ភ្នំពេញ៖ រឿងហួសចិត្តមួយបានកេីតឡេីង បន្ទាប់ពីមានព្រះសង្ឃ២អង្គនិមន្តបិណ្ឌបាតជាមួយគ្នា លុះនិមន្តមកដល់មុខមន្ទីរពេទ្យគន្ធបុប្ផាមិនដឹងរឿងអី ស្រាប់តែដេញវាយគ្នាទៅវិញទៅមក បង្កឲ្យផ្អេីលដល់ប្រជាពលរដ្ឋនិងសមត្ថកិច្ចមូលដ្ឋានចេញទៅឃាត់យកមកប៉ុស្តិ៍វត្តភ្នំដេីម្បីសួរនាំ ។

ករណីខាងលេីនេះ បានកើតឡើងនៅវេលាម៉ោង៩ព្រឹកថ្ងៃទី៤ ខែវិច្ឆិកា ឆ្នាំ២០១៥នេះ នៅមុខមន្ទីរពេទ្យគន្ធបុប្ផាទី៤ ខាងជើងវត្តភ្នំ សង្កាត់វត្តភ្នំ ខណ្ឌដូនពេញ រាជធានីភ្នំពេញ ។

ព្រះសង្ឃ២អង្គដែលវាយគ្នាខាងលេីនោះទី១-ឈ្មោះ សឿន ម៉ាប់ ព្រះជន្ម២២ គង់នៅវត្តសារាវ័នតេជោ នៅកុដិលេខ១៧ និងទី២-ឈ្មោះ កែវ ចំរើន ព្រះជន្ម២៥ គង់នៅវត្តនៅជាមួយគ្នាតែកុដោយឡែកគឺនៅកុដិលេខ២៤ ។

តាមប្រភពព័ត៍មានពីលោកអ៊ុត សំអាត នាយប៉ុស្តិ៍នគរបាលវត្តភ្នំ បានឲ្យដឹងថា នៅមុនពេលកើតហេតុមានលោកសង្ឃ២អង្គ បាននិមន្តបិណ្ឌបាតតាមបណ្តោយផ្លូវលេខ៩០ លុះនិមន្តមកដល់ចំណុចកេីតហេតុខាងលេី  ស្រាប់តែលោកសង្ឃទាំង២អង្គនេះបាន ដេញវាយគ្នា បង្កឲ្យមានភាពភ្ញាក់ផ្អើលដល់ប្រជាពលរដ្ឋ អ្នកដែលនាំយកកូនទៅព្យាបាល នៅមន្ទីពេទ្យគន្ធបុប្ផាចោមរោមមើលគ្រប់ៗគ្នា ។

លោកនាយប៉ុស្តិ៍នគរបាលវត្តភ្នំ បានបន្តទៀតថា បន្ទាប់ពីមានទំនាស់នេះសមត្ថកិច្ចដែលប្រចាំការនៅមន្ទីរពេទ្យនិងនគរបាលមូលដ្ឋានដែលល្បាតនៅក្បែរនោះ បានទៅឃាត់ខ្លួនលោកសង្ឃ២អង្គនោះ ទៅសួរនាំនៅប៉ុស្តិ៍រដ្ឋបាលវត្តភ្នំ ដើម្បីសួររកហេតុផល ។

ក្រោយពេលសមត្ថកិច្ចសួរនាំរួច ទេីបដឹងថាលោកសង្ឃ២អង្គនេះ វាយគ្នាទៅវិញទៅមក ដោយសារតែសូត្រធម៌មិនស្របគ្នា ខណៈដែលឧ៌បាសកប្រគេនបច្ច័យហើយព្រះសង្ឃទាំង២សូត្រធម៌មួយទៅឆ្វេងមួយទៅស្តាំ ទោះយ៉ាងណាក្នុងហេតុការណ៍នេះមិនបណ្តាលឲ្យព្រះសង្ឃទាំង២អង្គរងរបួសនោះទេ គ្រាន់តែវាយគ្នាម្នាក់មួយដៃមួយជើងទាំងស្បង់ជីពរនិងមានបាត្រស្ពាយស្មាប៉ុណ្ណោះ ។

គួរបញ្ជាក់ថា លោកសង្ឃព្រះនាម កែវ ចំរើន បួសបាន៣វស្សាចេះបិណ្ឌបាតស្ទាត់ តែចំណែកព្រះសង្ឃព្រះនាម សឿន ម៉ាប់ បួសបាន៤វស្សាមិនសូវចេះបិណ្ឌបាត ទើបកើតចេញជាទំនាស់គ្នាបែបនេះ  ហេីយព្រះសង្ឃ២អង្គនេះ ត្រូវបានសមត្ថកិច្ចប្រគល់ទៅព្រះចៅអធិការវត្តសារាវ័នតេជោ ដេីម្បីធ្វេីការអប់រំតាមវិន័យសង្ឃ ៕

ដោយ៖ ស ដារ៉ា