ខេត្តបន្ទាយមានជ័យ៖ អ្នកជិះម៉ូតូ២នាក់ស្លាប់នៅនឹងកន្លែងកើតហេតុ និង២នាក់ទៀតទទួលរងរបួសធ្ងន់ត្រូវបានសមត្ថកិច្ចដឹកបញ្ជូនយកទៅសង្គ្រោះជីវិតនៅមន្ទីរពេទ្យក្នុងហេតុការណ៍គ្រោះថ្នាក់ចរាចរណ៍រវាងម៉ូតូបុកនិម៉ូតូ កាលពីវេលាម៉ោង៥ព្រឹកថ្ងៃទី៩ ខែវិច្ឆិកា ឆ្នាំ២០១៥ នៅលើកំណាត់ផ្លូវជាតិលេខ៥ ស្ថិតនៅចំណុចទល់មុខនិងមន្ទីរពន្ធដារខេត្តបន្ទាយមានជ័យក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ។
ក្នុងហេតុការណ៍ខាងលើអ្នកជិះម៉ូតូទាំង២គ្រឿងត្រូវបានស្លាប់អ្នកបើកម៉ូតូទាំងសងខាងចំណែកអ្នករួមដំណើរ២នាក់ក៏ទទួលរងបួសធ្ងន់ដូចគ្នានោះផងដែរ។
លោកវរសេនីយ៍ត្រី សួន នីប៉ូ នាយរងការិយាល័យនគរបាលចរាចរណ៍ខេត្តប្រាប់ឱ្យដឹងថា បើតាមសមត្ថកិច្ចជំនាញចុះទៅវាស់វែងនិងស្រាវជ្រាវ នៅកន្លែងកើតហេតុ ដោយមុនពេលកើតហេតុគេឃើញអ្នកបើកម៉ូតូម៉ាកហុងដាសេ១២៥ ស៊េរីឆ្នាំ២០០៦ពណ៌ខ្មៅ ពាក់ស្លាក លេខបន្ទាយមានជ័យ១C ២០៩៧បានធ្វើដំណើរមានគ្នា២នាក់បើកយ៉ាងលឿនក្នុងទិសដៅពីត្បូងទៅជើង អ្នកបើកមានឈ្មោះ ច្រឹក ចាន់ណា ភេទប្រុស អាយុ២៣ឆ្នាំ និងអ្នករួមដំណើរមានឈ្មោះសុទ្ធ ព្រាម ភេទប្រុស អាយុ២៣ឆ្នាំ អ្នកទាំង២នាក់រស់នៅភូមិផ្អាវថ្មី ឃុំគោកបល្ល័ង្គ ស្រុកមង្គលបុរី បានបើកយ៉ាងលឿនចូលចំណែកផ្លូវម្ខាងទៀតជ្រុលទៅបុកម៉ូតូ១គ្រឿងទៀតម៉ាកហុងដាសេ១២៥ ពណ៌ខ្មៅ ពាក់ស្លាកលេខបន្ទាយមានជ័យ១A៨៥៧១ជិះគ្នា២នាក់ អ្នកបើកឈ្មោះផៃ លៀប ភេទប្រុស អាយុ៤៧ ឆ្នាំ និងអ្នករួមដំណើរឈ្មោះ ឆើប សុខលៀប ភេទស្រី អាយុ៣៥ឆ្នាំ រស់នៅភូមិព្រែកល្ពៅ ឃុំប្ញស្សីក្រោក ស្រុកមង្គលបុរី ធ្វើដំណើរទិសដៅច្រាសទិសគ្នា ពីជើងមកត្បូងបណ្តាលឱ្យអ្នកជិះម៉ូតូទាំងសងខាងផ្លោងខ្ទាតរៀងៗខ្លួន។រំពេចនោះគេឃើញអ្នកបើកម៉ូតូឈ្មោះ ច្រឹក ចាន់ណា និងឈ្មោះ ផៃ លៀប បានស្លាប់នៅកន្លែង កើតហេតុចំណែករួមដំណើរ២នាក់ទទួលរងរបួសធ្ងន់។ក្រោយកើតហេតុភ្លាមនគរបាលចរាចរ ខេត្តបានទៅដល់ ដឹកអ្នករងរបួសទាំង២នាក់បញ្ជូនទៅកាន់មន្ទីពេទ្យដើម្បីយកទៅសង្គ្រោះ ជីវិត។ចំណែកអ្នកស្លាប់ត្រូវបានសមត្ថកិច្ចទំនាក់ទំនងក្រុមគ្រួសារមកទទួលយកសពដើម្បីយកទៅចាត់ចែង ធ្វើបុណ្យតាមប្រពៃណី។
លោកនាយរងការិយាល័យបានបញ្ជាក់ឱ្យដឹងទៀតថា គ្រោះថ្នាក់ចរាចរណ៍ខាងលើ បើតាមការសន្និដ្ឋានរបស់សមត្ថកិច្ចគឺបង្កឡើងដោយអ្នកបើកម៉ូតូហុងដាពាក់ស្លាកលេខបន្ទាយមានជ័យ១C ២០៩៧ទំនង បានបើកប្រជែងរថយន្តធុនធំហើយជ្រុលចូលទៅបុកម៉ូតូ១គ្រឿងទៀតបណ្តាលឱ្យស្លាប់និងទទួលរងបួសបែបនេះ។ម៉ូតូទាំង២គ្រឿងបន្ទាប់ពីសមត្ថកិច្ចវាស់វែងតាមជំនាញរួចរាល់ហើយអូសយកមករក្សាទុកនៅស្នងការដ្ឋាននគរបាលខេត្តដើម្បីទុកចាត់ការតាម ផ្លូវច្បាប់ ៕
ដោយ៖ សំ វិច្ឆិកា
