ប្រទេសកូរ៉េ៖ ព្រឹកថ្ងៃព្រហស្បតិ៍ ខែពិសាខ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី ១៩ ខែមេសា ឆ្នាំ ២០១៨ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានដឹកនាំគណៈប្រតិភូក្រសួង ធ្វើទស្សនកិច្ចនៅប្រព័ន្ធធារាសាស្ត្រទំនប់ Beck Gok ស្ថិតក្នុងខេត្ត Chungcheong សាធារណរដ្ឋកូរ៉េ ។

នៅក្នុងដំណើរទស្សនកិច្ចនេះដែរ លោករដ្ឋមន្ត្រី និងគណៈប្រតិភូ ក៏បានជួបពិភាក្សាជាមួយស្ថាប័ន KRC (Korea Rural Community Corporation) ដែលជាស្ថាប័នគ្រប់គ្រងប្រព័ន្ធធារាសាស្ត្រនៅសាធារណរដ្ឋកូរ៉េ ដើម្បីសិក្សាស្វែងយល់អំពីការគ្រប់គ្រង ការបញ្ជាសំណង់សិល្បការ ក៏ដូចជាការចែកចាយទឹក តាមប្រព័ន្ធព័ត៌មានវិទ្យា ។

សូមបញ្ជាក់ជូនថា ទំនប់ Beck Gok ត្រូវបានសាងសង់ឡើងនៅក្នុងឆ្នាំ ១៩៤៩ ហើយធ្វើការជួសជុល ស្តារឡើងវិញនៅក្នុងអំឡុងឆ្នាំ ២០១១-២០១៤ ដោយចំណាយថវិកាអស់ប្រមាណ ៦០ លានដុល្លារសហរដ្ឋអាមេរិក ។ ទំនប់នេះមានប្រវែង ៤១០ ម, កម្ពស់ ២៨,៧ ម និងមានសមត្ថភាពស្តុកទឹកបានប្រមាណ ២៦ លានម៉ែត្រគូប ព្រមទាំងអាចធ្វើការស្រោចស្រពលើផ្ទៃដីប្រមាណ ៣.០០០ ហិកតា ។ ក្រៅពីការស្រោចស្រព ទំនប់នេះ ក៏អាចផលិតថាមពលវារីអគ្គិសនីផងដែរ ៕