូរមនុ ស្ស និងការពារអនីតិជននៃក្រសួងមហាផ្ទៃបង្ក្រាបដោយឃាត់ខ្លួនម្ចាស់ផ្ទះជាមេបនពីរនាក់ប្តីប្រពន្ធនិងនារីម៉ាស្សា៨នាក់។
ប្រតិបត្តិការនេះបានប្រព្រឹត្តទៅកាលពីវេលាម៉ោង ៦និង២០នាទីព្រលប់ថ្ងៃទី២៩មិថុនា២០១៥ នៅហាងម៉ាស្សាយីហោ៨៨៨ស្ថិតនៅទល់មុខ មីក្រូហិរញ្ញវត្ថុប្រាសាក់លើកំណាត់ផ្លូវលេខ២៧១ ក្នុងសង្កាត់ទួលទំពូងទី២ខណ្ឌចំការមនមួយកន្លែងដោយមានការអនុញ្ញាតពីលោកគង់ សំណារេត ព្រះរាអាជ្ញារងអមសាលាដំបូងរាជធានីភ្នំពេញ ។
មន្រី្តនគរបាលដែលចូលរួមបង្ក្រាបទីតាំងខាងលើបានឲ្យដឹងថា គឺធ្វើឡើងបនា្ទប់ពីមានការតាមដានរបស់កម្លាំងជំនាញយូរមកហើយ ។ប្រតិបត្តិការនេះ សមត្ថកិច្ចបានឃាត់ខ្លួនមនុស្ស២នាក់ដែលមានឈ្មោះចិត្រ ភេទប្រុស អាយុ២៤ឆ្នាំ ជាប្តី និងឈ្មោះយុង ឆួន អាយុ៣៦ឆ្នាំ ជាប្រពន្ធ (ជាថៅកែមា្ចស់អាជីវកម្មហាងម៉ាស្សា៨៨៨) ព្រមទាំងក្រុមនារីម៉ាស្សា៨នាក់ រួចនាំបញ្ជូនទៅកាន់នាយកដ្ឋានប្រឆាំងការជួញដូរមនុស្ស និងការពារអនីតិជន នៃក្រសួងមហាផ្ទៃ ដើម្បីមានចំណាត់ការតាមផ្លូវច្បាប់ ។
សមត្ថកិច្ចដដែលឲ្យដឹងទៀតថា ប្រតិបតិ្តការបង្ក្រាបផ្ទះអាជីវកម្មដែលមាន លួចលាក់បង្កប់បម្រើសេវាផ្លូវភេទ ជ្រកក្រោមស្លាកម៉ាស្សាកោសជប់យីហោ៨៨៨ខាងលើនេះ សមត្ថកិច្ចដកហូតបានស្រោមអនាម័យមួយចំនួនទុកជាភស្តុតាងដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមច្បាប់ ៕
