កាលពីថ្ងៃទី២៤ខែមេសា ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិថៃ លោក Prawit Wongsuwan បានជួបពិភាក្សាជាមួយរដ្ឋមន្ត្រីការពារជាតិ អាមេរិក លោក Jim Mattis នៅទីក្រុងវ៉ាស៊ីនតោន ស្តីពីកិច្ចសហប្រតិបត្តិការយោធាទ្វេភាគី។
នៅក្នុងដំណើរទស្សនកិច្ចនោះ លោកPrawit Wongsuwan បានស្នើររៀបចំជំនួប រវាងប្រធានាធិបតីដូណាលត្រាំនិង គីមជុងអ៊ុន នៅលើទឹកដីថៃ ។ នៅពេលនេះ ទីតាំងនៃជំនួបកំពូលរវាងមេដឹកនាំទាំងពីរ មិនទាន់បានប្រកាសឲ្យដឹងជាសាធារណនៅឡើយ។
លោកPrawit Wongsuwan បញ្ជាក់ថា ថៃ គឺជាប្រទេសសមស្រប នៃការរៀបចំព្រឹត្តិការណ៍ប្រវត្តិសាស្ត្រ ខាងលើ ដោយសារតែថៃជាប្រទេសស្ថិតនៅកណ្តាល និងជាប្រទេសតំបន់អាស៊ាន ដែលមានទាំង អាមេរិក និងកូរ៉េខាងជើង ដាក់ស្ថានទូត នៅថៃ។
ក្នុងពេលជាមួយគ្នានេះរដ្ឋមន្ត្រីការបរទេសថៃ លោក Don Pramudvinai ក៏បានបញ្ជាក់ផងដែរ ថា «ថៃ នឹងចូលរួមរៀបចំ ជំនួប រវាងលោកត្រាំនិងគីមជុងអ៊ុន ដែល អាចធ្វើឡើងនៅចុងខែឧសភាឬ ដើមខែមិថុនា»។
មកទល់ពេលនេះ មិនទាន់មានការពិភាក្សាណាមួយ រវាងរដ្ឋាភិបាលទីក្រុងបាងកក ជាមួយទីក្រុងវ៉ាស៊ីនតោន ឬ ទីក្រុងព្យុងយ៉ាងពីជំនួប ខាងលើនៅឡើយ។
សូមបញ្ជាក់ថា ថៃ ជាប្រទេសដែលមានស្ថានទូតកូរ៉េខាងជើង និងមានទំនាក់ទំនងល្អទាំងជាមួយកូរ៉េខាងជើង និងអាមេរិក នាពេលកន្លងមក៕
ដោយ៖ មែវ សាធី
