ខេត្តមណ្ឌលគិរី ៖ មន្រ្តីឧទ្យានុរក្សដែនជម្រកសត្វព្រៃភ្នំព្រេច សហការជាមួយកម្លាំងប៉ុស្តិ៍នគរបាលរដ្ឋបាលមេម៉ង់ និងកម្លាំងកងរាជអាវុធហត្ថស្នាក់ការសន្តិសុខ៧៦៤ កាលពី វេលាម៉ោង៥ទៀបភ្លឺ ថ្ងៃទី១៦ ខែមីនា ឆ្នាំ២០១៨ បានបង្រ្កាបបទល្មើសបរបាញ់សត្វព្រៃល្មើសច្បាប់នៅចំណុចភ្នំបត់ ស្ថិតក្នុងភូមិពូញ៉ាវ ឃុំមេម៉ង់ ស្រុកកែវសីមា ខេត្តមណ្ឌលគិរី ដោយដកហូតបានសត្វស្វាស្រូវ ចំនួន៣២ក្បាល ក្នុងនោះបានងាប់អស់ចំនួន៨ក្បាល និងដកហូតបានម៉ូតូចំនួន២គ្រឿង ខណៈជនសង្ស័យបានរត់គេចខ្លួនបាត់អស់។
លោកហាន សាខន នាយកដែនជម្រកសត្វព្រៃភ្នំព្រេចបានឲ្យដឹងថា ជនសង្ស័យបានប្រើប្រាស់ម៉ូតូពីរគ្រឿងជាមធ្យោបាយ ១គ្រឿងម៉ាកExciter ពណ៌ក្រហម និង១គ្រឿងទៀត ប្រភេទឆ្លាមកែច្នៃ ។ លោកបន្តថា ដោយមានការសង្ស័យ ក៏ហៅអោយឈប់ឆែកឆេរ ស្រាប់តែពួកគេដឹងខ្លួន បម្រុង រត់គេច តែត្រូវកម្លាំងដេញចាប់បានម្នាក់ និងម្នាក់ទៀតរត់ គេចចូលព្រៃបាត់ ។ ក្នុងនោះកម្លាំងចាប់យកវត្ថុតាងសត្វស្វាចំនួន ៣២ក្បាល និងងាប់៨ក្បាល ជាប្រភេទស្វាស្រូវ ។
បច្ចុប្បន្នវត្ថុតាងម៉ូតូ២គ្រឿង មន្រ្តីជំនាញបានយកទៅរក្សា ទុកនៅស្នាក់ការមេម៉ង់ នៃដែនជម្រកសត្វព្រៃភ្នំព្រេច ដើម្បីកសាងសំណុំរឿងចាត់ការបន្តតាមនីតិវិធី។ រីឯសត្វដែល ងាប់មន្រ្តីជំនាញបានដុតបំផ្លាញចោល ហើយសត្វស្វានៅរស់ ត្រូវលែងចូលទៅក្នុងព្រៃធម្មជាតិវិញ៕ ជាយក្រុង
