ភ្នំពេញ៖ បុរសជនជាតិបរទេសម្នាក់ស្រវឹងស្រាបើករថយន្តក្នុងល្បឿនលឿនបានបោងចង្កូតទៅបុកឃឿនឡើងសួនច្បារបណ្ដាលឲ្យការខូចខាត តែមិនបង្កឲ្យនរណាម្នាក់រងរបួសនោះទេ ។
ហេតុការណ៍នេះបង្កឡើងកាលពីវេលាម៉ោង៣និង០៥នាទីទៀបភ្លឺ ថ្ងៃទី៧ ខែវិឆ្ឆិកា ឆ្នាំ២០១៥ នៅតាមបណ្ដោយផ្លូវ១១០ កែងនិងផ្លូវព្រះនរោត្ដម ស្ថិតក្នុងសង្កាត់វត្តភ្នំខណ្ឌដូនពេញ ។
បើតាមសាក្សីដែលបានឃើញហេតុការណ៍នេះបានឲ្យដឹងថា មុនពេលកើតហេតុគេបានឃើញបុរសជាជនជាតិបរទេសម្នាក់បើករថយន្តលុចសុីសIS 200 ពណ៌ស ពាក់ស្លាកលេខភ្នំពេញ2AC.7197 ក្នុងទិសដៅពីត្បួងទៅជើង បើកតាមបណ្ដោយផ្លូវព្រះនរោត្ដម ខណះមកដល់ចំណុចកើតហេតុបានបទឆ្វេង ឆ្លងចូលទៅផ្លូវ១១០ ដែលមិនបន្ថយល្បឿនហើយបោងចង្កូតបទ បណ្ដាលឲ្យរថយន្តបង្កបុកបែកឃឿនឡើងចូលដល់សួនច្បារ រងការខូចខាតដល់សម្បត្តិរដ្ឋ តែសំណាងល្អហើយមិនបង្កដល់នរណាម្នាក់រងរបួសនោះទេ។
ក្រោយពេលកើហេតុសមត្ថកិច្ចបានចុះមកដល់កន្លែងកើតហេតុភ្លាមៗនិងបានឃាត់ខ្លួនជនបរទេសយកទៅប៉ុស្តិ៍នគរបាលរដ្ឋាបាល វត្តភ្នំ ដើម្បីសួរនាំ និងទំនាក់ទំនងជំនាញស្ទួចរថយន្តបង្កយកទៅរក្សាទុកនៅការិយាល័យក្រុងភ្នំពេញរងចាំដោះស្រាយតាមនីតិវិធីច្បាប់៕
ដោយ៖ ជឹម ភារ៉ា
