ភ្នំពេញ៖ ក្នុងគណនី Facebook Page សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានសរសេរថា “ចាប់តាំងពីគេហទំព័រ Facebook Page សម្តេចតេជោ ហ៊ុន សែន បានបើកជាផ្លូវការ គឺប្រជាពលរដ្ឋ និងយុវជនបានធ្វើការទំនាក់ទំនង ទាំងនៅក្នុងទំព័រអត្ថបទប្រចាំថ្ងៃ (Daily posting page) ប្រអប់សំបុត្រ (In Box) និងសារឆ្លើយឆ្លងភ្លាមៗ (Messenger) ។

នៅពេលនេះ គឺប្រជាពលរដ្ឋកាន់តែមានអារម្មណ៍ជិតស្និទ្ធ និងកក់ក្តៅជាមួយសម្តេចនាយករដ្ឋមន្រ្តី ដែលពួកគេអាចផ្ញើព័ត៌មានផ្សេងៗ រូបថត សម្លេង របាយការណ៍ ដែលមិនធ្លាប់បានដឹងឮពីមុន។ សម្តេចតេជោ នឹងបន្តដោះស្រាយជូន ប្រជាពលរដ្ឋចំពោះរឿងអយុត្តិធម៌ដែលមន្រ្តីខិលខូច មួយចំនួនបានធ្វើមកលើប្រជាពលរដ្ឋស្លូតត្រង់” ។

ទន្ទឹមនឹងនេះផងដែរ សម្តេចតេជោសូមមន្រ្តីដឹកនាំ តំណាងប្រជាពលរដ្ឋ អាជ្ញាធរ សមត្ថកិច្ច ជាពិសេសមន្រ្តីនៅតាមមូលដ្ឋានដូចជា មេភូមិ មេឃុំ ចៅហ្វាយស្រុក ចៅហ្វាយខេត្ត យកចិត្តទុកដាក់ជួយមើលនិងដោះស្រាយបញ្ហាផ្សេងៗជូនប្រជាពលរដ្ឋយើងឲ្យបានល្អ ។

សម្តេចតេជោសង្កត់ធ្ងន់ថា កុំភ្លេចឲ្យសោះគឺត្រូវងូតទឹក ដុសក្អែល ឆ្លុះកញ្ជក់ ព្យាបាល មើលខ្លួនឯងឲ្យបានច្បាស់ បើពុំដូច្នោះទេ ឱកាសបម្រើប្រជាពលរដ្ឋនឹងគ្មានតទៅទៀតឡើយ។ សម្តេចតេជោ ហ៊ុន សែន មិនឲ្យប្រជាពលរដ្ឋខ្មែរអស់សង្ឃឹមឡើយ ទាំងនៅក្នុងអាណត្តិដឹកនាំរាជរដ្ឋាភិបាលពេលនេះ ក៏ដូចជានៅឆ្នាំ២០១៨ខាងមុខ ៕