ខេត្តកណ្ដាល៖ជនរងគ្រោះបីនាក់បានស្លាប់យ៉ាងអាណោចអាធ័មនៅនិងកន្លែងកើតហេតុ ដោយបុរសម្នាក់បើករថយន្តបុក រួចបើករថយន្តរត់នៅក្រុងតាខ្មៅ ។ ប៉ូលិសចរាចរណ៍បានត្រឹមកសាងសំណុំរឿងបញ្ជូនទៅតុលាការតែប៉ុណ្ណោះ ។ រីឯជនល្មើសកំពុងរស់នៅក្រៅសំណាញ់ច្បាប់នៅឡើយ។
ប៉ូលិសចរាចរណ៍បានបញ្ជាក់ថា សំណុំរឿងត្រូវបានបញ្ជូនទៅតុលាការហើយ ដែលបច្ចុប្បន្នលោកស្រី ស៊ូ សុជាតា ព្រះរាជអាជ្ញារងអមសាលាដំបូងខេត្តកណ្តាល កំពុងចាត់ការតាមនីតិវិធី ។
អ្វីដែលមជ្ឈដ្ឋានចាប់អារម្មណ៍ខ្លាំងគឺជនល្មើសពុំទាន់ត្រូវបានចាប់ខ្លួននៅឡើយទេ ទោះបីស្គាល់អត្តសញ្ញាណថាឈ្មោះ សោម រតនៈ ក៏ដោយ ។ ជនល្មើសធ្លាប់ចរចារបញ្ចប់សំណុំរឿងជាមួយគ្រួសារនៃសព តែមិនបានសម្រេច ហើយសំណុំរឿងនេះក៏ស្ងាត់សូន្យឈឹងតែម្ដង។
ប៉ូលីសចរាចរណ៍បានបញ្ជាក់ថា ឈ្មោះ សោម រតនៈ ប្រឈមបទល្មើស រត់គេចពីការទទួលខុសត្រូវ តាមមាត្រា៥៤៣ នៃក្រមព្រហ្មទណ្ឌ និងបទបើកបរដោយធ្វេសប្រហែស បណ្ដាលឱ្យស្លាប់អ្នកដទៃ តាមមាត្រា៨៥ និងមាត្រា៥៣ នៃច្បាប់ស្ដីពីចរាចរណ៍ផ្លូវគោក។
សូមជម្រាបថា៖យុវជនបីនាក់ បានខ្ទាតផ្លោងធ្លាក់ផ្លូវស្លាប់ភ្លាមៗ ក្រោយពេលរថយន្ត LANG ROVER បុកអូសជាង១០០ម៉ែត្រ កាលពីវេលាម៉ោង៦៖១០នាទី ល្ងាចថ្ងៃសុក្រ ទី០៥ ខែមករា ឆ្នាំ២០១៨ នៅជិតវិទ្យាល័យខ្ពបវែង ស្ថិតក្នុងក្រុងតាខ្មៅ។
មុនពេលកើតហេតុ មានរថយន្តស៊េរីទំនើបមួហគ្រឿង ម៉ាក LANG ROVER ពណ៌ខ្មៅ ពាក់ផ្លាកលេខ ភ្នំពេញ 2U-6977 បើកបរល្បឿនលឿនដូចហោះ ក្នុងទិសដៅពីលិចទៅកើត។ លុះមកដល់ចំណុចកើតហេតុ បានជែងម៉ូតូមួយគ្រឿង ម៉ាក ហុងដា MSX ពណ៌ខ្មៅលាយស អត់ផ្លាកលេខ ។ ប៉ុន្តែមិនផុតក៏ជ្រុលបុកម៉ូតូយ៉ាងពេញទំហឹង បណ្តាលឱ្យយុវជនបីនាក់ ខ្ទាតផ្លោងធ្លាក់ចេញពីផ្លូវស្លាប់ម្នាក់ភ្លាមៗ និងពីរនាក់ទៀត បានដាច់ខ្យល់ស្លាប់ពេលដឹកបញ្ជូនទៅមន្ទីរពេទ្យ។ ដោយឃើញហេតុការណ៍មិនស្រួល អ្នកបើកបររថយន្តបង្ក បានបន្ថែមល្បឿនបើករត់គេចខ្លួនតាមផ្លូវលេខ១១៥ លុះដល់ស្តុបជិតកាកបាទក្រហមខេត្តកណ្ដាល ក៏បានប្លុងរថយន្តចោល រួចអ្នកបើកបរបានចុះរត់គេចខ្លួន៕ ឆ ដា
